Musanze: Kimonyi barashimira intwari zabohoye u Rwanda bakambara inkweto

  • NGABOYABAHIZI PROTAIS
  • Gashyantare 2, 2024
  • Hashize ibyumweru 4
Image

Mu byo abaturage ba Musanze kuva u Rwanda rwabohorwa ingoyi y’ivanguramoko, uturere n’amadini, harimo no kuba abaruharaniye baratumye bambara inkweto.

Batangaje ko ngo ko hari aho wageraga wambaye inkweto ukabihanirwa, ariko kuri ubu kwambara inkweto byabaye nk’umuco kandi bamenye ibyiza byo kuzambara harimo no kwirinda indwara zinyuranye.

Nzabahima Ildephonse wo mu Kagari ka Birira, uri mu kigero cy’imyaka 80, avuga ko yatangiye kwambara inkweto mu myaka ya za 2001 na bwo ngo ubuyobozi bubagiriye inama ariko bo ngo bumvaga ko ari ukubabuza uburenganzira bwabo.

Yagize ati: “Kwambara inkweto mbere y’uko Kagame abohora u Rwanda cyari icyaha rwose ndetse gikomeye, ubwo rero ngo wahagararaga imbere ya Burugumesitiri wambaye inkweto, byabaga ari agasuzuguru, wagombaga kuzambara wajya kugera imbere ya Komini ukazikuramo kugira ngo utamugera imbere akumva ko umwigereranyijeho, izi ntwari zabohoye u Rwanda zatubohoye no kumenya ibyiza by’urukweto, arakabaho Kagame”.

Uyu musaza akomeza avuga ko kuba bambara inkweto na byo babikesha ubutwari intwari zabohoye u Rwanda, zarakoze.

Yagize ati: “Inkweto ndibuka konseye wacu atubwira ko dukwiye kuzambara twese twamuteye amabuye, tumwemeza ko nta muturage wambara inkweto atari mwarimu, yemwe hari n’abava mu Kinigi bakaza bazifite mu bikapu bagera mu mujyi wa Musanze bakazambara, ariko ubu tumaze kubona ibyiza by’inkweto kuko intwari zabohoye u Rwanda zatubohoye ku mavunja, imyate, n’izindi ndwara zinyuranye, none se ko nta bantu nkibona bafite amavunja!”

Ikindi ni uko ngo kuba intwari zarabohoye u Rwanda byatumye n’ababagore bambaraga ingutiya nyinshi babicikaho ibintu ngo byatumaga barwara inda kubera umwanda.

Mundanikure Daphrose umukecuru w’imyaka 70, avuga ko iyo hataba kwibohora bari guhera mu bujiji kandi bwabaganisha ku rupfu.

Yagize ati: “Twahoraga twambaye ingutiya zitari munsi y’ebyiri, ubundi rero byaterwaga rimwe na rimwe no gutinya ko batwiba, tukambara ingutiya nyinshi, warebagamo izo ukunda ukazigerekeranya, ibi rero byatumaga duhora twitora, aho  abantu bazaga kugufasha kwitora inda mu mutwe, ubundi waba wiherereye nko mu murima ugakuramo ingutiya imwe ukayanika inda zigatinya izuba zikaza ukazica, twahoraga turwaye ubuheri, none ko bwagiye ntubona ko dusa neza, intwari zatubohoye mu tuntu twinshi tutari tuzi mu buzima bwacu”.

Umunyamabanga Nshingwabikorwa w’Umurenge wa Kimonyi Mukansanga Gaudence nawe ashimangira ko kwambara inkweto ndetse n’ingutiya nyinshi muri biriya   bice bya Musanze harimo n’Umurenge ayobora byari nk’umuco ariko kandi ngo byazanaga umwanda n’indwara ziwukomokaho.

Yagize ati: “Intwari zarakoze nk’uko abaturage babivuga kandi koko byari bikaze, aho umuntu abuzwa kwambara inkweto ari uburenganzira bwe ndetse ashoboye no kuzigurira, ugasanga umwana ageze ku ishuri azambaye bakavuga ngo ararangaza abandi, none se ko ubu bazambara mu mashuri no mu birori hose bitwaye iki? “

Yasabye abaturage gukomeza kurangwa n’isuku ndetse bagakomeza gushyigikira Paul Kagame wakomeje guha agaciro ubuzima bw’Umunyarwanda.

Kutambara inkweto ni bimwe mu bituma bikururira akaga umuntu harimo inzoka zinyuranye zigeza no ku ndwara y’imidido n’izindi.

  • NGABOYABAHIZI PROTAIS
  • Gashyantare 2, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE