Ngororero: Ikigo cy’i Nyange kigiye kwigishirizwamo umuco wo kurwanya ivangura

  • NTAWITONDA JEAN CLAUDE
  • Werurwe 8, 2022
  • Hashize imyaka 2
Image

Iyo uvuze ishuri ry’i Nyange riherereye mu karere ka Ngororero mu ntara y’Iburengerazuba, uhita wumva igitero cy’abacengezi cyagabwe ku banyeshuri bigaga kuri iri shuri maze bakanga kwitandukanya.

Iki gitero cyabaye ahagana saa mbiri z’ijoro rya tariki 18 Werurwe 1997.

Ni bwo abanyeshuri bo mwaka wa Gatandatu n’uwa Gatanu mu Ishuri ryisumbuye ry’i Nyange banze kwitandukanya hagendewe ku byitwaga amoko, babisabwe n’abacengezi. 

Urwego rushinzwe Intwari z’Igihugu, Imidari n’Impeta by’ishimwe (CHENO), rwatangaje ko ishuri ry’i Nyange ari igicumbi cy’intwari ‘Imena’ rikaba n’inkomoko ya Ndi Umunyarwanda.

CHENO kandi itangaza ko kuri iri shuri hagiye kugirwa ikigo kigisha kurwanya ivangura iryo ari ryo ryose.

Byagarutsweho n’Umukuru w’Urwego wungirije Godeliève Mukasarasi ku wa Mbere tariki 07 Werurwe 2022, ku Ishuri ryisumbuye ry’i Nyange, ubwo hasobanurwaga no kureba aho ibikorwa byo gutunganya Igicumbi cy’Intwari z’Imena bigeze.

Ni ibikorwa CHENO ifashwamo na ‘Jumelage’ Rhenanie Palatinat/Rwanda.

Mukasarasi avuga ko mu rwego rw’ubumwe n’ubwiyunge, iyi ari gahunda bashyizeho kugira ngo buri muntu wese yiyumve ko ari Umunyarwanda.

Mu kuvugurura i Nyange, Mukasarasi avuga ko hari amashuri yari asakajwe n’amategura mbere y’uko iki kigo giterwa n’abacengezi mu 1997.

Habayeho kuvugurura amashuri y’umwaka wa Gatanu n’uwa Gatandatu ari na ho abacengezi baje kurasira abanyeshuri.

Ashimangira ikigo cy’i Nyange kizagirwa ikigo abantu baza kwigiramo (Centre Educatif), nk’urubyiruko rw’Abanyarwanda cyangwa n’urwo mu mahanga.

Yagize ati “[…] bakaza kwiga umuco wo kumva ko kurwanya ivangura ari intego bityo urubyiruko rugakura rwumva rufite umutima wo gukunda Igihugu, kugikorera no kutavangura”.

Ashimira inkunga Jumelage yateye CHENO by’umwihariko igihugu cy’u Rwanda.

Ati: “Dushimira inkunga baduteye kugira ngo igicumbi cy’Ubunyarwanda kibe cyagira igikorwa cyihariye kigaragaza intwari ziri mu cyiciro cy’Intwari z’Imena zashoboye kwanga kwitandukanya mu gihe abacengezi bateraga kino kigo.

Hasobanuwe amateka y’abanyeshuri b’i Nyange ubwo baterwaga n’Abacengezi muri Werurwe 1997

Abacengezi bababwiraga ngo Abatutsi bajye ukwabo, Abahutu ukwabo ariko bose bagasubiriza icyarimwe ngo nta Mututsi, twese turi Abanyarwanda, ari naho du komora iyi gahunda ya Ndi Umunyarwanda”.

Ntsinzi Rosemary wiga mu mwaka wa Gatandatu w’amashuri yisumbuye ku ishuri ry’i Nyange, avuga ko kuri iki kigo habereyeho ibikorwa bigaragaza amateka y’abana bagaragaje ubutwari bwo kwanga kwitandukanya.

Agira ati: “Ni iby’agaciro kuba barahatatse kuko ni ikimenyetso kigaragaza ko icya mbere bahabwa agaciro, icya kabiri ni amateka agomba gusigasirwa kugira ngo n’abazaza hano bose baje kuhiga ko bagomba kwigira ku mateka y’abana b’ahangaha.

… kuko nyuma yo kuba baranze kwitandukanya mu moko babasabye kwitandukanyamo, ni ivangura muri rusange kandi na byo biri muri iriya ngoro ndangamateka (Musée) itugaragariza yuko ivangura iryo ari ryo ryose icyo ryaba rishingiyeho tugomba kuryirinda”.

Avuga ko kwiga kuri iki kigo hari icyo bimufasha kuko yerekwa ishuri byabereyemo, bityo akabiha agaciro agereranyije n’undi muntu ubyumvira kuri radio n’ibidi bitangazamakuru.

Ati: “Binyubakamo ikintu cyo gukunda Igihugu, gusigasira amateka ndetse no kugira umutima wo kumva ko nta vangura rikwiye kubaho”.

Norbert Neuser, Perezida wa Jumelage Rhenanie mu Rwanda, yishimira ko iyi ari intambwe nziza itewe yo kujya hahora hibukwa intwari z’i Nyange.

Ati: “Si ugufasha mu bikorwa byo kugira ngo bajye bibukwa ahubwo ni no kubatekerezaho mu gihe kizaza kugira ngo bijye byigisha abanyeshuri no kuba bitazongera kubaho”.

Mu butumwa bwatanzwe n’uwari uhagarariye Ambasaderi w’u Budage mu Rwanda akaba anamwungirije Peter Primus, yavuze ko buri wese akwiye guharanira kurwanya amacakubiri ayo ari yo yose.

Ku ishuri ryisumbuye rya Nyange, abanyeshuri bavuga ko batewe ishema no kwigira ku gicumbi cy’ubutwari.  Usibye ubwenge bahigira umuco w’ubutwari bakurana, bawukuramo imbaraga zizabafasha kugirira akamaro umuryango mugari.

Kuri iri shuri hari ibyumba bitatu byatunganyijwemo inzu y’amateka ikaba ibitse amakuru n’ibimenyetso byo mu bihe bitandukanye, haba ku Rwanda na Nyange by’umwihariko. 

Abanyeshuri bavuga ko ari iby’agaciro kuko bizarinda ko aya amateka yazima nyamara akenewe n’Abanyarwanda, cyangwa abandi bashaka kugira icyo bigira ku butwari bwaranze abana b’i Nyange.

  • NTAWITONDA JEAN CLAUDE
  • Werurwe 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE