Musanze: Uwahaniwe kutagira fagitire yabaye indashyikirwa mu kwaka iza EBM

  • Imvaho Nshya
  • Ukwakira 28, 2023
  • Hashize amezi 7
Image

Yakangukiye gusaba inyemezabwishyu ya EBM nyuma yo guhanirwa kuba atayatse, none kuri uyu wa Gatanu tariki ya 27 Ukwakira yashimiwe nk’umuguzi w’indashyikirwa wahize abandi mu kwaka inyemezabwishyu za EBM.

Uwo ni Tindimwebwa Shaloom utuye mu Murenge wa Cyumba mu Karere ka Gicumbi, watse inyemezabwishyu za EBM zigera ku 119 zifite agaciro k’amafaranga y’u Rwanda 128 170, akaba yabaye indashyikirwa ku rwego rw’Intara y’Amajyaruguru.

Uyu mugore ugeze mu kigero cy’imyaka 45, avuga ko kutaka inyemezabwishyu byigeze kumugiraho ingaruka harimo no kuba yaraciwe amafaranga ku bicuruzwa yari yaguze babimufatana akayibura.

Yagize ati: “Kutagira EBM ni igihombo gikabije kuko njye ubikubwira nabihuriyemo n’ingorane ubwo navanaga ibicuruzwa muri Uganda mu buryo bwa forode nkaza kubifatanwa bakanamfunga amasaha make, kugeza ubwo hakurikijwe itegeko bakansha amafaranga arenze igishoro cyanjye kubera utuntu duke nakuye muri Uganda. Kuva ubwo nahisemo kujya ngura buri kantu kose nkabaza EBM”.

Tindimwebwa avuga ko nta kintu na kimwe akwiye kuvuga ngo yaguze akite icye adafite inyemezabwishyu  ngo kuko  kuyaka ari ukungura igihugu na we ubwawe wiyungura.

Yagize ati: “Yaba umwana wanjye, umugabo wanjye, umuturanyi ntabwo nshobora kumutuma ikintu ngo nkicarane kitagira inyemezabwishyu, kuko burya iyo udafite inyemezabwishyu ni nka kwa kundi ujya kugura umurima ukawutunga udafite icyangombwa cyawo. Kandi burya kwaka inyemezabwishyu nta n’icyo biba bitwaye; none se ku uba umaze kwishyura kuki bataguha inyemezabwishyu ya EBM?”.

Uyu mubyeyi akomeza asaba bagenzi be kwikuramo ingeso mbi avuga ko bamwe mu baturiye umupaka bakunze kugira bakavuga ko inyemezabwishyu atari ngombwa.

Yagize ati: “Nkanjye nturiye Umudugudu wa Gatuna, ariko bamwe twe usanga barakuriye muri wa muco mubi wo kumva ko igicuruzwa kiza kandi kiri ku giciro cyiza ari icyo bakuye hakurya y’umupaka w’u Rwanda. Nyamara ukurayo igicuruzwa kitagira inyemezabwishyu ugafatwa n’itegeko rirebana n’ukora magendu, ugasanga uciwe amande nyamara uguriye mu Rwanda ugasora uba wunguye Igihugu kandi ukajyana igicuruzwa cyawe mu mutuzo”.

Tindimwebwa akomeza anenga kandi bamwe mu Banyarwanda banyereza imisoro, ngo kuko abo ari muri bamwe mu bahombya  igihugu mu iterambere.

Yagize ati: “Nanjye kera ntabwo numvaga ibyiza byo gutanga imisoro kuko numvaga ayo mafaranga yose dutanga yaba ajya mu mifuka y’abayobozi cyangwa se abashinzwe kwakira imisoro bakayirira. Ariko maze gusobanukirwa burya nta handi twakura amafaranga yo kubaka kaburimbo, amashanyarazi, ibitaro se n’ibindi byinshi. Ibi byose mbyemezwa n’ibikorwa RRA igenda ikora iwacu harimo no kutwubakira imigezi, amavomo abiri mu Murenge wacu, ibintu  bidushimisha”.

Tindimwebwa avuga ko kuba yabaye indashyikirwa mu kwaka EBM, ari ishema ry’umuryango we n’Igihugu muri rusange, ngo akaba azakomeza kwaka EBM ndetse anabishishikarize bagenzi be cyane cyane ko ngo abagore b’iwabo iyo bagiye kugura umunyu hakiri bamwe muri bo bagenda biguruntege mu kuyaka babyitiranya no gukerereza imirimo yo mu gikoni.

Komiseri Mukuru wa RRA, Bizimana  Ruganintwari  Pascal, yavuze ku mavugurura yakozwe mu Kigo cy’Imisoro n’Amahoro (RRA) agamije kunoza imitangire ya servise no korohereza abasora, anasaba abikorera kwitabira gukoresha ikoranabuhanga mu gutanga imisoro.

Yagize ati: “Twakoze amavugurura arimo nko kuba gukemura ibibazo by’ubujurire bw’abasora biba mu buryo bwihuse, aho byavuye ku minsi 90 bijya ku minsi hagati ya 15 na 30; koroshya serivisi y’ihinduranya ry’ibinyabiziga isigaye iboneka 100% mu buryo bw’ikoranabuhanga, bikaba byaragabanyije igihe, ingendo n’amafaranga agendana na byo.”

RRA kandi yashyizeho gahunda yo kwegera abasora, aho abayobozi bakuru bazajya babasanga bakabakemurira ibibazo buri kwezi mu Mujyi wa Kigali na buri gihembwe mu tundi Turere tw’Igihugu.

Hari kandi ingamba zafashwe na Guverinoma y’u Rwanda hitawe ku nyungu z’abasora mu rwego rwo kuborohereza, zirimo kuvugurura amategeko y’imisoro irimo iyeguriwe Inzego z’ibanze, aho Ipatante yagabanyijwe ikazajya ishingira ku gicuruzo usora yagize mu mwaka wabanje.

Ibi bivuze ko umucuruzi muto atazishyura Ipatente ingana n’iya mugenzi we bacururiza hamwe mu gihe badafite ubucuruzi buri ku rugero rumwe. 

Hanabayeho igabanyuka ry’igipimo cy’umusoro ku nyungu, aho cyavuye  kuri 30% kikajya kuri 28%, kandi ukazarushaho kugenda ugabanyuka mu myaka iri imbere.

Asoza asaba buri wese kwaka  inyemezabwishyu, ndetse n’umucuruzi akajya yibuka kuyitanga atari bimwe  byo kwikiza, ntihabeho kunyereza imisoro kuko bimaze kugaragara ko imisoro ari inkingi ya mwamba mu iterambere ry’Igihugu.

NGABOYABAHIZI PROTAIS

  • Imvaho Nshya
  • Ukwakira 28, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE