Musanze: Sinzabaheza ufite ubumuga bwo kutabona akoresha abakozi 25

  • NGABOYABAHIZI PROTAIS
  • Ukuboza 26, 2023
  • Hashize amezi 5
Image

Umuhinzi w’intangarugero mu buhinzi bw’ibirayi, mu Murenge wa Shingiro, Akarere ka Musanze, Sinzabaheza Jean Damascene ufite ubumuga bwo kutabona, yihangiye umurimo kuri ubu afite abakozi bagera kuri 25, akoresha buri munsi muri ubwo buhinzi.

Sinzabaheza yatangarije Imvaho Nshya ko yatekereje umushinga atagira amafaranga imbuto n’umurima, ariko ngo akoresheje ubwenge byose byarashobotse.

Yagize ati: «Mpereye ku masomo nahawe nahisemo kwihangira umurimo, mbanza kubiganiraho n’uwo twashakanye njya gufata inguzanyo muri CSS Zigama icyo gihe bampaye ibihumbi 100, nguramo ibilo 50 mbitera kuri ari nk’eshatu ababyeyi bari bampaye nakuyemo ibilo hafi 500, niyemeza kwagura ubuhinzi kugeza ubwo nsaruye toni 2,5.

Sinzabaheza akoresha ubumenyi yahawe mu gihe yasezererwaga mu ngabo

Byanteye ingufu nongera umubare w’abakozi kuko natangiranye abakozi 3, ubu ngeze mu bakozi 25 n’ubuhinzi bw’ibirayi kuri hegitari zigera kuri 5, ubumuga bubi ni ubwo mu mutwe kuko ubu ubuhinzi bw’ibirayi burantunze kandi natanze akazi ».

Ni nyuma y’uko yahuye n’ikibazo cyo kutabona mu 1999, akaba yari umwe mu bahoze mu ngabo z’u Rwanda mu 1994, atangaza ko ubumuga bubi ari ubwo mu mutwe.

Yagize ati: «Nahuye n’ikibazo cy’amaso mu 1999 bitewe n’urugamba nari ndimo narwaniraga igihugu na cyo ntabwo cyantereranye, narwariye mu bitaro bya Kanombe igihe cy’imyaka 3, ariko birangira amaso apfuye nsezererwa mu ngabo.

Nabanje kwiheba ndetse n’imperekeza bampaye nahise nyimara, urumva umuntu ukiri muto kandi nshingiye ku magambo bambwiye bansezerera natekereje kwihangira umurimo mpitamo guhinga ibirayi».

Sinzabaheza avuga ko kuva muri 2002 atangiye umwuga w’ubuhinzi bw’ibirayi amaze kugura imirima ifite agaciro ka miliyoni 6,5 ; amaze kubakamo inzu nziza ifite agaciro ka miliyoni 5, mu byo ashimirwa ni uko yatanze akazi kandi benshi bakaba bamwigiraho nk’uko bamwe mu bakozi be baganiriye n’Imvaho Nshya babivuga

Mukeshimana Clementine yagize ati : « Njye ndi umukozi wa Sinzabaheza maze imyaka nk’itatu dukorana ubu namenye uburyo bwo guhinga ibirayi bitari mu kajagari, urabona ko atabona ariko amaso y’umutima we ni yo atuma dukora ibikorwa nk’ibi tugakuramo amafaranga, tukitunga natwe. Ubu nanjye n’ubwo nkora hano ndi umuhinzi mbikuye ku masomo nakuye hano ubu ngeze mu kigero cyo kweza imifuka 3 y’ibirayi kandi nzakomeza niteze imbere».

Niyikiza umwe mu bakozi ba Sinzabaheza

Niyikiza Placide ni umwe mu bakozi be nawe avuga ko Sinzabaheza ari intangarugero kuko ngo bamwigiraho byinshi.

Ati: «Sinzabaheza ntabona ariko akora kurusha abafite ingingo zose, kuko aratekereza cyane natwe akadutekerereza, ni umunyakuri muri byose  ni umwe mu batumye tubasha kubona akazi, aduhemba neza kuko ubu aduhemba amafaranga 1500 ku munsi urumva ko ari ibintu byiza, abantu bose bajye bareberaho ».

bYongeyeho kandi kon’abandi bafite ubumuga bagira icyo bakora.

Ati : « Yemwe n’abandi bafite ubumuga ntibumve ko bahora bateze amaboko, abafite ubumuga barashoboye, nka njye iminsi maze nkorana na we natangiye ubuhinzi bw’ibirayi, maze kugira intama 3 nzikuye ku mafaranga yampembaga nkayajyana mu matsinda akaba agenda yunguka »

Sinzabaheza w’imyaka 44, yemeza ko kuri ubu afite abakozi 25 ba nyakabyizi ngo abahemba neza kandi nk’uko babyivugira ngo na bo biteje imbere mu miryango yabo, ikindi ni uko kugeza ubu uyu mugabo yabumbiye hamwe abafite ubumuga bunyuranye muri Koperative Dukomeze Ubuzima Mudende na bo bahinga ibirayi kuri hegitari zigera ku munani.

  • NGABOYABAHIZI PROTAIS
  • Ukuboza 26, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE