Ngororero yihaye ingamba zihariye mu kwita ku buzima bw’umwana

  • NYIRANEZA JUDITH
  • Ugushyingo 28, 2023
  • Hashize amezi 3
Image

Mu Karere ka Ngororero hatangijwe icyumweru cyahariwe ubuzima bw’umwana n’umubyeyi, ubuyobozi bwiha  ingamba zihariye mu kwita ku buzima bw’umwana.

Ubutumwa bujyanye  n’iki cyumweru harimo kurinda umwanya ukiri mu nda, kumurinda akimara kuvuka,  kurya indyo yuzuye ku mugore utwite, kwita ku mutekano w’umwana ukimara kuvuka mu kumurinda igwingira.

Ku rwego rw’Akarere, igikorwa cyabereye mu Murenge wa Gatumba ku nsanganyamatsiko igira iti “Hehe n’igwingira: Twite ku buzima bw’umubyeyi utwite n’umwana, imirire n’isuku, dukingize abana inkingo zose’.

Abaturage basabwe kwitabira iki cyumweru bakingiza abana inkingo zose, bapima abana ibiro, ibizigira, ubureburere; babaha ibinini by’inzoka n’amata mu rwego rwo kubarinda imirire mibi n’igwingira, gupimisha abari munsi y’imyaka 5 no kuboneza urubyaro.

Hafashwe ingamba ko buri muturage agomba kugira intero igira iti ‘Sinzigera ngira igwingira mu rugo rwanjye’.

Muri iki cyumweru hazibandwa ku bikorwa byo gukingira abana bacikishirije inkingo, gutanga vitamini A ku bana bafite amezi 6 kugeza kuri 59, gutanga ibinini by’ inzoka ku bana bafite umwaka 1 kugeza ku myaka 15 ndetse n’abantu bakuru, kuboneza urubyaro ku babyifuza.

Gusuzuma imirire mibi ihutiyeho ku bana bafite amezi 6 kugeza kuri 59 n’igwingira ku bana bafite amezi 6 kugeza ku myaka 2, gutanga ongera intungamubiri ku bana kuva ku mezi 6-23, gutanga ubutumwa bugamije guteza imbere ubuzima no kwirinda indwara, ubukangurambaga ku isuku n’isukura.

Ibi bikorwa byose bigamije gutuma abaturage bagira ubuzima bwiza, by’umwihariko ababyeyi n’abana bari munsi y’imyaka 5.

Umuyobozi w’Akarere wungirije ushinzwe imibereho myiza y’abaturage  Mukunduhirwe Benjamine yavuze ko Akarere ka Ngororero, gakomeje guhangana n’igwingira ry’abana kuko mu myaka myinshi byagiye bigaragara ko Akarere gafite abana benshi bagwingiye, n’ubwo mu mibare iheruka bigaragara ko hari icyakozwe.

Ingamba zo kurandura igwingira

Mu kurandura igwingira ry’abana, Akarere kazakomeza guteza imbere ibikorwa by’ubuzima hibandwa ku guhagurukira ikibazo cy’amakimbirane mu miryango kuko kiri ku isonga mu bitera imirire mibi n’igwingira mu bana, bitewe nuko ababyeyi babanye nabi batita ku nshingano zabo nk’ababyeyi, mu kurera no kwita ku bana, gushyira imbaraga mu isuku n’isukura kuko ahari umwanda ufite uruhare runini mu gutera igwingira.

Gukoresha udushya duhari mu karere mu gufasha abana harimo umuganura w’umwana, kubyara muri batisimu, igitondo cy’isuku, n’ibindi.

Gukoresha neza inkunga Leta itanga mu gushyigikira abana bagwingiye, abagore batwite n’abonsa (Gahunda ya Shisha Kibondo na NSDS). Ababihawe bakabikoresha uko bisabwa kugira ngo bibagirire akamaro.

Gukangurira abaturage kwishakamo ibisubizo bakora imirima y’igikoni no gutera ibiti by’imbuto muri buri rugo.

Kwitabira serivisi z’ubuzima kuva ku baganga kugeza ku bajyanama b’ubuzima kugira ngo bashobore gukomeza gutanga serivisi z’ubuzima zinoze kandi zigera kuri bose.

Mu gutangiza iki cyumweru, igikorwa cyatangijwe ku mugaragaro n’Umuyobozi w’Akarere wungirije  myiza y’abaturage  Mukunduhirwe Benjamine ari kumwe n’intumwa ya RBC Uwitonze Cesarie, Umuyobozi w’Ibitaro bya Muhororo Dr.William Namanya, abakozi b’Ibitaro n’Ikigo Nderabuzima cya Muhororo  n’Abajyanama b’Ubuzima.

  • NYIRANEZA JUDITH
  • Ugushyingo 28, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE