Musanze: Umutobe bita “Umuzefaniya” ukomeje gusindisha abantu bakaragira inyoni

  • NGABOYABAHIZI PROTAIS
  • Mutarama 17, 2024
  • Hashize amezi 2
Image

Bamwe mu baturage bo mu Karere ka Musanze, bavuga ko bahangayikishijwe n’umutobe bita umuzafeniya ukomeje gutera abantu gusinda ukabatamaza, bamara kuwunywa, bakabura amajyo, bagata ubwenge ari byo bita kuragira inyoni.

Mu Karere ka Musanze Umuzefaniya ni ikinyobwa usanga gikunzwe n’abantu bitwa ko ari abarokore, bamara kuwunywa bagasinda cyane. Ni umutobe w’ibitoki uba wongewemo amasukari, pakimaya (umusemburo w’imigati bita igitubura).

Ukunze kuboneka mu Mirenge yo mu nkengero z’umujyi wa Musanze cyane cyane muri Musanze, Kinigi, Muhoza, Cyuve na Shingiro, ku buryo usanga ukunzwe cyane uhereye ku mukirisito kugeza kuri Pastori.

Nkundimana Pierre ni umuturage wo mu Murenge wa Cyuve muri santere y’ubucuruzi ya Gashangiro avuga ko Umuzefaniya benshi basigaye bawunywa mu rwego rwo guhisha ko banywa inzoga.

Yagize ati: “Umuzefaniya hano mu Gashangiro ni kimwe mu binyobwa bikunzwe, ni umutobe unyobwa umaze icyumweru uteretse mu ndobo ipfundikiye, urumva kubera ko haba harimo pakimaya urabira ukaba urwagwa […] umaze kuwuhaga atangira kuririmba indirimbo zo guhimbaza mbese ubona ko yahinduye imitekerereze. umaze kunywa uyu muzefaniya asinda cyane ibyo bita kuragira inyoni, akabura amajyo, agata umutwe”.

Yongeyeho ati: “Umuzefaniya igikombe kinini bita muhinzi kigura amafaranhga 500 iyo unyoye bibiri uhita uba umusinzi burundu, narawunyoye ndasinda cyane uba wumva uryohera ariko nanone ukagenda wumva usinda buhoro buhoro namaze kumara izo muhinzi 2 ngera mu rugo bamfashe mu maboko, njye numva Umuzefaniya na wo wafatwa mu rwego rw’ibisindisha.”

Uwambayingabire Charlotte avuga ko hari ngo n’abajya mu nsengero bamaze gusomaho bagera mu nsengero ukabona biyereza kandi baba banyoyeho.

Yagize ati: “Hari bamwe baza mu nsengero bamaze gusogongeraho ibi bikabakoza isoni bakomeza guhaguruka ngo barashima, uwamaze guhaga umuzefaniya ibya Kirisito bimuvamo ugasanga atangiye kurwana n’uwo bashakanye, muri make umuzefaniya nawo uri mu bituma amakimbirane aza mu ngo kandi ugatera ubukene, kuko uwawunyoyeho ahinduka imbata yawo, hari n’abamara kuwunywa ntibatinye kwiyandarika no gufata ku ngufu abagore n’abakobwa”.

Uyu mubyeyi akomeza avuga ko hari abavanga umuzefaniya n’icyo bita icyuma (inzoga za rikeli) bikabagaragura ndetse ngo hakaba n’abarara mu nzira bagacyurwa n’inshuti.

Ubuyobozi bw’Akarere ka Musanze bwo buratangaza ko iki kinyobwa niba giteza umutekano muke bagiye kubikurikirana, nk’uko Kayiranga Theobal, Umuyobozi w’Akarere wungirije ushinzwe imibereho myiza y’abaturage abitangaza.

Yagize ati: “Njye ni ubwa mbere numvise iri jambo umuzefaniya ariko birashoboka kuko muri iyi minsi hari abantu bagenda bakora inzoga z’inkorano, nyamara ibyo bintu bitera indwara zo mu nda, ibi rero tugiye kubikurikirana abo bose bakora n’abanywa uwo muzefaniya bihagarikwe kandi ndabizeza ko bigiye guhagarara cyane hamenyekanye aho bikorerwa”.

Mu Karere ka Musanze umuzefaniya uje wiyongera ku nzoga z’inkorano zikunze kuharangwa harimo imbutabuta, umurahanyoni, umumanurajipo, Yewemuntu, Mukubitumwice, Karutare n’izindi izo zose zikaba zifatwa nka bimwe mu bihungabanya umutekano muri zimwe mu ngo z’abazinywa.

Visi Meya Kayiranga Theobal yavuze ko bagiye gukurikirana ikibazo cy’umutobe uzwi nk’Umuzefaniya
  • NGABOYABAHIZI PROTAIS
  • Mutarama 17, 2024
  • Hashize amezi 2
TANGA IGITEKEREZO
lg says:
Mutarama 18, 2024 at 7:37 am

Ziriya nzoga zinkorano zishyirwamo uburozi zemerwa gute nkizujuje ubuziranenge kandi zaramaze Abaturage haba mubyaro no mumigi Abaturage inzoga yabo yali u rwagwa ibitoke namasaka umutobe wabaga udasembuye none ubu barashyiramo alcool amatafari ahonze levure umusemburo bakoresha mumigati nibindi ngo ibyo nibyo byemewe nibyo byujuje ubuziranenge urwagwa rwibitoke niyo nzoga yoroshye itongewemo uburozi ibitoke amasaka washaka iyo bita inkangaza hakiyongeramo ubuki bizakorwe bizapimwe murebe itandukaniro ryibyo bavuga ngo ubuziranenge ikintu gifite ubuziranenge cyamara abantu gute!!bapfa batemana barara mubigunda ayo mazina yazo ubwayo arabigaragaza ukumva ngo umuntu bamupingiye 2 ahita apfa kuko zinjiza amafaranga ntawe ubyitaho upfa arapfa abannywi ntibabura

Andika igitekerezo

AMATEGEKO AGENGA IYANDIKA RY'IGITEKEREZO CYAWE