Nigeria: Abatazwi barashe ku bashinzwe umutekano wa Perezida Buhari

Itsinda ry’itwaje intwaro bikekwa ko ari amabandi, ryagabye igitero cy’amasasu ku modoka yari itwaye abashinzwe umutekano wa Perezida Muhammadu Buhari ubwo barimo bategura uruzinduko rwe aho yavukiye mu Majyaruguru y’Iburengerazuba bw’Igihugu. 

Ibiro by’Umukuru w’Igihugu cya Nigeria byatangaje ko abitwaje intwaro barashe ku bashinzwe umutekano bari bagiye gutegura inzira za Perezida Buhari uzagirira uruzinduko i Daura aho akomoka, bageze hafi yaho.

Abarashweho ni inzego z’umutekano zigizwe n’Abashinzwe kurinda Perezida, abashinzwe porotokole ye n’abashinzwe itangazamakuru, nk’uko bigaragara mu itangazo ryashyizwe ahagaragara na Perezidansi ku mugoroba wo ku wa Kabiri. 

Itangazo ryavuye mu Biro by’Umukuru w’Igihugu riragira riti: “Abagabye igitero barashe ku murongo w’imodoka zari zigeze mu gico baziteze, ariko bahita basubizwa inyuma n’abasirikare, abapolisi n’abarinda umutekano wa Perezida.”

“Babiri bari muri izo modoka zaguye mu gico ni bo bari kuvurwa ibikomere byoroheje bagize. Abandi basirikare n’abakozi ndetse n’imodoka zabatwaye bavuye i Daura amahoro.”

Muri iri tanganzo ntihagaragajwemo neza abakekwaho kuba bagabye iki gitero cyagabwe ku modoka za Perezidansi Buhari adahari. . 

Bamwe mu batanze ibitekerezo ku byabaye, bavuze ko ikibazo nka kiriya kiba gishimangira uburyo umutekano wa Nigeria utifashe neza, hakaba havutse impungenge ku mutekano wa Perezida ubwe igihe azaba akoze urwo ruzinduko.

Perezida Buhari ategerejwe mu gace akomokamo ka Daura muri Leta ya Katsina mu mpera z’iki cyumweru, aho azaba yitabiriye ibirori by’Idini ya Isilamu byitwa Sallah.

Biteganyijwe ko Buhari azasoza manda ye ya kabiri ku mwanya wa Perezida mu mwaka utaha, igihe amaze kikaba cyararanzwe no kurwanya imitwe y’iterabwoba imaze imyaka isaga 13 mu Majyaruguru y’Iburasirazuba bw’Igihugu, kimwe n’ikibazo cy’amabandi yitwaje intwaro yiganje mu Majyaruguru y’Iburengerazuba aho avuka. 

Amabandi yo muri ako gace azwiho kugaba ibitero mu biturage, gusahura no gushimuta  abantu agasaba ikiguzi ngo barekurwe, nubwo hari ibikorwa bya gisirikare byashyiriweho kubarwanya.