Musanze: Umuhanda Kadahenda -Birira utuma abantu barembera mu ngo

  • Imvaho Nshya
  • Ugushyingo 17, 2023
  • Hashize amezi 4
Image

Abaturage bo mu Murenge wa Kimonyi mu Karere ka Musanze barasaba inzego bireba ko bakubakirwa umuhanda Kadahenda–Birira kubera ko kuba udakoze neza byabahejeje mu bwigunge kugeza n’ubwo abarwayi barembera mu ngo bitewe n’uko imbangukiragutabara itabasha kugera mu miryango yabo.

Uyu muhanda iyo uwugezemo mu bihe by’imvura uhita wibwira ko abaturage muri byo bihe ubuzima bwabo buba busa n’ubwahagaze, kubera ibyondo biterwa n’ibinogo byuzuramo amazi atemba akagera no mu nzu zabo, bagasaba ko nibura mu gihe uyu muhanda utari wubakwa bashyiramo igitaka imigenderanire yakorohamo gake.

Hakizimana Azalia wo mu Kagari ka Birira yagize ati: “Uyu muhanda ni mpuzamirenge ni uko iyo uri kuri uyu muhanda uhita ugera mu Murenge wa Muhoza na Muko ukongeraho na Kimonyi yacu ari nayo ifiteho igice kinini. Baramutse badukoreye uyu muhanda twabona uburyo imyaka yacu igera mu mujyi wa Musanze, ikindi ubu nta mbangukiragutabara yakwigabiza ibi binogo n’ibyondo nawe uko ubyibonera harimo amabuye menshi, kuri ubu umurwayi kugira ngo agere ku kigo nderabuzima  cya Birira bidusaba moto kandi igerayo dutanze amafaranga 2000, rwose baturwaneho baduhe umuhanda”.

Mukamazi Spesiose we avuga ko kuri ubu hari bamwe barembera mu ngo abandi bakabyarira mu ngo

Yagize ati: “Hari bamwe mu bagore batinya umujijshi ndetse n’abagabo bagatinya kugenda bisekagura kuri ibi bibuye ndetse n’ibi binogo, abana bacu na bo iyo bava ku ishuri nko mu bihe by’imvura bagera mu rugo bahindanye, iyi nzira yose nko mu gace k’itaba amazi agusanga mu nzu, uyu muhanda uramutse ukozwe hano byatworohera kuko iterambere ryasakara hano natwe tukabona amashanyarazi yo ku muhanda”.

Umunyamabanga Nshingwabikorwa w’Umurenge wa Kimonyi Mukansanga Gaudence, avuga ko koko uriya muhanda ukenewe cyane kubera ko uramutse wubatswe wahindura ubuzima n’imibereho by’abanyakimonyi

Yagize ati: “Ikibazo cy’uyu muhanda Kadahenda- Birira natwe turakizi ko usanga harimo ibinogo, ibitare by’amabuye bituma umuntu atabasha kugendamo neza yaba agenda n’amaguru cyangwa ari ku kinyabiziga, ubu rero icyo dukora kandi twakoze ni uko iki kibazo twagishyikirije Akarere n’ako ubwo kazakorana n’inzego bireba gusa batubwiye ko hagiye gushakwa ingengo y’imari”.

Umuhanda Kadahenda-Birira ukora ku Mirenge ya Muhoza-Kimonyi ugakomeza ku buryo uramutse ukozwe byatuma n’imigengeranire y’Umurenge wa Muko na Kimonyi iba nta makemwa kandi n’ibiciro ku ngendo byagabanyuka.

NGABOYABAHIZI PROTAIS

  • Imvaho Nshya
  • Ugushyingo 17, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE