Netanyahu yamaganye ikirego cya Afurika y’Epfo kuri Isiraheli

  • ZIGAMA THEONESTE
  • Mutarama 12, 2024
  • Hashize amezi 2
Image

Minisitiri w’Intebe wa Isiraheli Benjamin Netanyahu, kuri uyu wa Kane, yatangaje ko yamagana ikirego cya Afurika y’Epfo cyo kujyana Isiraheli mu nkiko avuga ko ari ibigaragaza ko ari “Isi ibogamye.

Afurika y’Epfo yajyanye Isiraheli mu Rukiko Rukuru Mpuzamahanga rushinzwe ubutabera rw’Umuryango w’Abibumbye (Loni) iyirega ko irimo gukora Jenoside mu Ntara ya Gaza yo mu Palestine.

Ni nyuma y’uko ikomeje kohereza ibibombe yihimura ku mutwe wa Hamas wo muri iyi Ntara wayigabyeho ibitero mu mpera z’umwaka ushize bigahitara abasaga 1200.

Ni urukiko Rukuru rwa Loni, rwatangiye kumva ikirego cy’Afurika y’Epfo kuri uyu wa kane, aho Afurika y’Epfo ishinja Isiraheli gushoza intambara kuri Hamas ivuga ko izabyara Jenoside ikorerwa Abanyapalesitina, Isiraheli ihakana  ibyo  birego.

Nubwo abahanga mu mategeko bahamya ko gufata umwanzuro kuri iki kirego bisaba igihe kerekire cyangwa imyaka myinshi, Afurika y’Epfo yo isaba urukiko mpuzamahanga rushinzwe gutanga ubutabera rwa Loni, ko rwategeka Isiraheli guhita ihagarika ibitero kuri Gaza.

Minisitiri w’Intebe wa Isiraheli Netanyahu mu ijambo yagejeje ku itangazamakuru ry’i Tel Aviv yagize ati: “Uburyarya bwa Afurika y’Epfo ntibugira imipaka.”

Yongeyeho ati: “Ese Afurika y’Epfo yari hehe, ubwo imbaga y’abaturage yicwaga abandi bagakurwa mu byabo muri Syria na Yemen, byakozwe nande? Ni abafasha ba Hamas.”

Netanyahu kandi yashimangiye ko Isiraheli izakomeza guhangana na Hamas  mu rwego rwo kurengera Igihugu  ndetse avuga ko ingabo za Isiraheli “zirimo gukora ibishoboka byose kugira zirinde guhohotera utari mu bugizi bwa nabi.”

Minisitiri w’Ubutabera muri Afurika y’Epfo Ronald Lamola mu kugaragariza urukiko ibirego Leta ye ishinja Isiraheli, kuri iyu wa Kane arikumwe  n’umwunganizi mu mategeko, yavuze Leta y’Igihugu cye ifite gihamya ko ibikorwa na Isiraheli ari ubushotoranyi bumaze imyaka myishu kuri Palestine.

Basabye abacamanza gufatira ibihano byihuse Isiraheli, harimo no gutegekwa guhagarika ibikorwa bya gisirikare muri Gaza.

Minisitiri Lamola yavuze kuba tariki ya 7 Ukwakira kwa 2023, igitero cya Hamas i Gaza mu Majyepfo ya Isiraheli cyarahitanye abantu bagera ku 1,200 kandi abagera kuri 250 barafashwe bugwate n’abarwanyi, ati: “nta mpamvu n’imwe  y’uko habaho Jenoside iyo ari yo yose.”

Yongeyeho ati: “Turatekereza ko niba urukiko rutagize icyo rukora ngo ibi bihagarare, tuzabona ibintu byinshi bikomeza kwangirika mu mutungo wa Palestine.”

Ibitero Isiraheli igaba muri Gaza ikoresheje inzira zo mu kirere, ku butaka no mu mazi bimaze guhitana abarenga ibihumbi 23, biganjemo abagore n’abana nk’uko Minisiteri y’Ubuzima y’aho umutwe wa Hamas ufite ibirindiro ibitangaza.

Gusa urukiko mu kugaragaza iyo mibare ntirwagaragaje umubare w’abishwe ku ruhande rw’abasivili no ku rw’abasirikare.

  • ZIGAMA THEONESTE
  • Mutarama 12, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE