Ngororero: Hamenwe litiro 9 100 z’inzoga zitujuje ubuziranenge, hanafungwa inganda 2

Mu Karere ka Ngororero mu Mirenge ya Kabaya na Gatumba hamenwe inzoga zitujuje ubuziranenge zakusanyirijwe kuri site y’Umurenge wa Kabaya zingana na litiro 9 100, hafungwa inganda 2 ndetse n’abakekwaho kuzicuruza 27.

Ni igikorwa cyabaye kuri uyu wa Gatatu tariki ya 26 Kanama 2026, ahagaragajwe izo nzoga zitujuje ubuziranenge zirimo inzoga gakondo zose zamenwe zingana na litiro 6 363 n’izari mu bubiko zakorewe mu nganda uyu munsi zingana na litiro 2 737.

Zimwe muri izo nzoga zamenwe harimo ibyuma bingana na litiro 1 093, izitwa Huguka, Gumamo, Umurava zo mu Murenge wa Gatumba

Naho mu Murenge wa Kabaya hafashwe inzoga zitujuje ubuziranenge zirimo ibyuma bingana na litiro 1 608, litiro 1 129 zigizwe n’inzoga zitwa Huguka, Gumamo n’Umurava: byose hamwe.

Ubuyobozi bw’Akarere ka Ngororero bwasobanuriye abari kuri site y’ahamenwe izo nzoga zitujuje ubuziranenge ububi bwazo, bunabasaba gukomeza gukangurira ababa bakizifite kuzitanga zikamenwa kuko zangiza ubuzima, zikabangamira imibanire mu muryango.

Nyuma yo gusobanurirwa ububi bwazo, Gatera yagize ati: “Zakururaga umutekano muke koko iyo bazinywaga byakuraraga urugomo, amakimbirane mu ngo, ubuharike, ubujura, gusesagura umutungo, kutamenya kwizigamira, kwangiza ubuzima n’ibindi. Kuba zimenwe turiruhukije, Leta irakoze itureberea kandi ikaduhitiramo ibyiza.”

Mutabazi we yavuze ko izo nzoga ari mbi, kuko uwo zabase aba atagishoboye gukora. Ati: “Izo nzoga uwo zabase ntakora kuko usanga zica intege, bityo ubukungu n’iterambere ry’umuryango bikahazaharira.”

Umuyobozi w’Akarere ka Ngororero, Nkusi Christophe ari kumwe n’Umuyobozi wa Polisi mu Karere ka Ngororero SP Jean de Dieu Nsengayire, yayoboye igikorwa.

Nkusi yagaragaje ububi bw’izo nzoga, ati: “Turabasaba ubufatanye mu kurwanya inzoga zitujuje ubuziranenge kuko zangiza ubuzima bwacu ariko zikanatera n’ibindi bibazo bitandukanye yaba ari ubusinzi, kurwana abantu bagatemana, ubujura n’izindi ngeso mbi zikomoka ku businzi. Twese dukomeze gufatanya ngo izi nzoga tuzice burundu, bityo tugire umutekano, ubuzima bwiza n’imibanire yacu igende neza mu muryango.”

Yakomeje agaragaza ingaruka biteza iyo abantu bishoye mu nzoga zitujuje ubuziranenge.

Ati: “Twese tuzi ko umuryango urangwamo ubusinzi ni wa muryango n’ubusinzi uba udashoboye kandi utiteza imbere, amafaranga abonetse akajyanwa mu nzoga aho gukoreshwa mu guteza imbere umuryango ari mu bukungu ndetse no mu mibereho myiza.”

Yongeyeho ati: “Kumena izi nzoga ni ukugira ngo mwe muhari muhavane ubutumwa bwo gushishikariza n’abandi batari bazigaragaza kugira ngo bazizane nazo zivanwe mu baturage ze kuguma mu baturage ngo zibangirize ubuzima.”

Umuyobozi w’Akarere ka Ngororero Nkusi, yavuze ko ari intangiriro, ariko ko ubukangurambaga bugikomeje, asaba abaturage gukomeza guhangana n’izo nzoga zitujuje ubuziranenge, bagatanga amakuru kugira ngo zimenwe, kugira ngo harangwe umuryango utuje, imiryango ibanye neza, urubyiruko rutarangwa n’ubusinzi bityo hagerwe ku  iterambere rirambye.