Ngoma: Begerejwe isoko rigezweho rya miliyoni 650 Frw

  • Imvaho Nshya
  • Ugushyingo 14, 2023
  • Hashize amezi 7
Image

Abaturage bo mu Murenge wa Sake mu Karere ka Ngoma barashimira Leta y’u Rwanda ikomeje kubagezaho ibikorwa remezo bigezweho nyuma yo kubakirwa isoko rya kijyambere ryuzuye ritwaye miliyoni 650 z’amafaranga y’u Rwanda.

Imirimo yo kubaka iryo soko rya kijyambere riherereye muri Santeri ya Gafunzo, irimo kugana ku musozo, rikaba rije risimbura iryari rishaje, abarikoreragamo bakaba binubiraga kunyagirwa no gukorera ku izuba ry’igikatu.

Abavuganye n’Imvaho Nshya, bemeza ko gukorera mu isoko ridasakaye byabatezaga igihombo, ariko kuva imirimo yo kubaka isoko yatagira ngo icyizere ni cyose bitewe nuko bari banyotewe gukorera ahantu hasa neza.

Uwamurera Thacianna usanzwe ucururiza muri iri soko yagize ati: “Twacururizaga mu isoko rishaje mbere ariko kuba Igihugu giha umuturage nkanjye gucururiza mu nyubako igeretse ni ukuvuga ko giha agaciro umucuruzi. Sinigeze mbitekereza ko amataje mbona kuri televiziyo nanjye nayacururizamo.”

Yakomeje avuga ko isoko bakoreragamo ryahoraga ribateye inkeke batinya ko rishobora gufatwa n’inkongi kuko batari bizeye ubuziranenge bwaryo, bigatuma banashora make kugira ngo igihe bahuye n’ibyago batazasigara iheruheru.

Bityo bemeza ko gukorera mu isoko rishyashya bizajyana no kongera igishoro maze bakarangura ibicuruzwa byinshi abakiriya babo bajyaga gushakira ahandi, bakabibona bibagoye.

Abacuruzi bategereranyije amatsiko gucuriza mu nzu igeretse

Yakomeje agira ati: “Twaracuruzaga imvura yagwa abantu bakabyanura, ibindi umuyaga ukabitwara, ariko ubwo bubatse isoko ibyo bihombo ntabwo tuzongera kubigira.”

Mukadusabe Annonciata nawe yunzemo ati: “Imvura yaragwaga tukanyagiza ugasanga dufite imbogamizi ariko natwe ubu tugiye gucururiza mu igorofa nkuko twagendaga ahandi tukabona bacururizamo tukibaza niba abacururi ba Gafunzo tuzagerwaho n’amajyambere tugacururiza ahantu hasobanutse, ariko ubu natwe iyi nyubako aho igeze dufite icyizere cyinshi kandi turabishimira Perezida wacu Paul Kagame.”

Bamwe mu baturage baremaga iri soko bavuga ko hari igihe batariremaga mu gihe imvura yabaga yaguye bitewe n’ibyondo n’ibiziba byabaga birimo, ariko ubu icyizere ni cyose.

Rukundo Claude yagize ati: “Kurema isoko imvura yaguye byaducaga intege kubera ibyondo n’ibiziba byazagamo hano, ukibaza uburyo uragura ibyagiye mu isayo ndetse na bwo ushobora kugwamo wiyanduje ukumva ucitse intege. Ubu ni ahantu hashimishije kuko urabona ko ari isoko rigezweho kandi ritworohereza twese.”

Umuyobozi w’Akarere ka Ngoma Niyonagira Natalie, yavuze ko imirimo yo kubaka iri soko iri kugana ku musozo hakaba hasigye iminsi itageze ku kwezi ngo rimurikirwe akarere.

Yagize ati: “Imirimo irasa nk’aho iri kurangira kuko hasigaye ukwezi kumwe na ko kutuzuye abaryubaka bakarimurikira Akarere kugira ngo ibikorwa byo kurikoreramo bitangire bikore, ndetse n’abaturage bagatangira kuribyaza umusaruro kugira ngo abakorera mu isanteri ya Gafunzo bakorere ahantu heza.”

Isanteri ya Gafunzi irimo kubakwamo iryo soko isanzwe yunganira Umujyi wa Kibungo.

NSHIMIYIMANA FAUSTIN

  • Imvaho Nshya
  • Ugushyingo 14, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE