Ngororero: Inkomezabigwi 1 176 ziyemeje kwiyubakira igihugu

  • NYIRANEZA JUDITH
  • Ukuboza 19, 2023
  • Hashize amezi 2
Image

Abagera ku 1 176 basoje Urugerero rw’Inkomezabigwi icyiciro cya 11 mu Karere ka Ngororero, biyemeje kurushaho kongera imbaraga mu bikorwa byo kubaka igihugu.

Ku rwego rw’Akarere ni igikorwa cyahuriranye n’umunsi w’ubukorerabushake ibirori byabereye mu Murenge wa Matyazo ku nsanganyamatsiko igira iti: “Duhamye Umuco w’Ubutore n’Ubukorerabushake”.

Uwavuze ahagarariye abandi, Habimana Jean Baptiste warangije mu Ishuri ryisumbuye rya Rucano ESECOM riri mu Murenge wa Hindiro, Akagari ka Gatega yashimiye Leta yabonye ko ari ngombwa ko Itorero nk’ishuri ry’Abanyarwanda, by’umwihariko urubyiruko rugaragara mu bikorwa byo kuzamura igihugu biciye mu ndangadaciro z’umuco nyarwanda.

Yagize ati: “Turashimira Leta yacu yagaruye itorero ryatumye urubyiruko n’abakuze bongera kugira uruhare rugaragara mu gukorera Igihugu no kucyitangira igihe bibaye ngombwa.  By’umwihariko urubyiruko twahawe umwanya wo gukoresha neza imbaraga zacu twiyubakira urwatubyaye”.

Yongeyeho ati: “Tugomba kurangwa n’umuco wo gukunda igihugu no kurangwa n’ubutwari wongeye guhabwa intebe, kandi ntituzatezuka ku ndangagaciro nyarwanda zidufasha kuba abaturage bafitiye igihugu akamaro n’abagituye”.

Ibikorwa by’ingenzi byakozwe n’Inkomezabigwi harimo kubakira abatishoboye inzu n’ubwiherero, uturima tw’igikoni, kurwanya isuri, kwigisha ikoranabuhanga muri gahunda ya “Byikorere” ikaba ari gahunda y’Igihugu ishishikariza abaturage kwifashisha ikoranabuhanga rya telefoni bakabona serivisi bashaka batagombye kugana Irembo cyangwa aba agents batandukanye, ubukangurambaga bwo kwirinda inda zitateganyijwe n’ingeso mbi zirimo gufata ibiyobyabwenge.

Umuyobozi w’Akarere ka Ngororero Nkusi Christophe yibukije ko urubyiruko ari imbaraga z’igihugu kandi zubaka vuba.

Yagize ati: “Iyo harimo ubukorerabushake birushaho gutanga umusaruro utubutse kuko ahari ubushake byose birashoboka.

Turabashimira ibikorwa by’indashyikirwa mwagezeho ku rugerero biteza imbere Abanyarwanda by’umwihariko abatishoboye”.

Yongeye guhamagarira urubyiruko kugendera kure ababashuka bakabashora mu bikorwa bigayitse.

Ati: “Murangwe n’indangagaciro nyarwanda kuko ni byo bibereye u Rwanda. Mukomeze ubufatanye n’inzego z’ubuyobozi mu guhangana n’ibibazo bibangamiye imibereho myiza y’abaturage by’umwihariko imirire mibi n’igwingira”.

Umurenge wa Matyazo wegukanye seritifika y’ishimwe kuko Inkomezabigwi zawo zagize ubwitabire, ubwitange n’ibikorwa ku rwego rwo hejuru.

Ibirori byitabiriwe n’umuyobozi w’Akarere Nkusi Christophe ari kumwe n’Umuyobozi w’Akarere wungirije ushinzwe iterambere ry’imibereho myiza y’abaturage Mukunduhirwe Benjamine, abayobozi b’inzego z’umutekano zikorera mu Karere, abaturage n’Inkomezabigwi zishoje urugerero.

Uyu mwaka mu Karere ka Ngororero inkomezabigwi zishoje urugerero zigera ku 1 176. Ubwitabire bungana na 98%.

  • NYIRANEZA JUDITH
  • Ukuboza 19, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE