“Mutubwirire Perezida Kagame ko abari inyamaswa bahindutse abantu”

  • Imvaho Nshya
  • Ugushyingo 9, 2023
  • Hashize amezi 7
Image

Bamwe mu bagororwa bo mu Igororero rya Nyarugenge (Mageragere) mu Mujyi wa Kigali bagize uruhare muri Jenoside yakorewe Abatutsi mu 1994, bavuga ko bicujije amabi bakoze bakaba basaba imbabazi Imana, Igihugu, abo biciye n’Abanyarwanda muri rusange.

By’umwihariko basaba ko ubutumwa bwo kwicuza kwabo bwagera ku Mukuru w’Igihugu akamenya ko batagifite umutima w’inyamanswa ahubwo babaye abantu bumva bafitiye igishyika iterambere ry’Igihugu cyabo rishingiye ku bumwe n’ubwiyunge.

Ni ibyo batangaje kuri uyu wa 09 Ugushyingo, mu Karere ka Gasabo ubwo harebwaga intambwe imaze guterwa mu kubaka Ubumwe n’Ubudaheranwa bw’Abanyarwanda.

Inama y’Ubumwe n’Ubudaheranwa iterana rimwe mu mwaka hareberwa hamwe ibimaze kugerwaho mu kubaka ubumwe bw’Abanyarwanda, ikibura ndetse n’ingamba zafatwa ngo bigerweho.

Bamwe mu bagororwa bo mu Igororero rya Nyarugenge (Mageragere) bavuga ko ukurikije uko bari bameze mu 1994 bari bafite umutima nk’uw’inyamanswa ariko ubu basaba imbabazi kandi bicuza ibyo bakoze.

Uwitwa Nyirimanzi Gregoire yagize ati ati: “Ntabwo turi abantu bo kuza guhagarara imbere yanyu ngo tubabwire aya magambo. Nkurikije uko twari tumeze mu 1994, twari inyamanswa rwose ariko kugeza ubu turashaka kubohoka umutima wacu uruhuke, dusabe imbabazi abo twahemukiye, dutungane kuri bo dutungane no ku Mana. Ndashishishikariza bagenzi banjye kwirega no gusaba imbabazi. Ni ukuri mutubwirire Nyakubahwa Perezida Paul Kagame muti abari inyamaswa bahindutse abantu.”

Hisimana Thomas na we ni umwe mu bagororwa bo mu Igororero rya Nyarugenge, uvuga ko bagororotse kandi bicuza ibyo bakoze.

Ati: “Twazindutse tuje gusaba imbabazi, twishe abantu tubaziza ubusa ni byo bitubabaje cyane twumva biduteye n’ikimwaro ku buryo tutorohewe. Tubasabye imbabazi kandi mutubwirire Nyakubahwa Perezida Kagame ko twagororotse rwose, ubu turi abaturage bazira amako n’amacakubiri.”

Undi mu batashatse ko umwirondoro we utangazwa yabwiye Imvaho Nshya ko akiva mu igororero azahita yihutira kujya gusaba imbabazi Marene we kuko yamwiciye abavandimwe.

Ati: “Mvuka mu Karere ka Gasabo mfunganywe na musaza wanjye hano i Nyarugenge twese twakoze Jenoside. Mazemo imyaka 14 nsigaje 5, nukuri nterwa agahinda n’ukuntu nishe abavandimwe ba Marene wanjye kandi ndabyemera mbisabira n’imbabazi. Nkiva hano mu igororero nzahita njya kwa Marene wanjye musabe imbabazi ni bwo nzumva nduhutse umutima.”

Uyu mugore w’imyaka 62 yongeyeho ko atewe impungenge n’ubuzima bwa Marene we kuko amaze gukura, aba asaba Imana ngo azasange akiri muzima cyane ko amaze kugira 72.

Ati: “Marene wange amaze kugira imyaka 72, mpora nsaba Imana ngo nzasange akiri muzima kuko umutima ntiwatuza ntaramusaba imbabazi kandi musengera buri munsi”.

Aba bagororwa bavuze ko mu Igororero rya Nyarugenge harimo benshi bo mu duce dutandukanye tw’Igihugu bifuza gusaba imbabazi basaba ko inzego zibishinzwe zabafasha bagasaba imbabazi abo bahemukiye bakaruhuka imitima.

Urujeni Martine, Umuyobozi wungirije w’Umujyi wa Kigali, yavuze ko kugira ngo himakazwe Ubumwe n’Ubudaheranwa hakenewe gusabana imbabazi, asaba abagororwa kwerekana imibiri y’abazize Jenoside mu 1994, anabizeza ubufasha  mu  kubahuza n’abo bahemukiye igihe bazaba barangije ibihano byabo.

Ati: “Hakenewe ukuri kugira ngo mu rugendo rwo kubaka ubumwe n’ubudaheranwa, himakazwa umuco wo gusaba imbabazi no kuzitanga kandi haracyari inzira kuko usanga hari abaterekana ahari imibiri y’abishwe kugira ngo ishyingurwe mu cyubahiro. Rero dukoreshe ukuri, mu gihe ibihano byanyu bizaba birangiye ku bufatanye n’izindi nzego tuzabahuza n’abo mwahemukiye”.

Ubushashatsi buheruka bwa Komisiyo y’Igihugu y’Ubumwe n’Ubwiyunge [NURC] bwerekanye ko ubwiyunge bumaze kugera kuri 94.7%, aho mu mwaka wa 2015, bwari kuri 92.5%, mu gihe mu mwaka wa 2010, bwari kuri 82.3%.

KAMALIZA AGNES

  • Imvaho Nshya
  • Ugushyingo 9, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE