Musanze: Yihangiye umurimo abasaga 80 mu gutubura indabo n’ibiti

  • Imvaho Nshya
  • Nzeri 20, 2023
  • Hashize amezi 8
Image

Ubuhinzi buri mu nzego z’ubukungu zitanga amahirwe y’iterambere atagira umupaka, mu gihe byakozwe kijyambere kandi bigakorwa mu buryo bugamije guhaza ibyifuzo bya muntu no kubungabunga urusobe rw’ibinyabuzima.

Hari ubwo usanga hari abavuga ko imirimo yabuze mu gihe bafite cyangwa byaborohera kubona ubutaka bashobora kubyaza umusaruro bagatanga ibisubizo ku bibazo Isi ihanganye na byo birimo ibura ry’ibiribwa bihagije no guhangana n’imihindagurikire y’ibihe. Bizimungu

Bizimungu Cyprien ni umwe mu Banyarwanda bakomeje no kubyaza umusaruro ubuhinzi ariko banarengera ibidukikije, aho amaze guhangira umurimo amagana y’abaturage barimo abarenga 80 akoresha uyu munsi.

Guhera mu mwaka wa 2005 ni bwo yihangiye umurimo ahereye ku byo abona mu Karere ka Musanze atuyemo, atangira gutubura ingemwe z’indabo n’ibiti birimo n’iby’imbuto ziribwa.

Abinyujije mu ikompanyi yise VIRUNGA WILD LIFE Clubs, Bizimungu wigeze kuba Umuyobozi mu Nzego z’ibanze agakorera Kaminuza n’imiryango binyuranye, ashimirwa ko yahanze w’ingirakamaro ku buzima bwa muntu ndetse n’ibidukikije muri rusange.

Bamwe mu baturage bahawe akazi muri VIRUNGA WILDLIFE Clubs, barimo umusaza Kabirigi Christophe. Avuga ko akazi bakora kajyanye no guhumbika ingemwe, no kuzikurikirana kugeza zigeze igihe cyo ugemurwa zikajyanwa guterwa.

Yagize ati: “Njyewe bampaye Pansiyo nta kazi nari mfite ariko maze kubona iyi kompanyi bampaye akazi binkura mu bwigunge nkanjye bampemba amafaranga agera ku bihumbi 50, naguzemo amatungo aho mfite ingurube zigera kuri 4 navuguruye inzu yanjye kandi nanjye nateye ibiti by’imbuto ziribwa mbikuye ku masomo ya hano aho dutozwa gukunda ibidukikije no kubibyaza umusaruro, muri rusange uyu mushinga ni ingirakamaro”.

Uwimana Celestin we ashinzwe kubangurira ibiti by’imbuto ziribwa harimo imyembe na avoka, avuga kuba akora muri buriya buhumbikiro byamuteje imbere.

Yagize ati: “Umushara urahari kuko nkanjye bambarira imbuto mba namaze kubangurira ibiti bigera ku bihumbi 3, icyo gihe rero mba mfite umushahara w’ibihumbi 300, uyu mushinga ni mwiza kuko natwe tuhabonera amasomo, kandi abakurikiye neza na bo bamaze kwihangira umurimo babikesha gukorera muri iki kigo bagatanga imirimo”.

Bizimungu ashishikariza abaturage bagenzi be gukomeza gutekereza uburyo bakwihangira imirimo bagaha akazi n’abandi baturanye.

Ibiciro by’indabo bigenda bihindagurika bitewe n’ubwoko bw’indabo, urugemwe rw’avoka n’umwembe rumwe ruhagaze ku mafaranga 500, ku buryo Bizimungu we iyo abaze umusaruro ku gihembwe atabura kubona agera kuri miliyoni zisaga 3 z’amafaranga y’u Rwanda, ari n’aho akura amafaranga yo guhemba abakozi no kwikenura.

Bizimungu Cyprien yagize ati: “Hano dukora ubuhinzi bw’indabyo zinyuranye, tukagira ubuhumbikiro bw’ibiti bivangwa n’imyaka, ibyo kuvanamo imbaho kimwe n’ibyo gucana kimwe n’ibindi by’imbuto ziribwa. Ibi bintu rero nabikoze mu rwego rwo kwishakamo ibisubizo mpereye ku kantu gato ngamije nanone kubungabunga ibidukikije, no guhanga umurimo kuri njye n’abandi duturanye kandi mbona ari ibintu byiza kuko ni ho nkura amafaranga amfasha n’umuryango wanjye”.

Uyu mugabo akomeza avuga ko uretse no kuba yarihangiye umurimo umuha amafaranga ngo yari agamije guhangana n’ingaruka z’imihindagurikire y’ibihe.

Yagize ati: “Ubu buhumbikiro tugenda dutuburiramo ibiti by’imbuto ziribwa nanone nigisha abaturage uburyo bwo gukora nk’ibyo nkora kandi birabatunze, ibi byatanze imirimo ku rubyiruko n’abandi, ndetse n’ikimenyimenyi bamwe mu bakora nk’ibyacu kandi bagenda babona isoko, birabatunze.” Gusa yakomoje ku ngorane ahura na zo zirimo kuba atarabona abaguzi bahagije bakenera ingemwe zinyuranye batunganya.

Rimwe na rimwe ibiti by’imbuto babitangira ubuntu mu rwego rwo gushishikariza abaturage gukunda kurya imbuto mu kwihaza mu biribwa no guhangana n’ikibazo cy’igwingira mu bana bari munsi y’imyaka itanu.

NGABOYABAHIZI PROTAIS

  • Imvaho Nshya
  • Nzeri 20, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE