Ngororero: I Matyazo na Hindiro barasaba Sitasiyo za Polisi na RIB

  • Imvaho Nshya
  • Nzeri 22, 2023
  • Hashize amezi 8
Image

Bamwe mu baturage batuye mu Mirenge ya Hindiro na Matyazo yo mu Karere ka Ngororero barasaba ko bakwegerezwa serivisi za Polisi n’iz’Urwego rw’Ubugenzacyaha (RIB) aho batuye.

Bavuga ko iyo habaye urugomo bisaba igihe kirekire kugira ngo batabarwe ndetse ngo uwahohotewe bimusaba kujya gusaba serivisi kuri Sitasiyo ya Kabaya cyangwa kuri Sitasiyo ya Ngororero biherereye kure cyane y’aho batuye kandi ari no mu gace k’imisozi.

Mu kiganiro n’Imvaho Nshya bavuga ko mu gihe bizakomeza gutya bishobora gutuma abaturage bihanira mu gihe habaye urugomo.

Mugiraneza Diogene yavuze ko bigize kugira Sitasiyo ya Polisi mu Gatega ariko yaje kuhavanwa, ariko kubera urugomo rukunze kuba aha bifuza ko bagarurirwa abapolisi na RIB kuko iyo badahari hari abigira ibyigomeke.

Yagize ati: “Hano twigeze kugira Sitasiyo ya Polisi ariko ni kera cyane kuko hari mu bihe by’icyorezo cya COVID-19 yaranadufashaga cyane ariko nyuma yarahakuwe kuko yakodeshaga inzu y’umuturage, kuva icyo gihe yarahakuwe ndetse hano hakunze kuba urugomo bityo bayigaruye yadufasha gufata ababa bigize ibyigomeke bakabangamira ituze ry’abaturage”.

Murangwa Protais wo mu Kagali ka Gitega ho mu Murenge wa Matyazo avuga ko iyi Mirenge yombi yegeranye inakunze kugira urugomo kubera inzoga abantu banywa ariko rwose Polisi ikwiye kutwegera ntimere nk’iyaduhunze kuko ukoze icyaha abona uko acika kandi aba ashobora kugaruka akagirira nabi uwo bagiranye ikibazo.

Mugiraneza Diogène wemeza ko urugomo ruba muri iki Mirenge bakwiye kubaha Sitasiyo ya Polisi

Yagize ati: “Iyi Mirenge yacu nk’uko muyibona iregeranye kandi ikunze kugaragaramo urugomo kubera inzoga abantu banywa cyane kandi iyo batumvikanye ku kintu runaka bahita barwana, gutabarwa biratinda bigatuma uwahemukiwe atabona ubutabera kuko uwahemutse ahita acika ndets bishobora gutuma yanagaruka akongera akakugirira nabi kubera uburakari no kumuhiga”.

Uwimana Isabelle wo mu Murenge wa Hindiro, mu Kagari ka Gatega, na we yavuze ko bakeneye Sitasiyo ya Polisi na RIB.

Ati: “Turasaba kwegerezwa Sitasiyo za RIB na Polisi kuko iyo habaye urugomo ntabwo duhita dutabarwa kubera ko abagombye kudutabara bava kure kuri Sitasiyo ya Polisi yo ku Kabaya cyangwa bakava mu Ngororero kandi bigasaba amasaha nibura atatu, nkabibonamo ko hari igihe byakomeza gutya abaturage bashobora kwihanira inkomere zikaba nyinshi”.

Umuyobozi w’Akarere ka Ngororero wungirije Ushinzwe Iterambere ry’Ubukungu, Uwihoreye Patrick avuga ko iki kibazo kizwi ariko barimo kugishakira ibisubizo.

Yagize ati: “Ni byo iki kibazo kirazwi dusanzwe dufite Sitasiyo ya Ngororero na Kabaya ariko twagaragaje ko hakwiye gushyirwaho izindi kandi ibiganiro byacu n’urwego rwa Polisi bigeze kure kugira ngo iki kibazo gihabwe umurongo hanagamijwe gufasha abaturage kugabanyirizwa ingendo ndetse harimo no kwirinda ko umuntu yakora icyaha agacika ubutabera”.

Yongeyeho ko abaturage bakwiye kugira umutuzo mu gihe batarabasha guhabwa inzego za Polisi na RIB zajya zibatabara mu gihe habaye ikibazo, bityo anabasaba ko bajya bitabaza Inzego z’ibanze zikabafasha mu bibazo bagiranye hagati yabo.

Umuvugizi wa Polisi ACP Rutikanga Boniface, yemereye Imvaho Nshya ko ikibazo bafite gifite agaciro kandi Polisi y’u Rwanda n’izindi Nzego z’umutekano bafite u nshingano zo kwegera abaturage kurushaho.

Yagize ati: “Natwe twifuza ko serivisi zacu zibageraho aho batuye, turacyafite ikibazo cy’amikoro make kugira ngo tubashe kugira ibikorwa remezo kandi dufite gahunda yo kubaka urwego rwa Polisi kugera ku Kagari kandi ntabwo twifuza ko abaturage baza kudushaka ngo tubahe serivisi tugomba kubegera”.

Yibukije abaturage bakwiye kwirindira umutekano kandi mu gihe bagize ikibazo bakitabaza izindi nzego zibegereye mu gihe abapolisi batarabageraho ariko kandi kwicungira umutekano na bo birabareba bakomeza kwirinda urugomo n’ibindi byatuma inzego z’umutekano n’iz’ubugenzacyaha zibakurikirana.

Hari kandi abandi bavuga ko hari indi Mirenge ya Ndaro na Bwira na yo ikwiye kwegerezwa ibi bikorwa by’izo nzego kuko usanga abaturage bahohotewe bakora ingendo ndende bajya gusaba ubutabera rimwe na rimwe zibasaba amasaha atatu kuzamura bajya gushaka uwabafasha nk’urwego rwa Polisi y’Igihugu n’urwa RIB.

Umuyobozi w’Akarere ka Ngororero wungirije ushinzwe iterambere ry’ubukungu Uwihoreye Patrick, wemeza ko ibiganiro bigeze kure hashakwa ibisubizo kugira ngo abaturage begerezwe Sitasito za Polisi na RIB

AKIMANA JEAN DE DIEU

  • Imvaho Nshya
  • Nzeri 22, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE