Musanze: Uwashyizwe mu manegeka n’ababumba amatafari arasaba kwimurwa

  • Imvaho Nshya
  • Ugushyingo 15, 2023
  • Hashize amezi 6
Image

Nzabakurikiza Donatille w’imyaka 53 y’amavuko, aratabaza inzego zose bireba kumufasha akimurwa mu manegeka yashyizwemo n’ababumba amatafari bazengurutse agasozi atuyeho bagacukura akaba asigaye hagati nk’ururimi.

Uyu  mubyeyi utuye mu Kagari ka Buruba, Umurenge wa Cyuve, afite ubwoba ko umunsi umwe ashobora kuzisanga inzu yamuguyeho kuko isigaye ireretse mu kirere.

Yagize ati: “Akarima kanjye abashoramari baraje bagura hirya no hino batangira gucukura igitaka cyo kubumba amatafari no guhoma. Reba kugira ngo bacukure inzu nsigare ku buhaname bwa metero zirenze 30 umanuka umukingo na ko si umukingo ni mu kuzimu. Ndifuza rwose ko bankura muri ubu bushorishori nta mwana mbana nawe, hari ubwo nshobora kujya hanze mukazabona ntembagaye ndimo nkumbagara kuri biriya bisozi bacukuye”.

Nzabakurikiza aba afite ubwoba ko mu bihe by’imvura ashobora kuhasiga ubuzima, cyane ko ubutaka bw’aho atuye bworoha ku buryo bushobora kwinjiramo amazi bukariduka.

Yagize ati: “Mu bihe by’imvura nk’ibi ubona bikaze mba mfite ubwoba ko inzu yanjye umuyaga wayihitana kuko meze nk’utuye mu butayu. Ikindi urabona imisozi ya hano iroroshye isuri ishobora kwinjira mu butaka mu buryo bworoshye, ushobora kubona uru rukingo ruhanutse n’iyu nzu nkamanukana na yo, ni yo mpamvu urimo kumbona nahunze iyi mvura nkaza kugama hano ku muturanyi”.

Nzabakurikiza Donatille, Imvaho Nshya yamusanze yugamye kwa mugenzi we

Nyirantezimana Mercianne, utuye mu Mudugudu umwe na Nzabakurikiza avuga ko akwiye gutabarwa byihuse kuko ubuzima bwe buri mu kaga.  

Yagize ati: “Buriya Nzabakurikiza aho atuye arutwa n’inyoni iri mu giti, uretse ko nayo iba ibasha kuguruka, ariko we mbona ntaho asigaye tekereza kugira ngo bacukure impande zose inzu isigare ireremba tuba dufite impungenge rero ko umunsi umwe tuzasanga inzu yirenze nawe yapfuye, nta handi afite ho gutura nta n’umugabo agira urumva se Leta idakwiye kumukura mu manegeka?”

Umunyamabanga Nshingwabikorwa w’Umurenge wa Cyuve, avuga ko ikibazo kizwi barimo kugishakira umuti.

Yagize ati: “Ikibazo cya Nzabakurikiza kirazwi ubu turimo turashaka kumukodeshereza inzu ndetse n’ubu ntabwo yongera kurara hariya hantu mu gihe tugishakisha uburyo yakubakirwa ahatashyira ubuzima bwe mu kaga”.

Ubuyobozi bw’Akarere ka Musanze busaba abaturage bakiri mu manegeka kwimuka ndetse ko hari gahunda zitandukanye zo gufasha abatishoboye kuva ahashyira ubuzima bwabo mu kaga.

NGABOYABAHIZI PROTAIS

  • Imvaho Nshya
  • Ugushyingo 15, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE