Burera: Urubyiruko rusaba ababyeyi kuruha ingwate rugashora mu buhinzi

  • Imvaho Nshya
  • Ugushyingo 4, 2023
  • Hashize amezi 7
Image

Bamwe mu rubyiruko rwo mu Karere ka Burera, ruvuga ko ababyeyi babo ari bo ba nyirabayazana mu gutuma rudashora imari mu mwuga w’ubuhinzi ngo kuko barwima ingwate, ariko ababyeyi nabo bakarusaba kugira imyitwarire myiza, iboneye.

Akamahoro Josiane wo mu Murenge wa Cyanika, uri mu kigero cy’imyaka 23, avuga ko ababyeyi be batamworohereza ngo ashore imari mu buhinzi akoresheje ibigo by’imari, aho avuga ko bamuhaye ingwate y’umurima,  byatuma agera ku nguzanyo; ibi ngo bikaba bimwe mu bimuca intege mu gukomeza kwiteza imbere.

Yagize ati: “Urubyiruko turashaka gukora ubuhinzi bwa kinyamwuga, ibi rero bituma dukenera gushora imari mu buhinzi nka njye iyo natse ingwate bambwira ko batayimpa, ngo kuko bamaze kumva ko banki iteza icyamunara amasambu, bakaba bagira impungenge nanone ngo ko twahomba kubera ibihe, turanasaba ko Leta nanone yaha urubyiruko amahirwe y’ubwisungane magirirane mu guhabwa inguzanyo cyane iyo urubyiruko ruri mu matsinda”.

Uwamahoro akomeza avuga ko ngo kubera ko ababyeyi babo bakoraga ubuhinzi bwa gakondo, kandi ngo bakaba bazi ko banki zigurisha imitungo yabo bahitamo kwima abana babo ingwate kandi ngo basanga nta nyungu ndende iva mu buhinzi, bakaba bifuza ko n’ababyeyi bajya bahugurwa ku bijyanye n’ubuhinzi bw’umwuga bubyara amafaranga.

Bamwe mu babyeyi na bo bashimangira ko kuri ubu ngo hari urubyiruko ruba rutizewe, ku buryo kubaha ingwate ari nko kuyita, cyane ko hari bamwe bitwara nabi, basesagura umutungo bishora mu biyobyabwenge.

Mbarubukeye Aimable wo mu Murenge wa Gahunga yagize ati: “Kuri ubu no guha umwana ingwate bisaba kubanza gushishoza kuko na bo ntiberekana icyizere na we se umwana arabona amafaranga 10 000, akayashora ibiyobyabwenge, akagira imyambarire ntazi, agataha ijoro nyamara ayo ngayo arimo umurama wa karoti yagombye kuza ukamwereka aho awutera, ntabikore ubwo namuha iyo ngwate y’umurima banki yamuha miliyoni nkongera kumuca iryera? Ni yo mpamvu ababyeyi kuri ubu tubigendamo gake, urubyiruko nirubanze rutubikemo icyizere, tubone aho duhera tubafasha”.

Umuyobozi w’Akarere ka Burera w’agateganyo Jean Baptiste Nshimiyimana, avuga ko bashishishikariza urubyiruko gushora imari mu buhinzi, ariko nanone bakarukorera ubuvugizi mu bigo by’imari kugira ngo bahabwe inguzanyo.

Meya w’agateganyo w’Akarere ka Burera Nshimiyimana Jean Baptiste avuga ko bazakomeza ubuvugizi, urubyiruko rukagera ku mari

Yagize ati: “Gahunda dufite ni ukwegera urubyiruko ubwarwo kuko iterambere ry’iki gihugu rishingiye ku rubyiruko, turabashishishikariza kugira ngo batinyuke bashore imari mu buhinzi kandi n’ababyeyi ntibakwiye kugira impungenge kuko icyo basabwa ni ukubaba hafi.

Ikindi ni uko twegera ibigo bishora imari mu gukora ubuvugizi tubisaba gukorana n’urubyiruko, kandi ibi tuzakomeza kubikora mu rwego rwo gushishikatiza ibi bigo kumva ko amizero y’igihugu ari urubyiruko”.

Impuguke zigaragaza ko abakora ubuhinzi kuri ubu bari mu kigero cy’imyaka 50 gusubiza hejuru, ariko imibare y’urubyiruko rukora ubuhinzi umubare ukaba ukiri hasi kandi urubyiruko ni 63% mu Rwanda nyamara abageze mu gihe cyo gukora ni 54%, ariko ruvuga ko nta gishoro n’ingwate, ibi bintu Leta ikaba irajwe inshinga na byo irwereka inzira zo gukorana na BDF, aho ibishingira.

NGABOYABAHIZI PROTAIS

  • Imvaho Nshya
  • Ugushyingo 4, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE