Ngororero: Ingo 24,078 zirahabwa amashanyarazi azatwara miliyari 27 Frw

  • Imvaho Nshya
  • Ugushyingo 13, 2023
  • Hashize amezi 6
Image

Mu Karere ka Ngororero hatangiye kubakwa umuyoboro w’amashanyarazi w’ibilometero 1,300.7 witezweho kugeza amashanyarazi ku ngo 24,078 zo mu Mirenge yose igize ako Karere.

Uyu mushinga wemejwe n’ubuyobozi bw’Akarere ka Ngororero, mu gihe hari hashize igihe kinini abaturage benshi basaba kwegerezwa amashanyarazi aho batuye, bakavanwa mu bwigunge ndetse bakabasha gukora imishinga ibateza imbere.

Mu kiganiro na Imvaho Nshya, Umuyobozi w’Akarere ka Ngororero Nkusi Christophe, yagize ati: “Hashize igihe abaturage bacu batagira amashanyarazi, bari mu icuraburindi, batagira umuriro ariko dufite umushinga uzagera mu Mirenge yacu yose uko ari 13, ukazaba ufite ibilometero 1,300.792 (1,300.7 km) ukazagera ku ngo zisaga  24,078 zitagiraga amashanyarazi”.

Akomeza avuga ko abaturage bashonje bahishiwe kuko bagiye kwegerezwa umuriro, abashishikariza gutangira gutekereza imishinga ibyaza umusaruro ayo mashanyarazi azaba afatiye ku muyoboro mugari w’Igihugu.

Abaturage bizeye inyungu ku mashyanyarazi barimo kwegerezwa

Nkundimana Pie utuye mu Murenge wa Bwira, yabwiye Imvaho Nshya ko bashimira Umukuru w’Igihugu ubagezaho ibikorwa remezo, akavuga ko bitari biboroheye kuko abana batabonaga uko basubira mu masomo.

Yagize ati: “Turashimira Umukuru w’Igihugu cyacu kuko ni we dukesha ibikorwa remezo birimo n’aya mashanyarazi, kuko ntabwo byoroheraga abana bacu gusubiramo amasomo kubera ko urumuri rw’amatoroshi rutabonesha neza. Ariko ubu twizeye ko bagiye kwiga neza kandi batsinde neza.”

Abaturage benshi babonye akazi mu iyubakwa ry’uwo muyoboro ugera mu Mirenge yose y’Akarere

Munyankindi Ildephonse wo mu Murenge wa Matyazo, avuga ko batekerezaga gukora imishinga y’imashini zisya amafu, ariko kubera ko bisaba umuriro ufite ingufu bakabireka kuko nta bundi buryo bakwifashisha ngo bashyire mu bikorwa uwo mushinga.

Yagize ati: “Kutagira umuriro byadukozeho kuko dufite ibitekerezo byinshi. Njyewe nanagize igitekerezo na bagenzi banjye ngo dukore umushinga wo gushyiraho icyuma gisya amasaka, ibigori, soya n’Imyumbati, ariko inzozi zacu zirangirira aho kuko nta muriro ufite ingufu twari kubona ngo twiteze imbere”.

Niyongira Jean Paul wo mu Murenge wa Ndaro avuga ko kutagira umuriro byatumaga abana biga batabasha gusubira mu masomo yabo kandi bagakora urugendo rurerure rw’isaha imwe cyangwa ebyiri  bajya kwiyogoshesha.

Yagize ati: “Uyu muriro bagiye kuduha turawishimiye uzadufasha kuko twajyaga dukora urugendo rurerure rurenga isaha imwe n’igice cyangwa amasaha 2 tujya gushaka aho twogoshesha abana bacu natwe ubwacu. Ariko ubu tugiye kubona iyi serivisi twajyaga gushaka ahandi turenze imisozi cyangwa tukarema amasoko tugasabirayo serivisi.”

Meya Nkusi avuga ko gahunda ya Leta yatangajwe n’Umukuru w’Igihugu Paul Kagame ari iyo kugeza ku baturage  amashanyarazi  100% mu 2024.

Yashimangiye ko bafite icyizere ko iyo ntego ikubiye muri Gahunda ya Guverinoma y’imyaka 7 yo kwihutisha iterambere (NST1) izagerwaho nta kabuza, cyane ko uwo muyoboro w’amashanyarazi uzunganirwa no gukwirakwiza imirasire y’izuba mu bice bizagorana kugezamo amashanyarazi afatiye ku muyoboro mugari w’Igihugu.

Kugeza ubu aka Karere gafite abagera kuri 55.7 % bacana umuriro w’amashanyarazi, harimo abagera kuri 40.5% bacanira ku muyoboro mugari (On-Grid) naho abagera kuri 15.2% bagacana bakoresheje ingufu z’imirasire y’izuba n’izindi ngufu (Off-Grid).

Muri rusange, aka Karere gafite ingo zigeze ku 92,623 ariko izisanzwe zifite amashanyarazi zigera ku ngo 37,048 zigiye kwiyongeraho izigiye guhabwa umuriro zisaga 24,000 zikarenga ibihumbi 60.

AKIMANA JEAN DE DIEU

  • Imvaho Nshya
  • Ugushyingo 13, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE