NBA G League United yabujije RSSB Tigers gukora amateka mu mikino mpuzamigabane ya FIBA

Ikipe RSSB Tigers ihagarariye u Rwanda n’Umugabane wa Afurika yananiwe gukora amateka yo kugera ku mukino wa nyuma w’irushanwa rihuza amakipe ahagarariye imigabane ku Isi rya ‘FIBA Intercontinental Cup 2026’, nyuma yo gutsindwa na NBA G League United yo muri Leta Zunze Ubumwe za Amerika amanota 114-95.

Uyu mukino wa ½ wakinwe mu gitondo cyo kuri uyu wa Gatatandatu, tariki ya 26 Nzeri 2026, mu nzu y’imikino ya National Indoor Stadium iri mu Mujyi wa Beijing mu Bushinwa.

Ni umukino watangiye wihuta ku mpande zombi, amakipe yombi atsindana cyane binyuze mu bakinnyi barimo Teafale Lenard Jr na Lester Quinones.

Agace ka mbere karangiye NBA G League United iyoboye umukino n’amanota 31 kuri 30 ya RSSB Tigers.

Mu gace ka kabiri, umukino wakomeje kwegerana amakipe yombi agendana mu gutsinda amanota abifashijwemo n’abakinnyi barimo Eric Dixon na Craig Randall II

Aka gace NBA G League United yatsinzemo amanota 25-23, isoza igice cya mbere ikomeje kuyobora umukino n’amanota 56 kuri 53 ya RSSB Tigers.

Mu gace ka gatatu, umukino wakomeje kwegerana cyane amakipe yombi atsindana, ikinyuranyo ari gito.

Mu minota itatu ya nyuma, iyi kipe yo muri Leta Zunze Ubumwe za Amerika yongereye ikinyuranyo ibifashijwemo na Lester Quinones Kigera ku manota 14 (82-68).

Aka gace karangiye NBA G League United yagejeje ku manota 86 kuri ya 70 ya RSSB Tigers.

Mu gace ka nyuma, RSSB Tigers yagarukanye imbaraga igerageza kugabanya ikinyuranyo binyuze mu bakinnyi barimo Teafale Lenard Jr Ndayisaba Ndizeye Dieudonne watsindaga atatu cyane ntibyaramba.

Ku rundi ruhande NBA G League United yakomeje gukina nk’ikipe nkuru ishyiramo ikinyuranyo cyayo kivamo ibifashijwemo na Lester Quinones na Phillip Wheeler batsindaga amanota atatu menshi.

Umukino warangiye NBA G League United yatsinze RSSB Tigers BBC amanota 114-95. Iyi ntsinzi yahesheje gukina umukino wa nyuma wa “FIBA Intercontinental Cup” mu gihe RSSB Tigers izahatanira umwanya wa gatatu
n’ikipe itsindwa hagati ya Rytas Vilnius yo muri Lithuania na Club Atletico Boca Juniors yo muri Argentine.

Iyi mikino yombi iteganyijwe ku Cyumweru, tariki ya 27 Nzeri 2026.

RSSB Tigers yashakaga gukora amateka yo kuba ikipe ya mbere yo mu Rwanda no muri Afurika yageze ku mukino wa nyuma wa “FIBA Intercontinental Cup” kuva yatangira gukinwa mu 1966.