Musanze: Kinigi barashimira Perezida Kagame wabakuye mu icuraburindi

  • NGABOYABAHIZI PROTAIS
  • Ugushyingo 25, 2023
  • Hashize amezi 6
Image

Abaturage bo mu Murenge wa Kinigi Akarere ka Musanze bashimira Perezida Paul Kagame ukomeje kubagezaho ibikorwa by’iterambere harimo imihanda, amazi, amashanyarazi, amashuri n’ibindi, ariko kuri ubu ngo bishimira amashanyarazi yabahinduriye izina ryo kuba baritwaga abanyeshyamba bakaba barasirimutse.

Drocella Mukeshimana ni umwe mu bagore baganiriye na Imvaho Nshya ubwo yabasuraga hari mu masaha ya sa kumi n’ebyiri n’igice , atuye mu Kagari ka Nyonirima.

Yagize ati: “Twishimira ibyiza Kagame agenda ageza ku Banyarwanda bose, ntabwo twemeraga ko hano muri aya mashyamba munsi y’ibirunga hagera urutsinga rw’amashanyarazi, umugore nkanjye nkava muri santere ya Kinigi ngataha Nyonirima mu bilometero 4, ubu kubera amatara rwose ubona ko ari ku manywa na bamwe bajyaga batwihisha inyuma y’ibi biti bakatwambura ntiwamenya iyo bagiye”.

Gashirabake Erasme na we umuturage wo mu Murenge wa Kinigi akorera mu mujyi wa Musanze, ataha aho bita muri Bisate

Yagize ati: “Ubundi twebwe batwitaga abanyeshyamba, kuri ubu kubera ibikorwa Kagame yagejeje ino ntibakitwita abanyeshyamba kuko babivugaga kubera umwijima wahabaga bakavuga ko tudasirimutse, kubera rero amatara yaje hano hahora ari nko ku manywa batwita abasirimu  ndetse benshi bifuza  kuza gutura ino kuko ni ho iterambere rigeze”.

 Yongeyeho ati: “Tekekereza ko iyo bavugaga muri Bisate wumvaga umuntu udasobanutse, ariko nawe urirebera ko twabaye Abanyarwanda basobanutse nari ngiye kuvuga ngo twabaye abazungu ariko twabaye Abanyarwanda babayeho neza bitewe na Kagame Paul wasobanuye iki gice cy’ibirunga”.

Abanyakinigi bavuga ko kuri ubu ari bamwe mu baturage babayeho neza ku bijyanye n’umutekano n’imibereho myiza kubera ibikorwa remezo.

Kankundiye Elizabeth yagize ati: “Ku myaka yanjye isaga 50, nakuze tugenda twiceka ku mabuye y’amakoro. Twebwe inda yaragufataga abagabo benshi bakavuga ngo bararwaye kubera gutinya umuhanda n’umwijima wo mu mashyamba, ariko kuri ubu ni yo ufashwe ubasha kwijyana uva mu rugo ukagenda wizeye ko udasitara, ubundi ukaba wizeye uru rumuri nawe ubona, mbese amatara hano yahinduye ubuzima kuko n’abantu ubu turatembera bukarinda bucya”.

Uyu mubyeyi yongeraho ko ngo kubera amashanyarazi, abana babo ntibagihunga aho bavuka cyangwa se ngo bagire ipfunwe ryo kwitwa abanyakinigi, ibi bigashimangirwa na Kavutse Eugene w’imyaka 27.

Yagize ati: “Uzi ko iyo wageraga Kigali watinyaga kuvuga aho ukomoka, wavugaga Kinigi bakakwita injiji wakongeraho akantu ka Bisate byo bikaba agatereranzamba.  Ubu kubera ko rero Perezida wacu Kagame yerekeje amaso n’umutima ku Banyakinigi, twarasirimutse ndetse bidutera n’igikundiro kubera ibikorwa remezo bisobanutse biri hano uhereye kuri aya mashanyarazi, amahoteli n’ibindi ntitukigira ipfunwe ryo kwitwa abanyakinigi bo ku ishyamba, cyangwa abo muri Bisate”.

Kugeza ubu, Umurenge wa Kinigi ni umwe mu bice by’u Rwanda bigize igicumbi cy’ubukerarugendo, abaturage rero bishimira uburyo imiyoborere myiza ya Perezida Paul Kagame ibintu byose yabishyize ku murongo ku buryo kariya gace kabaye Nyabagendwa, kandi umuturage agahabwa inyungu zikomoka ku bukerarugendo, bimuzamura mu iterambere n’imibereho myiza.

  • NGABOYABAHIZI PROTAIS
  • Ugushyingo 25, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE