Ngoma: Abahinzi barasabwa gukoresha ifumbire iboze mu guhangana n’imikondo y’inyana

  • Imvaho Nshya
  • Ugushyingo 11, 2023
  • Hashize amezi 4
Image

Bamwe mu bahinzi bo mu Murenge wa Zaza mu Karere ka Ngoma bavuga ko batewe impungenge n’udukoko tuba mu butaka tumeze nk’iminyorogoto tubangiriza imyaka bagirwa inama n’ubuyobozi gukoresha ifumbire yaboze neza.

Mu gihe abahinzi bibwira ko haba hari umuti wakwica, utwo dukoko bamwe bita iminyorogoto, imikondo y’inyana, ubuyobozi bw’Akarere busobanura ko ntawo, ahubwo bagomba gukoresha ifumbire iboze neza.

Abahinzi biganjemo abahinga ibigori, imyumbati, ibirayi n’ibindi bihingwa bo mu Kagari ka Nyagatugunda mu Murenge wa Zaza bavuga ko hari udukoko tuba mu butaka tumeze nk’iminyorogoto tubangiriza imyaka ndetse ngo twaburiwe umuti tukaba dushobora kubatera ibihombo mu gihe batabonye imiti itwica.

Niyonshuti Emmanuel ni umuhinzi wakodesheje umurima w’amafaranga ibihumbi 100 ahingamo ibigori, yavuze ko bitewe n’udukoko bita inka y’umukondo twamwangirije ibigori yari yahinze byatumye ahahinga ibijumba.

Yagize ati: “Twahuye n’icyorezo cy’udukoko turya imyaka yiganjemo ibigori, ibishyimbo, ibirayi n’ibindi hano ariko njye byaranshegeshe kuko ibigori nari nahinze aho nkodesha umurima byarangiritse ku buryo ntari gusarura. Ubu ndi guhinga ibijumba kuko ibigori byarangiritse ku buryo nahuye n’igihombo. Amafaranga nashoye ubwo maze kuyahomba bitewe n’utu dukoko. Inzego zifite ubuhinzi mu nshingano nizitabare n’abandi bahinzi batarahomba”.

Ibi kandi bishimangirwa na Uwitonze Primitive wahinze ibirayi n’imyumbati.

Ati: “Urareba ibirayi biri gushora ukabona udukoko twaragitobaguye twinjiramo. Urareba imyumbati hamwe hashora imizi ugasanga udukoko twarahariye ku buryo itazera, umwumbati ntushobora kuzamuka kuko iminyorogoto iba yarayizingiyeho ikayirya. Turasaba ko baduterera imiti yica iyi minyorogoto kuko ni bwo buryo bushoboka”.

Maniragena Hyacinth yagize ati, “Uyu ni umwaka wa kabiri tubona utu dukoko, ibirayi byararwaye ndetse ibigori byo ntibimera. Ikibazo cyacu gikwiye gushakirwa umuti kuko bitabaye ibyo tuzasonza”.

Umuyobozi w’Akarere ka Ngoma wungirije ushinzwe iterambere ry’ubukungu, Mapambano Nyiridandi Cyriaque, yavuze ko abahinzi bifuza umuti wica utu dukoko bidashoboka bitewe nuko nta muti wica udukoko uhari.

Yagize ati: “Hari udukoko twitwa imikondo y’inyana, ni udukoko turya imyaka tutarobanuye bitewe nuko abahinzi baba barakoresheje ifumbire itaboze neza, noneho twa dukoko tugakurikirana kurya ya fumbire bikarangira tugeze no ku bihingwa. Nta muti watwo uhari kandi biragoye ko haboneka umuti uterwa ku mizi y’imyaka kuko ariho dukunze gufata. Umuti kandi ushobora no kwangiza no guteza izindi ngaruka ku bihingwa.”

Mapambano akomeza asaba abahinzi kujya bakoresha ifumbire iboze neza ndetse bagatoragura utwo dukoko tukajya dutwikwa.

Yagize ati, “Inama tugira abahinzi ni ugutoragura utu dukoko kuko bisanzwe bibaho ko dutoragurwa tugatwikirwa mu cyobo kimwe kandi ni igihe gitoya kuko iyo imyaka imaze kugira uruti rukomeye tuba tutakiyibasha. Dukwiye gufatanya mu gukusanya ubu bukoko ubundi bugatwikwa kuko n’icyo gisubizo cyiza kandi gishoboka.”

Ibarura rusange ry’abaturage rya 2022 ryagaragaje ko mu Karere ka Ngoma, ingo zingana na 102,589 zitunzwe n’ubuhinzi butandukanye aho igihingwa cy’ibigori kiri ku kigero cya 71.4%, ibishyimbo kuri 84.3%, soya  ku 9.1% n’ibindi.

FAUSTIN NSHIMIYIMANA

  • Imvaho Nshya
  • Ugushyingo 11, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE