Musanze: Sinzabaheza ufite ubumuga bwo kutabona, umwe mu bahinzi b’ibirayi 30 bahembwe

  • NYIRANEZA JUDITH
  • Ukuboza 19, 2023
  • Hashize amezi 5
Image

Umuhinzi w’ibirayi Sinzabaheza Jean Damascène ni umwe mu bahinzi b’ibirayi bo mu Karere ka Musanze bahembwe kuri uyu wa Kabiri tariki ya 19 Ukuboza 2023.

Abahinzi 30 bahinga ibirayi mu Karere ka Musanzwe bahembwe ni abagize uruhare mu kuzamura umusaruro.

Umuyobozi w’ Ishami ry’ Ubuhinzi n’ Umutungo Kamere   Ngendahayo Jean afatanyije na Nteziryayo Ignace; Umuyobozi w’ Ishuri ry’ Abahinzi b’ibirayi ; Rwanda Farmer Potato Academy ( RFPA)  ryashyizweho n’ Ikigo Imbaraga  yayoboye igikorwa cyo guhemba abahinzi b’ ibirayi.

Umuyobozi w’ Ishami ry’ Ubuhinzi yasabye abahembwe   kurushaho kongera umusaruro bakoresha tekiniki z’ubuhinzi bwa kijyambere.

Yagize ati: “Murusheho guhinga kinyamwuga, muhanga udushya, musimburanya ibihingwa no gukoresha ifumbire mu kongera umusaruro”.

Bwana Sinzabaheza Jean Damascène ufite ubumuga bwo kutabona uri mu bahinzi bahembwe yashimiye Ubuyobozi bwiza buriho budaheza n’ abafite ubumuga bakaba na bo barahawe amahirwe yo gukora imishinga y’ iterambere ,Ubuyobozi bukanabafasha kuyishyira mu bikorwa ngo biteze imbere.

Uyu munsi hahembwe abahinzi 30 bahawe Ipompo itera umuti( spraying pump), Rozwari ivomerera ibirayi, Bote n’ amasuka.

Umwe mu bahinzi b’ibirayi bahembwe yavuze ko ibikoresho bahawe bigiye kubafasha gukorana umurava ubuhinzi.

Yagize ati: “Agahimbaza umusyi kaba mu ngasire. Ibi bikoresho duhawe bigiye kudufasha kurushaho kwita ku buhinzi bw’ibirayi. Nzongera imbaraga mu gukurikirana imirima ngamije kurushaho kongera umusaruro”.

Iki gikorwa cyateguwe ku bufatanye bwa RFPA na Agriterra Rwanda mu rwego rwo gufasha abahinzi b’ ibirayi kuzamura umusaruro wabyo mu bwinshi ndetse no mu bwiza.

Biteganyijweko bazahemba n’ abandi bahinzi 270 mu tundi Turere bakoreramo ari two Nyabihu, Rubavu, Burera na Gicumbi.

  • NYIRANEZA JUDITH
  • Ukuboza 19, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE