Ngororero: Imiryango 4575 yegerejwe mazi meza isezera ibinamba

  • Imvaho Nshya
  • Ugushyingo 13, 2023
  • Hashize amezi 6
Image

Imiryango 4575 yo mu Karere ka Ngororero yatangiye kuvoma amazi meza isezera kuvoma amazi y’ibinamba bamwe mu bayigize bemeza ko yabateraga indwara zikomoka ku mwanda harimo n’inzoka zo mu nda.

Bamwe mu babarizwa muri iyi miryango ituye mu Mirenge itandukanye, bavuganye na Imvaho Nshya barashima abafatanyabikorwa bafatanyije n’Akarere ka Ngororero mu kubagezaho amazi meza bamwe banatangiye kuvoma.

Mukamwiza Dancille utuye mu Murenge wa Kageyo avuga ko nta mezi atatu yashiraga atagiye kwa muganga kwivuza no kuvuza abana, kandi akemeza ko nyuma yuko bahawe amazi kuri uyu muyoboro batakirwaragurika.

Yagize ati: “Njyewe mu rugo rwanjye ntitwashoboraga kumara amezi atatu tutarwaye ariko aya mazi twatangiye kuvoma yatangiye kuduhindurira ubuzima kuko uburwayi twahoranaga bwaragabanyutse kuko twabonye ko twabuterwaga no kunywa no gukoresha amazi mabi.”

Musangwa Jean de la Paix wo mu Murenge wa Muhanda, avuga ko amazi barimo kuvoma azabarinda indwara zikomoka ku mwanda bahoranaga, akongeraho ko bashimira ubuyobozi bwabarebeye kure bukazana uyu mushinga n’abafatanyabikorwa.

Yagize ati:”Twebwe twishimira ibikorwa by’uyu mushinga kuko twabonye ibyiza byawo. Mbere yuko batugezaho aya mazi twarwazaga indwara zikomoka ku mwanda ariko ubuyobozi bwabonye ko tugowe butuzanira abafatanyabikorwa batwegerewa amazi yatugabanyirije imihangayiko.”

Abakivoma ibinamba baracyarwaza indwara zituruka ku mwanda

Rutayisire Emmanuel utuye mu Murenge wa Bwira, avuga ko hashize igihe bakoresha amazi mabi ku buryo atuma bahora bavuza abana ndetse n’abakuru bahora ku miti y’inzoka.

Yagize ati: “Nta mazi meza tugira bigatuma dukoresha amazi mabi akatwanduriza abana bacu natwe abakuru indwara zikomoka ku mwanda harimo n’indwara z’inzoka zituma tudakora imirimo yacu twisanzuye”.

Habineza Laurent utuye mu Murenge wa Muhanda, yabwiye Imvaho Nshya ko uyu mushinga numara kuzura uzabafasha kwibagirwa indwara zikomoka ku mwanda zabazengereje bakazabasha kwikorera bagatera imbere.

Yagize ati: “Uyu mushinga w’amazi tuwitezeho kuzadufasha kwibagirwa indwara zikomoka ku mwanda kandi tuzanywa amazi meza, kuko ikibazo bikomeye dufite ni ukunywa no gukoresha amazi twadashye mu mibande”.

Umuyobozi w’Akarere ka Ngororero Nkusi Christophe, avuga ko bishimiye ko uyu mushinga ugiye gufasha abatuge kubona amazi meza bagasezera ku mazi mabi badahaga mu mibande y’imisozi ahatari amariba yo mu mabanga y’imisozi akenshi usanga abandi badaha aho bagomeye kubera ko nta mariba bafite.

Akomeza avuga ko uyu muyoboro urimo kubakwa ufite ibilometero 168.7 (168,7 km), ukazagera ku ngo 4575 kandi ukazagera ku mashuri abanza n’ayisumbuye 7, amavuriro mato 2  kandi nk’Imirenge ya Muhanda na Kageyo bo batangiye kuvoma.

Yavuze ko  bafite icyizere cyo kwesa umuhigo wo kugeza amazi meza ku baturage bose bitarenze mu mwaka utaha nk’uko bikubiye muri gahunda ya Guverinoma y’imyaka 7 yo kwihutisha iterambere (NST1).

Ati: “Tubona gahuda ya Nyakubahwa Perezida wa Repuburika Paul Kagame tuzayigeraho kuko iyo urebye nkubu inzego turimo gukorana bose bahagurukiye ikibazo cy’amazi meza dufatanyije n’Ikigo cy’Isuku n’isukura (Wasac) kirimo  kutwubakira umuyoboro mugari ufite agaciro ka miliyari 7.5 z’amafaranga y’u Rwanda uzakwiza amazi hafi mu Mirenge yose.”

Yanavuze kandi ko barimo gufatanya n’Umuryango Water for People uzubaka imiyoboro ifite agaciro ka miliyoni 500 z’amafaranga y’u Rwanda, ndetse Umuryango Mpuzamahanga wa World Vision urimo gushyira mu bikorwa umushinga wa miliyoni zisaga 300 z’amafaranga y’u Rwanda.

Akarere ka Ngororero kageze kuri 68.8% mu kwegereza abaturage amazi meza kandi biteganyijwe ko mu muri Gahunda ya NST1, abaturage bo mu mujyi nibura batarenga metero 200 bajya gushaka amazi naho mu cyaro bakaba batarenga metero 500 bajya kuvoma amazi meza.

Biteganyijwe ko uyu muyoboro ufite ibilometero 168.7 uzuzura muri Gashyantare 2024 utwaye asaga miliyari  1 na miliyoni zisaga 435 z’amafaranga y’u Rwanda.  

AKIMANA JEAN DE DIEU

  • Imvaho Nshya
  • Ugushyingo 13, 2023
  • Hashize amezi 6
TANGA IGITEKEREZO
Murindabigwi vincent says:
Ugushyingo 13, 2023 at 7:38 am

Dukunda ubuvugizi bwanyu cyane ni murindabigwi vincent tubakurikiranye turi ngororero umurenge ngororero akagali mugano muvuze kukarere ka ngororero bituma nanjye mbasangiza kukibazo dufite mukarere kangororero hashize imyaka 2 baduhaye amazi kd rwose byari byarahinduye byinshi kuko yaje akenewe kbsa kuko nicyo kibazo twari dufite ariko byabindi bavuga byogudakurikirana ibikorwa remezo bakabikora bagahita baterera iyo nukuri nikibazo kuba reta yatakaje amafaranga menshi arik nibimare kabiri nkubu ayo mazi akora mumirenge 3 kd harimo ibigo byamashuri segondaire 4 Primary 4 ibigo nderabuzima 2 poste de sante 3 mbese birababaje cyane rwose mwakora ubuvuzi ayo mazi yavaga mukakare ka muhanga akambuka nyabarongo akerekeza mumurenge wangororero nu sovu ikibazo cyahabaye ni nyabarongo yuzuye itwara itiyo icamo kabiri none kugeza nubu akarere kananiwe kuba asana uwo muyoboro rwose mwatuvugira kuko abaturajye turahangay itse kbsa abana barya kwishuri nagukaraba kubera ibura ryamazi rwose umubye nukubyara akabona amazi bagiye kuvoma hafi yanyabarongo rwose biragoranye umwana nukurya kujuru yitwaje agacupa kamazi nayo yavomwe mubishanga

Murindabigwi vincent says:
Ugushyingo 13, 2023 at 7:43 am

Nkibi rero nabyo rwose nigihe gito byakangirikaho akanu gato hakabura gikurikiranyw rwose mudufashe mudukorere ubu vugizi ayamazi akorwo kuko yatwaye amafaranga menshi akorwa sinibaza ukunu adasanywa kd numva bari gukora indi miyoboro batabajye kurebako niyambere ikora mudukore ubuvugizi kuko turababaye cyane murakoze cyane

Andika igitekerezo

AMATEGEKO AGENGA IYANDIKA RY'IGITEKEREZO CYAWE