Na nyuma y’iminsi mikuru  Kigali izajya itakwa amatara ashashagirana

  • ZIGAMA THEONESTE
  • Ukuboza 26, 2023
  • Hashize amezi 2
Image

Ni kenshi usanga mu Mujyi wa Kigali hatakwa amatara adasanzwe mu gihe u Rwanda rugiye kwinjira mu minsi mikuru ya Noheli n’Ubunani, ugasanga nyuma yayo aya matara akuweho. Ubuyobozi bw’uyu mujyi buhamya ko harimo gukorwa inyigo yatuma iyi mitako ituma umujyi usa neza igumaho by’umwihariko ku nzu ndende.

Mu kiganiro ubuyobozi bw’uyu Mujyi buherutse kugirana n’abanyamakuru bwasobanuye ko gutaka amatara adasanzwe mu busitani no ku nyubako zitandukanye mu gihe cy’iminsi mikuru ari mu rwego rwo gusangira ibyishimo n’abaturage bahatuye.

Umuyobozi w’Umujyi wa Kigali Dusengiyumva Samuel, yavuze ko gutaka Umujyi ari ukugira ngo use neza kandi no kwifatanya n’abaturage kwishimira iminsi mikuru bishimira ibyo bagezeho. 

Ati: “Ku bijyanye no gucana ngira ngo twashima ko Umujyi wa Kigali ugeze ku rwego rushimishije rwo kurimbisha umujyi, haba mu  bijyana n’ubusitani, amatara haba mu bijyanye n’inyubako, ndetse n’uburyo ba nyirazo bazifata kugira zigaragaze isura nyayo y’Umujyi wa Kigali. Kigali amarembo y’igihugu, igihugu cyubashywe ku rwego mpuzamahanga.”

Yakomeje agira ati : “Ariko ntibyabuza ko abantu nanone bishima kuko abaturage iyo bishimye natwe tugomba kujyana na bo ni yo mpamvu dushyiraho n’akarusho.”

Yakomeje avuga ko  hari gahunda y’uko Umujyi wa Kigali wakomeza gutakwa amatara ashashagirana ntibibe mu minsi mikuru gusa ahubwo bigahoraho.

Ati: “Hari igitekerezo gihari cyo kuba inzu ndende zakomeza kugira imirimbo y’amatara na byo bazakomeza kugenda bishyirwamo imbaraga ariko ku bijyanye n’iminsi mikuru murabizi mu mijyi hirya no hino hari uburyo imijyi igaragara abagenda hirya no hino bajya babibona tuba tugira ngo twishimane n’abaturage bishimira ibyo bagezeho”.

Umujyi wa Kigali ukomeje gushyira imbaraga mu kurimbisha inyubako, aho ba nyirinzu n’abashoramari basabwa kurushaho gutekereza ku cyarimbisha inyubako n’ubusitani no kugira isuku hose, bigakorwa mu gihe kirambye kuko u Rwanda rugendwa n’amahanga cyane kandi rwamamaye ku Isi yose kubera Isuku.

  • ZIGAMA THEONESTE
  • Ukuboza 26, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE