NCHR yiyemeje kurwanya iyicarubozo

  • Imvaho Nshya
  • Ugushyingo 7, 2023
  • Hashize amezi 7
Image

Komisiyo y’Uburenganzira bwa Muntu mu Rwanda (NCHR) itangaza ko yiyemeje guteza imbere uburenganzira bwa muntu no kurwanya iyicarubozo n’ibikorwa bibabaza umubiri.

Byagarutsweho na Perezida mushya wa NCHR, Umurungi Providence, mu muhango w’ihererekanyabubasha hagati ye na Mukasine Marie Claire wahoze ayobora NCHR ubu akaba yaragizwe Ambasaderi w’u Rwanda mu Buyapani.

Ni umuhango wabaye ku gicamunsi cyo kuri uyu wa Kabiri tariki 07 Ugushyingo 2023, ku cyicaro cya Komisiyo y’Uburenganzira bwa Muntu.

Binyuze ku rubuga rwa X rwahoze ari urwa Twitter, NCHR yagize ati “Perezida mushya wa Komisiyo y’Igihugu y’Uburenganzira bwa Muntu hamwe n’Abakomiseri n’Abakozi biyemeje gukomeza kuzuza inshingano zo guteza imbere, kurengera uburenganzira bwa muntu no kurwanya iyicarubozo, ibikorwa bibabaza umubiri, ibidakwiye muntu n’ibimutesha agaciro”.

Umuhango w’ihererekanyabubasha witabiriwe n’Abakomiseri, Umunyamabanga Mukuru wa NCHR n’Abayobozi b’Amashami.

Habayeho umuhango w’ihererekanyabubasha hagati ya Mukasine Marie Claire na Umurungi Providence

Umurungi Providence, Perezida wa Komisiyo y’Uburenganzira bwa Muntu, yijeje ubufatanye n’imikoranire myiza abo asanze muri Komisiyo.

Komisiyo y’Igihugu y’Uburenganzira bwa Muntu ni Komisiyo yigenga iteganywa mu ngingo ya 139 y’Itegeko Nshinga rya Repubulika y’u Rwanda ryo mu 2003 ryavuguruwe mu 2015.

Zimwe mu nshingano za NCHR ni ukwigisha no gukangurira abaturarwanda ibyerekeye uburenganzira bwa muntu no kugira uruhare mu gutegura gahunda zo kwigisha uburenganzira bwa muntu.

Ifatanya n’izindi nzego gushyiraho ingamba zo gukumira ihohoterwa ry’uburenganzira bwa muntu.

Inatanga ibitekerezo, ibisabwe cyangwa ibyibwirije, ku mategeko, ku mabwiriza yo mu nzego z’ubuyobozi akurikizwa mu gihugu no ku mishinga y’amategeko kugira ngo byubahirize amahame shingiro y’uburenganzira bwa muntu.

NCHR ishishikariza inzego za Leta zibishinzwe kwemeza amasezerano mpuzamahanga yita ku burenganzira bwa muntu no kuyinjiza mu mategeko igihugu kigenderaho.

Inafite inshingano zo kugaragariza inzego za Leta zibishinzwe, ibyakorwa igihe hari ihohoterwa ryakozwe kugira ngo rikosorwe kandi rihanwe hakurikijwe amategeko.

Igira uruhare mu gufatanya n’inzego z’ibindi bihugu zishinzwe uburenganzira bwa muntu, amashyirahamwe akorera mu gihugu n’imiryango mpuzamahanga mu bikorwa byo guteza imbere no kurengera uburenganzira bwa muntu.

KAYITARE JEAN PAUL

  • Imvaho Nshya
  • Ugushyingo 7, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE