Musanze: Ntibakozwa ibyo kugurira inyama mu mabagiro, bashaka izo ku makoma

  • KAMALIZA AGNES
  • Mutarama 17, 2024
  • Hashize amezi 2
Image

Bamwe mu baturage bo mu Murenge wa Cyuve, Akarere ka Musanze, bavuga ko kugeza ubu batazi amabagiro agurisha inyama kuko bakunda kurya izoo bibagiye cyangwa izabagiwe ku makoma mu mashyamba.

Abo baturage bavuga ko ibyo kurya inyama zo mu mabagiro ari iby’abatuye mu bice byo mu mijyi, kuko bo banazigura ku biro ariko bo bakaba bazitera imidwi abandi bagatigira.

Kawera Eugenie ati: “Ibyo kugurira mu mabagiro mbibona mu mujyi hano turya inyama twibagiye, ubaga araza agahita avugana n’umukozi aho bayicira, bakayijyana mu gitari (ishyamba). Hari n’igihe avuga ati, uyu munsi ndabaga aba afite nk’abantu bamucururiza inyama. Rero inka bayibagira aho duhari noneho tukagura bitewe n’izo ushaka.”

Barora Celestin ati: “Sindagurira inyama mu ibagiro umuturage arabaga tukajya kumugurira, hari nubwo zibura abaguzi zikarara aho tukazigura bukeye kandi ubanza ntacyo zitwara ubanza iby’amabagiro ari byo abifite.” 

Aba bakomeza bavuga ko ibyo kurya inyama zikonjesheje ntabyo bazi (inyama zo muri firigo) cyane ko babibona mu bice by’imigi.

Kawera Eugenie ati: “Iby’inyama zivuye muri firigo nta n’ubwo njye mbizi! Inyama ivuye muri firigo ntabwo ndayirya hano babaga inka bakayirangiza bakagukatiraho igipande.”

Barora Celestin nawe ati: “Iby’inyama zo muri firigo ntago mbizi iyo mfite agatungo ndakabaga nkakarya”.

Simbarikure Gaspard, Umukozi mu Kigo cy’Igihugu gishinzwe ubugenzuzi bw’ubuziranenge, ihiganwa mu bucuruzi no kurengera Umuguzi (RICA), ushinzwe ubugenzuzi bw’isuku, ubuziranenge n’akato k’ibikomoka ku matungo, avuga ko ibyo kubagira inyama mu mashyamba bidakwiye cyane ko bishobora gushyira ubuzima bwabo mu kaga akabakangurira kugurira inyama ahabugenewe.

Ati: “Itungo ryose rigenewe kuribwa n’abantu rigomba kugenzurwa rikabagirwa ahantu hemewe rero umuturage wese utanga itangazo ko afite itungo ryo kurya.

Abantu bakaza bakabaga ntago bikwiriye kuko ntazi ubuzima bw’iryo tungo cyangwa n’uburwayi riba rifite agomba kumenyesha nibura veterineri umwegereye rigapimwa ubundi agatanga uburenganzira. Ibyo bintu byo kubaga gutyo turabyamagana kuko ubuzima bw’umuturage ntibureba RICA gusa butureba twese.”

  • KAMALIZA AGNES
  • Mutarama 17, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE