New Zealand: Abanyarwanda n’Inshuti z’u Rwanda bibutse Jenoside yakorewe Abatutsi

  • Imvaho Nshya
  • Gicurasi 30, 2022
  • Hashize imyaka 2
Image

Ku wa Gatandatu taliki ya 28 Gicurasi 2022, Umuryango w’Abanyarwanda babarizwa i Auckland mu Gihugu cya New Zealand bafatanyije n’inshuti z’u Rwanda mu kwibuka ku nshuro ya 28 Jenoside yakorewe Abatutsi.

Uwo muhango waranzwe no gufata umunota wo guceceka mu guha icyubahiro ubuzima bw’abasaga miliyoni bishwe muri Jenoside yakorewe Abatutsi mu 1994, no gucana urumuri rw’icyizere rusobanura icyizere cy’ahazaza harushijeho kuba heza kuko hatakirangwa Jenoside n’ingengabitekerezo yayo.

Umwe mu barokotse Jenoside yakorewe Abatutsi, yatanze ubuhamya bwakoze ku mitima ya benshi mu bitabiriye, bukurikirwa n’umuvugo w’umwana muto w’Umunyarwanda wagaragaje icyo u Rwanda rusobanuye kuri we nk’ishami ryashibutse ku giti cyarimbuwe ariko kigashibuka.

Uyu muhango witabiriwe n’abayobozi barimo Sir Donald Charles McKinnon wahoze ari Minisitiri w’Ububanyi n’Amahanga n’Ubucuruzi wa New Zeland mu 1994, Komiseri ushinzwe Umubano w’Amoko muri icyo Gihugu Meng Foon wibanze ku kamaro ko kwibuka mu ijambo yatanze, uhagarariye inyungu z’u Rwanda muri New Zealand, Umuyobozi w’Ihuriro ry’Imiryango y’Abanyafurika, inshuti z’u Rwanda n’Abanyarwanda baba muri New Zealand by’umwihariko abakiri urubyiruko n’abana.

Mu ijambo rye, Ambasaderi w’u Rwanda muri Singapore Jean de Dieu Uwihanganye, yashimiye abitabiriye uyu muhango bose bifatanyije mu kwibuka no guha agaciro ubuzima bw’abasaga miliyoni bishwe mu myaka 28 ishize bahorwa uko bavutse, no gufata mu mugongo abarokotse n’ababuze ababo muri ibyo bihe.

Amb. Uwihanganye yavuze ko New Zealand ifite umwanya munini mu Rwanda Rushya no mu mitima y’Abanyarwanda. Mu 1994, Ambasaderi wa New Zealand muri Loni Colin Keating, yari umwe muri bake bahagaze bashize amanga bakabwira Isi ko ubwicanyi bwarimo bukorwa mu Rwanda ari Jenoside yakorerwaga Abatutsi mu gihe abenshi bari ku ruhande rwareberaga banabyita ubushyamirane bw’amoko.

Yanavuze ko mu myaka 28 ishize abahakana n’abapfobya Jenoside biyongereye cyane, asaba buri wese guhagarara ashikamye akarwanya abagipfobya Jenosde yakorewe Abatutsi bakwirakwiza ibinyoma n’amakabyankuru ku byabaye mu Rwanda.

Yagize ati; “Kwima uruvugiro n’ijuru rito abahakana bakanapfobya Jenoside banyuze mu gukwirakwiza ibinyoma no kugaragaza ubufatanye mu guta muri yombi abakekwaho ibyaha bya Jenoside, ni yo nzira yo nyine yafasha kumvikanisha imvugo igira iti ‘Ntibizongera Kubaho Ukundi’, ikaba impamo ku Rwanda no ku Isi yose.”

  • Imvaho Nshya
  • Gicurasi 30, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE