Ngororero:  Imisoro y’asaga miliyari 3 Frw yabahinduriye ubuzima

  • Imvaho Nshya
  • Nzeri 21, 2023
  • Hashize amezi 8
Image

Ubuyobozi n’abaturage bo mu Karere ka Ngororero bahamya ko imisoro ingana n’amafaranga y’u Rwanda 3,124,085,470 yagize uruhare mu iterambere ry’abaturage b’ako Karere, kubera ko yakoreshejwe mu bikorwa remezo by’iterambere.

Byagarutsweho ubwo Itsinda ry’abakozi baturutse mu Kigo cy’Imisoro n’Amahoro (RRA) riyobowe na Nsabiyaremye Jean Bosco bari kumwe na Nyamaswa Emmanuel, Umuyobozi Ushinzwe Imishinga y’Iterambere ry’Uturere mu Ntara y’Uburengerazuba ryasuraga Akarere ka Ngororero, haganirwa ku bikorwa by’ingenzi byagezweho muri ako Karere mu mwaka w’ingengo y’Imari wa 2022/2023 biturutse mu misoro itangwa n’abaturage.

Umuyobozi w’Akarere Nkusi Christophe, yagaragaje byinshi byakozwe byagize uruhare mu guhindura imibereho myiza y’abaturage biturutse muri ya misoro itangwa n’abaturarwanda.

Yagize ati: “Muri byo harimo imihanda n’ibiraro byo mu kirere, amashuri, amaterasi y’indinganire, inzu z’abacitse ku icumu rya Jenoside yakorewe Abatutsi mu 1994, inka zatanzwe muri Gahunda ya Girinka, imiyoboro y’amazi meza, inzu z’’abatishoboye, byose bifite agaciro k’amafaranga y’u Rwanda 3,124,085,470”.

Hasuwe ibikorwa byo mu Mirenge ya Muhanda, Kabaya na Ngororero, hari hagamijwe gukomeza kuzamura ubukangurambaga bwo gutanga umusoro ku bushake ndetse no kurushaho gusobanukirwa akamaro kawo mu iterambere ry’Igihugu.

Abagenerwabikorwa bashimiye RRA uburyo imisoro batanga ibagarukira mu bikorwa by’iterambere bihindura imibereho yabo.

Nzabandeba Jean Bosco wo mu Mudugudu wa Kimiramba, Akagari ka Nyenyeri mu Murenge wa Kabaya, yavuze ko kuba batanga imisoro neza byatumye hari amafaranga yabagarukiye RRA yohereje mu Karere, bakorerwa amaterasi y’indinganire yatumye baca ukubiri n’isuri.

Ati: “Ubu turahinga tukeza kuko ifumbire dushyira mu butaka idashobora gutwarwa n’isuri, bityo tukabona umusaruro uduhagije tugasagurira n’amasoko”.

Iri tsinda ryasuye bimwe mu bikorwa byo mu Mirenge ya Muhanda, Kabaya na Ngororero habaho ibiganiro n’abagenerwabikorwa batandukanye ndetse hanakorwa ubukangurambaga bwo gusora ku bushake.

Uwari uyoboye iryo tsinda rya RRA Nsabiyaremye Jean Bosco, yavuze ko Ikigo cy’Imisoro n’Amahoro kitazahwema kuzamura imibereho y’abagenerwabikorwa.

Ati: “Mbijeje ko RRA izakomeza imikoranire myiza n’Akarere ka Ngororero mu kuzamura imibereho myiza y’abaturage binyuze mu misoro itangwa n’Abanyarwanda”.

NYIRANEZA JUDITH

  • Imvaho Nshya
  • Nzeri 21, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE