Ngororero: Dr. Biruta yasabye abahinzi kongera umusaruro

Minisitiri w’Umutekano mu Gihugu akaba n’Imboni y’Akarere ka Ngororero muri Guverinoma, Dr. Vincent Biruta yifatanyije n’abaturage b’ako Karere gutangiza ku mugaragaro igihembwe cy’ihinga 2027A. yasabye abahinzi kongera umusarururo

Igikorwa cyabereye mu Murenge wa Nyange mu cyanya kigega (FOBASI) cya Songa ya mbere ahatewe imbuto y’ibigori kuri hegitari 40.

Abahinzi bafite akanyamuneza batewe n’uko iki gikorwa kibaye haraye haguye imvura nyinshi ubutaka bukaba bwasomye.

Uwavuze ahagarariye abahinzi Nzeyimana Etienne yavuze ku mpinduka nziza ubuhinzi bwa kijyambere bwagize ku muturage harimo kunoza imirire, kwiteza imbere no gusagurira amasoko.

Yashimiye ubuyobozi bwiza bw’Igihugu cyacu butanga nkunganire haba ku mbuto haba ku mafumbire umusaruro ukarushaho kwiyongera.

Yagize ati: “Hari ibyiza byinshi dukesha guhinga kijyambere, twahinduye imirire turayinoza. Dukoresha inyongeramusaruro, bigatuma twesa neza, tukabona ibo kurya ndetse tugasagurira amasoko.”

Yifuje ko haboneka urugomero rw’amazi (dam) mu gishanga cya Songa ku buryo abahinzi bajya buhira mu gihe cy’impeshyi mu gihembwe cy’ihinga C.

Umunyamabanga Uhoraho muri Minisiteri y’Ubuhinzi n’Ubworozi, Kamana Olivier yagarutse ku mihindagurikire y’ikirere yibutsa abahinzi gukomeza kwitegura imvura nyinshi y’umuhindo barwanya isuri ahantu hose.

Yagize ati: “Abahinzi murasabwa gukomeza kwitegura guhangana n’imvura biteganyijwe ko izagwa ari nyinshi. Mwitwararike musibuye inzira z’amazi, murwanye isuri.”

Yashimiye ubuyobozi bwiza bw’Igihugu bwakoze ibishoboka kugira ngo ifumbire iboneke kandi ku gihe bityo umuhinzi akaba atekanye. Yibukije abahinzi  gushyira ibihingwa n’amatungo mu bwishingizi.

Mu ijambo yagejeje ku bitabiriye iki gikorwa Minisitiri Biruta yasabye abahinzi guharanira kongera umusaruro kuko ibyangombwa byose bihari.

Yasabye abayobozi guhora hafi abahinzi kugira ngo umusaruro wabo we kwangirika kandi ubonerwe isoko.

Yagize ati: “Abayobozi musabwa guhora hafi y’abaturage, ibibazo bafite bigashakirwa ibisubizo kandi birashoboka kuko ibyangmbwa byose bihari”

Minisitiri Dr. Biruta yagarutse ku mutekano avuga ko ibinyobwa bitujuje ubuziranenge byawuhungabanyaga ko bigomba gucika burundu. Yanavuze ku mpinduka zo kuba inzoga z’ibyuma zaraciwe mu Rwanda: urugomo rwaragabanyutse, amakimbirane mu miryango arakendera, imirire myiza iriyongera,…

Igikorwa cyitabiriwe n’intumwa za RAB, Komite Nyobozi y’Akarere, abayobozi b’Inzego z’Umutekano zikorera mu Karere ka Ngororero  abayobozi n’abaturage b’Umurenge wa Nyange.