Ngororero: Imihanda yangiritse ituma baheka abarwayi mu ngobyi

  • Imvaho Nshya
  • Ugushyingo 11, 2023
  • Hashize amezi 4
Image

Abatuye mu Murenge wa Ndaro n’uwa Bwira barasaba ko umuhanda uva mu gasanteri ka Gitega muri Bwira wakorwa kuko utoroshya ingendo bigatuma abarwayi bahekwa mu ngobyi za Kinyarwanda.

Mu kiganiro n’Imvaho Nshya bavuga ko uyu muhanda wubatswe wagabanya ikiguzi cy’urugendo batanga bagiye kwaka serivisi zitandukanye kwa muganga ndetse bakanemeza ko ibyo bahaha bibageraho igiciro cyazamutse.

Munyantore Silas avuga ko iyo mihanda imaze igihe basaba ko yatunganywa.

Yagize ati: “Hano muri iki gice dutuyemo hari imihanda mibi cyane twagiye dusaba ubuyobozi kuyidukorera kuko nawe urabibona kuko imodoka ntishobora kuhanyura byoroshye, usanga zaguye mu mateme bigatuma rero duheka mu ngobyi abarwaye kugira ngo tubageze ku bitaro bya Muhororo”.

Bamurange Jeanne we avuga ko iyangirika ry’uwo muhanda ribangamiye ubuhahirane.

Ati: “Nawe urabona iyi mihanda yoroshye kuyicamo ukoresheje amasaha angahe kugira ngo ugere hano noneho kujya i Muhororo bidusaba kugenda n’amaguru urugendo rw’amasaha 3, mu gihe kuri moto bidusaba isaha 1 n’igice ariko irahenda kuko ntawagutwarira munsi y’ihumbi 4 badufashije bawubaka byadufasha”.

Ayirwanda Gerard avuga ko babangamiwe n’imihanda ihuza baturage b’Imirenge ya Ndaro na Bwira, Gatumba na Ngororero kuko ntabwo yoroshya ubuhahirane n’ibicuruzwa bitugeraho bihenze kuko nta modoka yarangura ngo igaruke, irara nzira.

Yagize ati: “Uyu muhanda uratubangamiye kuko uratugoye cyane kuko Imirenge yacu kugira ngo ihahirane birakaze nk’ubu nta modoka yazana ibicuruzwa hano mu munsi umwe, noneho iyo imvura iguye ntishobora kugenda kandi ibi bituma ibiciro abacuruzi babyongera uko bishakiye ariko ukozwe waturuhura cyane rwose”.

Umuyobozi w’Akarere ka Ngororero, Nkusi Christophe atangaza ko umuhanda uhuza imirenge ya Ndaro na Bwira wubatswe wakoroshya imigenderanire.

Yagize ati: “Uyu muhanda ukozwe wakoroshya imigenderanire hagati y’abaturage b’Imirenge ya Ndaro na Bwira kandi ugafasha abacuruzi kugeza ibicuruzwa muri santeri z’ubucuruzi zitandukanye by’umwihariko abacururiza muri santeri ya Gashubi kandi wanafasha abaturage kujyana umusaruro beza ku yandi masoko.

Akomeza avuga ko wanafasha korohereza abasura Pariki ya Gishwati Mukura kandi ugafasha abivuriza ku kigo nderabuzima cya Gashubi bakoherezwa ku bitaro bya Muhororo kuko biragoye cyane.

Yongeyeho ko uwo muhanda ureshya n’ibilometero 14 wakorewe inyigo igaragaza ko watwara asaga 1.500.000.000 z’amafaranga y’u Rwanda.

AKIMANA JEAN DE DIEU

  • Imvaho Nshya
  • Ugushyingo 11, 2023
  • Hashize amezi 4
TANGA IGITEKEREZO
Nteziryayo says:
Ugushyingo 15, 2023 at 7:37 am

Nibyo kubijyanye nu yumuhanda kuko byemejwe ko ukorwa bagerageza kuwukomeza kuko amazi yimvura atabasha kuwica awucukura natwe abaturage bomumu RENGE WA SOVU byatworohera mungendo tumunara tunava munara Tukongera tugasaba ITEME JYASHYIRWA KUMUGEZI WASATINYI KUGIRANGO ABANYESHURI BAJYE BAMBUKA BAJE KWIGA BIRABAGORA UYO UYUMUGEZI WUZUYE MUGIHE CYIMVURA NIKINDIGIHE ICYOKIGO NI GS MUBANO MUMUDUGUDU WA RUGANDA UHURA NU WA GASASA IMBOGAMIZI ZANDI MATEME ARIMO NINKANGU TUKABA DUTUYE SOVU GUHANA URUBIBI NA BWIRA AMAKURU NUBUHAMYA MWAMBAZA 0785944697 MURAKOZE

Andika igitekerezo

AMATEGEKO AGENGA IYANDIKA RY'IGITEKEREZO CYAWE