Musanze: Umuhanda Kabilizi– Butare uzatwara   1 987 283 795 Frw uzoroshya imigenderanire

  • NGABOYABAHIZI PROTAIS
  • Mata 17, 2024
  • Hashize ukwezi 1
Image

Abaturage bo mu Murenge wa Gacaca bavuga ko bishimiye ikorwa ry’umuhanda Kabilizi- Shashi- Butare ugizwe na kilometero 13, uzatwara amafaranga y’u Rwanda 1 987 283 795 uroshya ingendo abawukoresha bave mu bwigunge.

Umuhanda Kabilizi uzengurutse imisozi miremire ifite ubuhaname bugera kuri metero 1000, ukagera ku kigo nderabuzima cya Gacaca, ugakomeza ukagera ku kiyaga cya Ruhondo, abaturage bakoraga ingendo zigera ku kiyaga babanje kuzenguruka

Masengesho Pascal wo mu Kagari ka Kabilizi yagize ati: “Uyu muhanda uje twari tuwukeneye kuko hano hari akayira k’agasibangira kunyuramo nko mu bihe by’imvura byatugoraga, kugeza umurwayi kwa muganga kubera ko nta kuntu imbangukiragutabara yageraga hano twagendaga twihondagura mu bisimu byabaga hano ubu rero ubwo umuhanda uhageze tugiye kujya tugera aho dushaka mu gihe gito kandi ku giciro cyiza”.

Mugisha Seraphine nawe ashimangira ko uriya muhanda uje kuramira ababyeyi ndetse no gusurana mu buryo bworoshye

Yagize ati: “Urabona ko muri iyi misozi turi abahinzi, umusaruro wacu twawutwaraga mu mifuka kugira ngo tuwugeze kuri kaburimbo tuwutegere ujye ku isoko rya Musanze, none tubonye umuhanda imodoka zirajya ziza kwikorera ino karoti zacu, amashu, n’indi myaka.

Yongeyeho ati: “Kugira ngo tujye gusura abo kuri Ruhondo byadusabaga kujya kunyura mu Murenge wa Rwaza cyangwa se muri Gahunga ya Burera turashima imiyoborere myiza ya Kagame ikomeje kudukura mu bwigunge”.

Aba baturage bo muri Gacaca bakomeza bavuga ko bishimira kuba ibikorwa by’umuhanda birimo kuhagera byatumye n’umuriro w’amashanyarazi uhagera, iterambere rikomeje kubegera.

Kamanzi Eurade abivuga yagize ati: “Uyu muhanda rero ubwo uwureba tuwufitemo inyungu 2, iya mbere uje kutworohereza imigenderanire, nanone turimo gukoramo  tukabona ifaranga, mu gihe cy’amezi 4 maze nkora hano maze kugura ingurube 3, kandi imwe igiye kubyara.”

Yongeyeho ati: “Ziriya ngurube zizatuma nshinga akabari aho mfite inzu ku muhanda kuko nari narahombye, kandi uyu muhanda uje kongerera agaciro inzu zacu zo ku muhanda.”

Umunyamabanga Nshingwabikorwa w’Umurenge wa Gacaca Nsengimana Aimable nawe ashimangira Umurenge ayobora wari ukeneye cyane ko imigenderanire izahuka.

Yagize ati: “Tekereza kugira ngo umuntu ashake kujya kureba mugenzi we utuye Karwasa ajya Kabilizi agomba kuzenguruka akoze ibilometero byinshi, [….] turashimira rero gahunda nziza za Perezida Kagame ukomeje guhindura ibyari imijyi, kuko ubwo umuhanda wahageze imodoka zirajya zigera ino twita mu byaro mu buryo bworoshye.”

Uyu muhanda biteganyijwe uzatsindagirwamo igitaka umwe mu mihanda izwi ku izina rya kaburimbo itukura.

  • NGABOYABAHIZI PROTAIS
  • Mata 17, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE