Musanze: Ku myaka 24 akora imashini zivanga beto, akoresha abasaga 60

  • Imvaho Nshya
  • Nzeri 14, 2023
  • Hashize amezi 8
Image

Nyuma yo kurangiza amashuri ku bijyanye n’ikoranabuhanga ryifashishije amashanyarazi (Electrical and Electronic Engineering) mu Ishuri Rikuru ry’u Rwanda ry’Imyuga n’Ubumenyingiro (Rwanda Polytechnic), Irankunda Claude w’imyaka 24 yahisemo kwihangira umurimo akora imashini zivanga beto (beton) aho kugeza ubu amaze guhangira umurimo abasaga 60.

Iradukunda wagize amahirwe yo kubona n’amahugurwa mu bijyanye n’ubushakashatsi n’iterambere, yashinze ikigo yise INNOVAHYPER Technologies, iteranya imashini zivanga beto.

Uyu rwiyemezamirimo ukiri muto abihuza no gukora ibiraka binyuranye aho kompanyi ye igenda yigisha abandi, mu Murenge wa Muhoza, Akarere ka Musanze. Avuga ko igikorwa nk’iki yagikoze agamije kwihangira umurimo mbere na mbere no kugira ngo awuhe abandi, ariko agamije no kubungabunga ibidukikije.

Avuga ko akimara kurangiza amashuri mu bijyanye n’ikoranabuhanga ryifashishije amashanyarazi yahise atekereza uburyo yabaho afite umurimo.

Ashingiye ku kuba hari zimwe mu mbogamizi zitera ibibazo abaturage byakemurwa n’ikoranabuhanga, avuga ko yahereye ku mafaranga y’u Rwanda 600,000 atangira umushinga wo guteranya imashini zikora beto ari na we uzisudirira.

Yagize ati: “Natangiranye abakozi babiri ariko kugeza ubu mfite abakozi 15 bahoraho bahembwa buri kwezi na ba nyakabyizi bagera kuri 45 kandi bagenda biyongera uko imirimo igenda iboneka”.

Irankunda avuga ko uretse no guhanga umurimo yari agamije no kubungabunga ibidukikije ndetse no kugabanya igiciro cy’abakenera kuvanga beto bakoresheje imashini.

Yagize at: “Hakomeje kwiyongera imyanda yi’bikoresho by’ikoranabuhanga bigira uruhare mu iyangirika ry’ibidukikije n’ubuzima bw’abantu. Iyo myanda tuyitunganya dukoresheje ikoranabuhanga rigezweho tugakoramo imashini z’ubwubatsi zifasha abantu kubaka bibahendukiye, tukagabanya ibitumizwa hanze kandi duteza imbere ubukungu bushingiye ku bumenyi. Ikindi ni uko kuri twe imashini zacu ku bifuza kuzikodesha byatumye ibiciro bigabanyuka aho ku munsi yakodeshwaga ibihumbi 70 twe tuyikodesha ku bihumbi 30”.

Bizamenyimana Noel, umwe mu bo kompanyi ya Irankunda yahaye akazi, avuga ko urubyiruko rukwiye gukomeza gutekereza uburyo rwakwihangira umurimo mu rwego rwo guhangana n’ubushomeri.

Yagize ati: “Njye mbona buri wese muri twe akwiye kureba uburyo yakwihangira umurimo akawuhangira n’abandi, iyi kompanyi ya Irankunda yatumye mbasha kubona akazi kandi mfite intego yo kuzakura hano igishoro nanjye ngahanga umurimo. Urumva amafaranga ibihumbi 300 umuntu akura hano buri kwezi ntiyabura kubona inguzanyo muri banki kuko dufite kontaro kandi na BDF, yishingira urubyiruko”.

Bizamenyimana akomeza avuga ko mu gihe amaze akorana na kompanyi ya Irankunda amaze kunguka byinshi kandi ngo ashingiye ko iyo ahembwe ajya mu matsinda n’ibimina amaze kwigurira ikibanza gifite agaciro ka miliyoni eshanu.

Uwurukundo Jeannine, umwe mu bagore bakorana na Irankunda mu bikorwa byo guteranya imashini no kuvanga beto iyo babonye ibiraka mu nyubako z’amaforofa, na we ashimangira ko umushinga w’imashini zikorerwa mu Rwanda ari ingirakamaro kuko ugabanya ibiciro by’ibitumizwa mu mahanga ndetse ukanatanga akazi.

Yagize ati: “Izi mashini ni kimwe mu byatumye mbona akazi kuko nari umuntu uhingira abandi, ariko iyo bari mu gikorwa cyo gusudira baziteranya nanjye mba ndi umukozi. Ubu mfite akazi gahoraho mbikesha umwe mu rubyiruko watekereje kujya akora izi mashini akagira n’izindi ajyana mu biraka hanze.”

Avuga ko kugeza ubu ahembwa amafaranga y’u Rwanda 120,000 ku kwezi, ndetse agasaba ko Leta yakomeza kuba hafi urubyiruko rwihebeye guhanga udushya kuko ari rwo ruzarushaho gutanga ibisubizo birambye ku bibazo by’ingutu bikigaragara. 

Irankunda watangiriye ku mashini 1 ubu amaze kwikorera izigera kuri 12 kandi ngo abantu benshi abona bazikunda kuko zihendutse, cyane ko imashini imwe akoze ayigurisha amafaranga y’u Rwanda miliyoni enye.

Irankunda yemeza ko bakomeje guhanga udushya mu ikoranabuhanga tuzaba tumaze kuba twinshi cyane bitarenze mu 2030, akaba amaze guhugura abarenga 70 mu guhanga udushya no kwihangira imirimo.

NGABOYABAHIZI PROTAIS

  • Imvaho Nshya
  • Nzeri 14, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE