Ngoma: WASAC igiye gukurikirana ikibazo cy’abamaze imyaka irenga 15 bafungiwe amazi

  • NSHIMIYIMANA FAUSTIN
  • Ukuboza 7, 2023
  • Hashize amezi 6
Image

Bamwe mu batuye mu Murenge wa Rurenge mu Karere ka Ngoma bavuga ko imyaka irenga 15 bafungiwe amavomero bavomagaho amazi meza n’Ikigo gishinzwe Isuku n’Isukura (WASAC), bitewe no kutishyurwa n’abari bashinzwe kuvomesha, abaturage bagana ibishanga, bikabatera indwara z’uburwayi. WASAC yavuze ko igiye gukemura icyo kibazo bagahabwa amazi.

Mu Tugari twa Rugese na Rwikubo mu Murenge wa Rurenge mu Karere ka Ngoma habarurwa amavomero atandatu yafunze, abahatuye bavuga ko bakoresha amazi mabi bikabagiraho ingaruka kuko WASAC yafunze amavomero bavomagaho ngo bitewe n’abavomeshaga banze kwishyura WASAC bigatuma imigezi ifungwa kandi yari ibafitiye umumaro.

Bamwe mu baturage bavuga ko hari bagenzi babo bari bashinzwe kuvomesha amazi bagombaga kwishyura WASAC ariko ntibabikora bituma WASAC ifunga imwe mu migezi byatumye basubira gushoka, ibishanga ndetse n’izindi ngaruka bahura nazo nkuko babisobanura.

Kwizera Djuma atuye mu Mudugudu wa Rwakanuma, mu Kagari ka Kagese mu Murenge wa Rurenge, yagize ati: “Rino vomero rya Rwakanuma rimaze imyaka igera hafi kuri 20 rifunze kuko urabona ko ibikoresho byashaje bikazana ingese ndetse reba mubazi (compter) uburyo yarengewe n’ibitaka”.

Kwizera yakomeje asobanura ko uwavomeshaga yitabye Imana nyuma  umugezi urafungwa kuko atishyuye WASAC.

Yagize ati: “Umuntu wavomeshaga uyu mugezi yitabye Imana ntawugihari, uyu mugezi waje kugira ikibazo cy’umuntu wawukoragaho bitewe no kutishyura WASAC, byatumye WASAC nayo iza irawufunga. Twakomeje gutakamba tubasaba ko bafungura umugezi bakatubwira ko uwawukoragaho yambuye bidashoboka mu gihe atari yishyura. Gusa ikibabaje nuko uwo muntu ntawukiriho kandi turi kubirenganiramo”.

Uwineza Benitha nawe yagize ati: “Ibibazo by’uyu mugezi bimaze imyaka myinshi kuko ntukora; ugasanga turohereza abana kuvoma mu bishanga, bagatinda kuvayo kuko ari kure [….]. Twifuza ko amazi mabi tuvoma badufasha bakayadukiza turarwara macinya n’izindi ndwara ziterwa n’umwanda ndetse n’amazi mabi.”

Umuyobozi w’Ikigo gishinzwe Isuku n’Isukura (WASAC) mu ishami rya Ngoma, Kanamugire Vedaste yavuze ko hari bamwe mu bambuye iki kigo bigatuma bafunga amavomero, ariko ko iyo byagenze bityo basimbuza abagize iyo myitwarire gusa ngo ubusanzwe barasimbuzwa hakajyaho ab’inyangamugayo babifashijwemo n’abagize komite y’Umurenge.

Yakomeje avuga ko kuba hari uwitabye Imana bigatuma amavomero afungwa, bagiye kubikurikirana kugira ngo hashakwe igisubizo mu maguru mashya.

Yagize ati: “Niba umuntu atakiri mu mubiri ntibivuze ko n’abaturage babirenganiramo kuko bo baba bakiriho, tugiye kubikurikiranira hamwe byombi kuko uwitabye Imana aba agomba gusimbuzwa undi, abambuye na bo baba bakwiye gusimbuzwa inyangamugayo. Ubwo ni byo tugiye gukurikirana mu maguru mashya abaturage ntibabirenganiremo”.

Kuri iki kibazo ubuyobozi bw’akarere ka Ngoma buvuga ko iki kibazo butari bukizi ariko bugiye gufatanya na WASAC gushaka igisubizo gisubiza ibyifuzo n’ibibazo abaturage bafite.

  • NSHIMIYIMANA FAUSTIN
  • Ukuboza 7, 2023
  • Hashize amezi 6
TANGA IGITEKEREZO
Anonymous says:
Ukuboza 8, 2023 at 10:13 pm

HANO MUMUDUGUDU WA RWAKANUMA NTAMAZIMEZA TUGIRA.KUKO BIGARAGARA IYO IMVURA IMAZEKUGWA,(IHISE),USANGA NAYIKONDO YABAYE IBIZIBA.TWIFUZAKO BATWEGEREZAMAZI MEZA.MURAKOZE.

Andika igitekerezo

AMATEGEKO AGENGA IYANDIKA RY'IGITEKEREZO CYAWE