Musanze: Kwimwa amakuru y’igishushanyombonera bituma abasore bubaka basenyerwa

  • Imvaho Nshya
  • Ugushyingo 13, 2023
  • Hashize amezi 6
Image

Kubahiriza igishushanyo mbonera cy’imiturire mu mujyi ni ukorohereza Leta y’u Rwanda mu igenamigambi ry’igihe kirekire, no gutegurira ahazaza hatekanye ibisekuru bizavuka mu binyejana biri imbere.

Gusa bamwe mu basore bo mu Murenge wa Shingiro bahora bashyamiranye n’ubuyobozi bakeka ko bubahohotera mu gihe bwo buba bugerageza gukumira kugira ngo hatagira uwubaka mu kajagari agateza ikibazo kizagira ingaruka no ku buvivi bw’abazabakomokaho.

Bushimangira ko abo baturage baba bashaka kubaka ahantu hagenewe guterwa amashyamba nk’uko bigaragara mu gishushanyo mbonera cy’Umujyi wa Musanze kivuguruye.

Muri abo basore batuye mu Mudugudu wa Burengo, Akagari ka Gakingo, bwabwiye Imvaho Nshya ko iyo bubatse inzu babona ari nziza zijyanye n’igihe basenyerwa kubera ko nta makuru ku miterere y’imiturire bahabwa mbere y’aho.

Ikibababaza ni uko batangira kubaka ubuyobozi bubireba inzu zaba zimaze kugera hagati bakaba ari bwo baza kuzisenya.

Nyirurugo Jean de Dieu, umwe mu basenyewe inzu kandi yari yaragerageje gushaka ibyangombwa, avuga ko yahohotewe ubuyobozi bw’Umurenge wa Shingiro bukamusenyera inzu yari imaze kugera kure izamuka.

Nyirurugo yagize ati: “Kuri ubu twebwe ibibera muri uyu Murenge cyane cyane Akagari kacu, nk’ubu icyangombwa mfite cy’ubutaka mfite kigaragaza ko aha hantu hagenewe guturwa.  Nagiye kwaka icyangombwa cyo kubaka nyuze mu nzira zose ntangira mutwarasibo abireba, kuko nanyuze mu nzira zose zisabwa kugira ngo nubake, ngeze hagati ariko naje gukorerwa akarengane na Gitifu w’Umurenge Hanyurwabake, afatanyije n’umukozi w’Umurenge ushinzwe ubutaka Bimenyimana, baraza barayisenya”.

Nyirurugo akomeza avuga ko ibyo bakorerwa kuri bo babifata nk’akarengane kuko ngo mu gihe basenyaga inzu ye bamubwiye ko hatagenewe kubaka kandi ngo iyo bagiye kwaka ibyangobwa byo kubaka basanga nta kibazo cyahindutse kariya gace kagenewe gutura.

Muri aka gace harimo bamwe bacyubaka, Ubuyobozi bw’Akarere bukavuga ko ari abatishoboye

Asaba ko abayobozi bajya bihutira kumenyesha abaturage impinduka izo ari zo zose ngo kuko kutamenya amakuru bidindiza iterambere.

Yagize ati: “Nk’ubu nari maze kubaka inzu imaze gutwara agera kuri miliyoni 2, yose baraje bayikubita hasi. Ubwo se ikosa ni iryanjye cyangwa ni uko nta makuru dufite cyane ko n’ufite inshingano mu bijyanye n’ubutaka ku Murenge aguha uburenganzira bwo gutura, ariko undi Muyobozi akaza akabivuguruza.”

Maniriho Donat we avuga ko niba kubaka bitemewe aho batuye bakwiye guhabwa ingurane bakahimuka aho guhora basiragizwa n’ubuyobozi bwemera ibintu bugacya byahindutse.

Yagize ati: “Aha hantu urahabona ni ho ababyeyi bacu batuye ni ho twavukiye urabona ni ho bahinga, ariko ejo bundi ni bwo numvise ngo ni ubuhumekero bw’Akarere, abandi ngo ni mu gice cyahariwe inganda. None se nkatwe tuzabaho dute niba koko ari uko bimeze, ubu rero nta gushaka umugore kuko tubuzwa kubaka kandi mu buryo budasobanutse, rwose ubuyobozi nibudufashe buduhe umwanzuro, tube twahabwa ingwate tumenye ko imiryango yacu yimuwe hano.”

Tuyisingize Chadrack we ababazwa n’abayobozi baryumyeho bakanga gutanga amakuru ko hari impinduka ku gushushanyo mbonera, kugira ngo bakomeze kubona uko baka ruswa mu baturage.

Yagize ati: “Rimwe na rimwe hari ubwo baba bishakira akantu (ruswa) kuko n’ubwo yenda igishushanyo mbonera cyahindutse bamwe mu bayobozi baryumyeho banga gutanga amakuru ku mpinduka kugira ngo bakomeze banyunyuze abaturage.

Yakomeje agira ati: “Nibaze basobanurire abaturage icyo aka gace kagenewe n’aho ugiye bucece arubaka…”

Umuyobozi w’agateganyo w’Akarere ka Musanze Bizimana Hamiss, yavuze ko kuba abaturage b’Akagari ka Gakingo bubaka bagasenyerwa ari ikibazo cy’imyumvire kuko igishushanyombonera kivuguruye cy’Umujyi wa Musanze cyagaragaje ko aho bashaka gutura hahariwe amashyamba.

Yagize ati: “Hariya muri kariya gace ka Gakinga mu Mudugudu wa Buringo muri Shingiro, igishushanyombonera kivuguruye cy’Umujyi  wa Musanze cyerekana ko hariya hantu hagenewe amashyamba, ibi rero bikaba biterwa no kuba yenda nta makuru bafite cyangwa se babyirengagiza nkana. Tugiye kubaganiriza rero ndetse n’abo bivugwa ko ari abayobozi babasaba ruswa tubikurikirane. Ikindi abashaka kubaka bajye begera ubuyobozi cyane ko nta ngurane bariya baturage bari bahabwa ngo bivuge ko ubutaka butakiri ubwabo”.

Ku byerekeye inzu zirimo kuzamurwa muri ako gace, Umuyobozi w’Akarere Bizimana Hamiss avuga ko ari iz’abatishoboye, ndetse ngo izihasanzwe ni zo zirimo kuvugururwa.

Inzu ya Nyirurugo yasenywe kandi abona hari abandi bubaka
Umuyobozi w’agateganyo w’Akarere ka Musanze Bizimana Hamiss

NGABOYABAHIZI PROTAIS

  • Imvaho Nshya
  • Ugushyingo 13, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE