Ngororero: Batangiye kubakirwa isoko rigezweho rya miliyoni 300 Frw

  • Imvaho Nshya
  • Ugushyingo 12, 2023
  • Hashize amezi 6
Image

Amafaranga ava mu bukerarugendo akomeje kugira uruhare mu iterambere ry’abaturage baturiye ibyiza nyaburanga byinjiriza Igihugu amadovize, nka Pariki y’Igihugu ya Gishwati-Mukura igiye gutuma abaturage bo mu Murenge wa Bwira, Akarere ka Ngororero bubakirwa Isoko rya Kijyambere.

Isoko rya Gashubi ryitezweho kuzura ritwaye amafaranga y’u Rwanda arenga miliyoni 300, yatanzwe n’Urwego rw’Igihugu rw’Iterambere (RDB) muri gahunda yo gusaranganya 10% by’amadovize yinjizwa n’ubukerarugendo mu bikorwa by’iterambere ry’abaturiye Pariki y’Igihugu ya Gishwati-Mukura.

Aba baturage bishimiye icyo gikorwa remezo gishya cyatangiye kubakwa, kuko ari bo banatanze igitekerezo cyo kubakirwa Isoko rya Kijyambere mu ikusanyabitekerezo rishingirwaho mu igenamigambi ry’Akarere.  

Mukakarangwa Gaudance, umwe muri abo baturage barema kenshi isoko rya Bwira, yabwiye Imvaho Nshya ko iryo soko baryitezeho kubakiza igihembo baterwaga no gucururiza ahadasakaye, bigatuma ibicuruzwa byinshi binyagirwa cyangwa bikangizwa n’izuba.

Yagize ati: “Ndi umucuruzi umaze  imyaka 10 nkorera muri iri soko ariko twagiye dukorana inama n’ubuyobozi tukabutuma ku buyobozi bukuru ko badufashije batwubakira isoko ntidukomeze gukorera mu gihombo kubera imvura ikunze kugwa ahangaha imyenda n’imyaka ducuriza bikangirika none dore igice cya mbere kigiye kurangira.”

Hitimana Noel avuga ko bagiye batanga ibitecyerezo by’ibikorwa babona byihutira byakorwa harimo iri soko n’umuhanda ariko kuba isoko ribanje gukora n’ikimenyetso cyuko n’umuhanda uzakorwa vuba.

Yagize ati: “Mu bihe bitandukanye twagiye dutanga ibitekerezo ku bikorwa rusange byatwegereza harimo amashuri, umuriro, amazi n’imibanda ariko bakatwizeza ko bizakorwa none dore birakozwe. Isoko ryatangiye kubakwa dufite ivuriro hafi yacu twizeye ko n’imihanda itarakowa na yo izakorwa vuba ubuhahirane bugashoboka kuko hari aho bitemera”

Ndahimana Telesphore avuga ko isoko rigezweho rya Gashubi nirimara kuzura n’imihanda igatunganywa bazarushaho kubona amafaranga menshi.

Ati: “Hano urabona ko duhinga tukeza. Iri soko kuba ritubatse bituma umusaruro wacu utabona abaguzi benshi kuko hano tweza ibirayi, ibishyimbo n’ibigori ariko abaguzi bacu ni abaturage bacu nta modoka yava Kigali ngo ize gutwara umusaruro hano kuko ntabwo hanagendeka.”

Umuyobozi w’Akarere ka Ngororero, Nkusi Christophe, yabwiye Imvaho Nshya ko icyatumye bubaka iri soko cyari igisubizo cyo kubafasha kujya bacururiza ahantu heza hasakaye kandi hatangiza ibicuruzwa byabo ngo bagwe mu bihombo bitari ngombwa.  

Yagize ati: “Tujya gutekereza uyu mushinga twari twamaze kubona ko hakenewe isoko rifasha abarirema kurirema neza kandi n’ibyo bazanye kugurisha ntibyangirike, kuko bagiye batugaragariza ko bahura n’igihombo gikabije kubera imvura ibanyagira n’ibicuruzwa bikangirika.”

Akomeza avuga ko iri soko rizubakwa mu bice bibiri harimo igice cya mbere (Phase I) kigizwe n’ubwiherero ndetse n’igice cy’isoko gisakaye kizatwara miliyoni 103 z’amafaranga y’U Rwanda naho igice cya 2 (Phase II) kikazatwara miliyoni hafi 200.

Yashimiye RDB yatanze iyo nkunga ku mafaranga yavuye mu bikorwa by’ubukerarugendo bwakorewe mu Karere ka Ngororero.

Biteganyijwe ko igice cya mbere cy’iri soko gishobora gutangira gukoreshwa mu mpera z’uyu mwaka, hagatangira imirimo yo kubaka igice cya kabiri cy’iri soko na cyo kizuzura mu mwaka utaha.

AKIMANA JEAN DE DIEU

  • Imvaho Nshya
  • Ugushyingo 12, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE