Ngoma: Urubyiruko rwahawe imashini zidoda zizarufasha kwiteza imbere

  • NSHIMIYIMANA FAUSTIN
  • Ukuboza 2, 2023
  • Hashize amezi 3
Image

Bamwe mu rubyiruko bavuka mu miryango itishoboye ntibagire amahirwe yo gukomeza kwiga bo mu Murenge wa Kazo mu Karere ka Ngoma, bahawe imashini zo kudoda kugira ngo zizabafashe kwiteza imbere n’imiryango yabo.

Kuri uyu wa Gatanu tariki ya 01 Ukuboza 2023, ni bwo abo 12 bahawe imashini zidoda, nyuma y’igihe cy’umwaka bigishwa kudoda, intego z’uru rubyiruko rusobanura ko, izi mashimi zigiye kubafasha kwikura mu bukene no guteza imbere imiryango baturukamo.

Umutoniwase Benitha yagize ati: “Imashini mpawe ngiye kuyikoresha neza nyibyaze umusaruro ku buryo nanjye nzafasha abandi n’umuryango wanjye. Imashini bampaye ntabwo nzatuma ipfa ubusa kuko mu rugo ubuzima ntibwifashe neza ariko mfite intego yo kubuhindura”.

Kubwimana Andre nawe yagize ati: “Nakuriye mu buzima bugoye kuko nibazaga amaherezo y’ahazaza hanjye bikanyobera. Nakoraga akazi ko mu rugo mu Mujyi wa Kigali ngiye kumva mu rugo barampamagaye ngo nze nige imyuga, ariko nkababazwa n’ubukene bwo mu rugo. Iyi mashini igiye gutuma nshyira umutima hamwe nshake amafaranga kuko amahirwe ngize ni intangiro z’urugendo rwanjye yo gukora nkiteza imbere.”

Ibi kandi bishimangirwa n’ababyeyi bavuze ko bashimira ubufasha bwahawe abana babo kuko nta mikoro n’ubushobozi babonaga bwo kugura imashini cyangwa ngo babone uburyo bwo kubigisha ahandi ariko imashini bahawe zikaba zigiye gusubiza ibibazo by’amikoro bo batari bafite.

Hakizimana Aaron atuye mu Kagari ka Karama mu Mudugudu wa Kagusa yagize ati: “Nshima umuryango wafashije umwana wanjye kwiga imashini akaba kandi yanayihawe, nta bushobozi nari mfite bwo kumwigisha ariko ku bw’amahirwe abona Inshuti z’Amahoro (The Friend of Peace Rwanda) yigishijwe kudoda kandi nizeye ko agiye gukora akiteza imbere.

Umuyobozi w’Umuryango The Friend of Peace Rwanda, Habanabakize J. Chrisostome yasabye urwo rubyiruko rusoje amasomo, banahawe imashini bashishikarizwa kuzibyaza umusaruro bakiteza imbere bakazanateza imbere aho bavuka.

Yagize ati: “Turi gufasha abana bava mu miryango itishoboye kugira ngo imibereho yabo ihinduke kuko dufitemo abana babyariye iwabo, abafite amikoro make n’ibindi ariko tunejejwe nuko ubu abana basoje kwiga bazi gukorera amafaranga. Ibitambaro n’ahantu ho gukorera harahari kandi ni ubuntu kugira ngo turebe ko imibereho yabo yarushaho kuba myiza bagafasha imiryango. Babonye icyo guheraho kuko bafite imashini zidoda, nibazihereho bashake ubuzima”.

Umukozi ushinzwe Imari n’Ubutegetsi mu Murenge wa Kazo, Murama Justin yavuze ko bishimiye ibikorwa bigamije guhindura imibereho y’abafite amikoro make kuko biri mu mihigo y’Umurenge.

Yagize ati: “Tunejejwe n’ibikorwa byo gufasha kwiga no guha urubyiruko rutagize amahirwe yo gukomeza uburyo bwo kubafasha kwikura mu bukene, abana bahawe imashani zidoda ni igikorwa kizadufasha kwesa imihigo nk’Umurenge ku rubyiruko ruva mu bushomeri. Abahawe imashini n’ababyeyi babo turabasaba kwita no gukurikirana neza izi mashini kuko zizabafasha mu buzima bwabo bwa buri munsi kuko nibazikoresha n’umwete zizabahindurira ubuzima na bo batere imbere”.

Umuryango The Friends of Peace Rwanda wahaye ruriya rubyiruko 12 imashini zifite agaciro k’amafaranga y’u Rwanda arenga miliyoni imwe.

  • NSHIMIYIMANA FAUSTIN
  • Ukuboza 2, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE