NCDA yakomoje ku migirire ikwiye ku mwana w’umukobwa

  • Imvaho Nshya
  • Ukwakira 10, 2023
  • Hashize amezi 8
Image

Mu gihe hasigaye amasaha abarirwa ku ntoki u Rwanda rukifatanya n’Isi kwizihiza Umunsi Mpuzamahanga w’Umwana w’Umukobwa, Ikigo cy’igihugu gishinzwe gukurikirana imikurire no kurengera umwana (NCDA) cyakomoje ku migirire ikwiye ku mwana w’umukobwa.

Insanganyamatsiko y’uyu mwaka igira iti ‘None ni twe: Uburenganzira bwacu, ejo heza’.

NCDA ibinyujije ku rubuga rwayo rwa X, yatangaje ko umunsi mpuzamahanga w’Umwana w’Umukobwa ari umwanya mwiza wo gutekereza ku ruhare rwe.

Yagize ati “Ni umwanya mwiza wo gutekereza ku ruhare rwawe mu kwimakaza imigirire iboneye yatuma umwana w’umukobwa agira ahazaza heza”.

Mukamana Monique, umuyobozi w’ishami rya gahunda ya tubarerere mu muryango muri NCDA, mu kiganiro Zinduka cyatambutse kuri Radio 10 mu gitondo cy’ejo ku wa Mbere tariki 09 Ukwakira 2023, yasobanuye ko uburenganzira bw’umukobwa bugomba kubahirizwa.

Yagize ati “Turashaka ko abana baba abakobwa biyumva ko bahari, uburenganzira bwabo bwubahirizwe kimwe nk’ubw’abandi.

Uburenganzira bw’umwana buramutse bwangiritse iki gihe nta ejo heza yaba afite, ni yo mpamvu n’abaduteze amatwi bakomeza guharanira ko uburenganzira bw’abana bwubahirizwa, bakumva ko babwishimiye”.

Asobanura ko uyu munsi wagiyeho kubera ko hari ibyo abakobwa bahezwagamo akaba ari mpamvu Leta yahisemo gushyiraho gahunda zitandukanye kugira ngo abana bagendane.

Biteganyijwe ko uyu munsi mpuzamahanga uzabera mu Karere ka Gasabo ku rwego rw’igihugu, mu ishuri ry’abakobwa rya FAWE.

Uzitabirwa n’inzego zitandukanye za Leta, ababyeyi, abarezi n’abandi banyeshuri baturutse mu bindi bigo by’amashuri ndetse n’imiryango itari iya Leta.

Mukamana yavuze ko hazahembwa abana b’abakobwa batsinze kurusha abandi mu bizamini bya Leta.

Mu mwaka wa 2021, u Rwanda rwari ku mwanya wa karindwi ku rwego rw’Isi mu guteza imbere uburinganire, urwa kabiri muri Afurika inyuma ya Namibia iri ku mwanya wa gatandatu ku rwego rw’Isi.

Umunsi wahariwe umwana w’umukobwa urizihizwa mu gihe raporo ya Banki y’Isi igaragaza ko buri munsi ku Isi yose abakobwa ibihumbi 41 bashaka abagabo batarageza ku myaka 18, ni ukuvuga miliyoni 15 buri mwaka.

Kwizihiza uyu munsi byatangijwe n’Umuryango w’Abibumbye mu 2011, ku Rwanda uyu munsi ukaba ugiye kwizihizwa ku nshuro ya 11.

KAYITARE JEAN PAUL

  • Imvaho Nshya
  • Ukwakira 10, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE