Ngororero: Urubyiruko rwakomwe mu nkokora no gupfusha imishwi 1,500

  • NTAWITONDA JEAN CLAUDE
  • Ukwakira 11, 2022
  • Hashize imyaka 2
Image

Urubyiruko rwo mu Murenge wa Gatumba, mu Karere ka Ngororero rwibumbiye muri “Koperative Igisubizo Gatumba” rworora inkoko, ariko bagize ibyago bapfusha imishwi 1,500. Uyu mushinga wahombye uri muri gahunda igamije kubyaza umusaruro amahirwe Leta y’u Rwanda yarushyiriyeho yo kurufasha kwiteza imbere no guha imirimo n’abandi.

Visi Perezida w’iyo Koperative, Nsengimana Samuel yatangarije Imvaho Nshya ko bishyize hamwe bagamije kwiteza imbere muri gahunda ya Leta yo gutanga imirimo no gukemura ibibazo by’aho batuye.

Ati: “Twibumbiye hamwe turi abanyamuryango 13. Mu 2019, Akarere kaduhaye inkunga y’ikiraro ndetse n’imishwi 1,000; twabonye abakiliya, tugura indi mishwi 1,500 mu Rubilizi kuko twari dufite isoko. Gusa twagize ikibazo ziza gupfa. Ibyo byadusubije inyuma, kuri ubu abakiliya ntabwo bakiboneka nka mbere baragabanyutse”.

Yongeyeho ko Uzima Chicken yabashumbushije imishwi 900 bo biyongereraho 100.

Mu gihe uru rubyiruko rukeka ko intandaro ari ibiryo byaba byaragaburiwe izo nkoko, umukozi wa Uzima Chicken, ushinzwe ubucuruzi Kwizera Gilbert yatangarije Imvaho Nshya ko bagiriye inama urwo rubyiruko ntirwayikurikiza.

Yagize ati: “Twabahaye inkoko zizana n’ibiryo, ziza kurwara bakibwira ko ari ibiryo. Twabasabye ko hafatwaho ibyo gupima, n’inkoko ubwazo ntibigeze bemera ko tubafasha mu gihe nyacyo zikimara gufatwa. Ntibemeye ko tubibahindurira ndetse ntitwamenye ngo inkoko zishwe n’ubuhe burwayi? Zarapfuye zirashira ndetse n’ibyo biryo birenza igihe.”

Yongeyeho ko n’umukozi wa RAB yagiyeyo gufata ibipimo asanga ibiryo byararengeje igihe kandi batarabitanze hakiri kare.

Ku birebana no gushumbusha, yagize ati: “Amasezerano tugirana n’aborozi, ni uko iyo abakiliya bagize ikibazo mu gihe twatanze imishwi cyangwa ibiryo bitameze neza, Uzima Chicken irabyirengera. Mu gihe ari amakosa y’umworozi ku giti cye, na we arabyirengera.”

Umuyobozi Mukuru w’Ikigo cy’Igihugu gishinzwe guteza imbere Amakoperative RCA, Prof. Harelimana Jean Bosco, avuga ko urubyiruko rworoherezwa mu kwibumbira hamwe rukanahabwa amahugurwa.

Ati: “Itegeko ni abantu 10, ariko ku rubyiruko ho ni abantu 5 duhita tubaha koperative, banyura no ku irembo bakoresheje ikoranabuhanga bagahita bandika koperative yabo [……] bagahita babonaho ibyo basabwa. Iyo bishyize hamwe tukabona umushinga wabo udatunganye tubaha n’amahugurwa batari bakora na koperative, tubifite mu bushobozi”.

Yongeyeho ati: “Dukora uko dushoboye tugakurura umubare ushoboka wose w’urubyiruko ngo bashobore guhanga akazi, dukora ubukangurambaga, Akarere ku kandi, Umurenge ku wundi, kuko hariyo abashinzwe amakoperative ndetse n’abafatanyabikorwa bakerekwa aho bakorera n’ikihakenewe”.

Umuyobozi wungirije w’Akarere ka Ngororero ushinzwe Iterambere ry’Ubukungu, Uwihoreye N. Patrick, yavuze ko Akarere kagira uruhare mu gufasha urubyiruko kwibumbira mu makoperative ndetse no kubakurikirana.

Ati: “Twabafashije kubaka ikiraro no kubahereza imishwi yo gutangira n’ibyo kurya by’amezi 6, irakora neza babona n’abakiliya, gusa nyuma indi mishwi yaje gupfa.

Ikibazo cyaje kuzamo ni uko ibiryo twaje kubijyana muri laboratwari dusanga byarabitswe nabi birahumana, baza kubigaburira amatungo bihumanye, tuvugana na Uzima irabashumbusha”.

Umwe mu baturage baturiye iyo koperative wahaguze inkoko yavuze ko ari amahirwe kuba habegereye, kuko basobanukiwe akamaro ko korora inkoko bikabafasha kunoza imirire, kubona ifumbire, n’ibindi.

“Koperative Igisubizo Gatumba” ifite abakozi 6 ba nyakabyizi n’umwe uhoraho. Mu gukemura ibi bibazo ushinzwe ubucuruzi muri Uzima Chicken Kwizera yavuze ko babashumbushije inkoko 900, barabafasha kuko batigeze bamenya ikishe izo nkoko.

Visi Meya Uwihoreye yavuze ko Akarere kazakomeza gushyigikira koperative z’urubyiruko, by’umwihariko iz’ubworozi bw’inkoko zigera kuri 32.

Aha ni ho bororera inkoko (Foto Nyiraneza J.)
  • NTAWITONDA JEAN CLAUDE
  • Ukwakira 11, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE