Musanze: Hari abaturage bashingiwe amapoto umwaka urashize nta muriro

  • NGABOYABAHIZI PROTAIS
  • Werurwe 19, 2024
  • Hashize ibyumweru 4
Image

Abaturiye Umurenge wa Remera, Akarere ka Musanze, bavuga ko bahawe amapoto bo bita aya baringa kuko nta mumaro yabamariye mu gihe cy’umwaka n’igice nta rutsinga rw’amashanyarazi ruramanikwaho, bakaba bifuza ko bahabwa amashanyarazi.

Aba baturage bashimangira ko kuba nta mashanyarazi bafite bituma bahera mu bwigunge n’ubukene, harimo no kuba ngo bafite umutekano muke kubera ko hari insoresore zibambura, zikabacuza utwabo.

Habimana Eric yagize ati: “Kuri ubu tumaze umwaka n’igice bashinze amapoto y’amashanyarazi hano, ariko ibi biti ni ko nabyita ni baringa kuko batwijeje amashanyarazi nawe reba igihe gishize, none n’ibiti bitangiye kubora bitaratanga umusaruro, dusaba ubuyobozi kudufasha kubona umuriro byaba na ngombwa tukaba twashyiramo ingufu zacu niba byaba ngombwa ariko tukagira umuriro w’amashanyarazi.”

Mukamasabiro Patricie we avuga ko ngo bari babahaye imirasire ariko na yo kugeza ubu ngo nta ngufu ikigira.

Yagize ati: “Imirasire baduhaye hashize igihe kuri ubu yarashaje burundu twaheze mu icuraburindi, bari baje gushinga aya mapoto tugira ngo umuriro ugiye kutugeraho ariko amaso yaheze mu kirere. Ubu abajura baraturembeje bitwaje umwijima wa hano. Nk’ubu hari uwo baherutse gukurira inka mu kiraro bayizirika ku nsina bakajya bayinyuraho kubera umwijima Imana ikinga akaboko iboneka mu gitondo, baduhe umuriro bakureho aya mapoto ya baringa”.

Yongeyeho ati: “Ibyo batwijejwe ntabwo byatugezeho, turasaba abayobozi kudutekerezaho natwe tukajya ducana, kubera ko iyo hari kubona n’abajura batabona uburyo baza kwiba imyaka n’amatungo.”

Ubuyobozi bwa REG ishami rya Musanze ryo rivuga ko kugeza ubu habaye ibibazo by’ibikoresho harimo n’insinga, bukaba buvuga ko bwihaye intego ko mu mezi abiri uhereye muri Werurwe 2024 bizaba byabonetse bagakwirakwiza umuriro mu Mirenge yose yo muri aka Karere ka Musanze, ahashinzwe amapoto ndetse n’ahataragera umuriro w’amashanyarazi nk’uko Batangana Regis Umuyobozi w’ishami rya Musanze abivuga.

Yagize ati: ” ntabwo ari mu Murenge wa Remera gusa iki kibazo kiri kuko hose mu Karere ka Musanze, twagize ikibazo cy’insinga z’amashanyarazi, kuko twashinze amapoto tugeze ku gipimo cya 90% ubu rero muri Mata 2024, iki mibazo kizaba kimaze kubonerwa umuti, kuko insinga zirimo kugenda ziboneka buhoro buhoro”.

Mu Rwanda biteganijwe ko muri 2024, ingo zigera kuri 70% zigomba kuba zifite umuriro w’amashanyarazi ku miyoboro rusange, 30% zikoresha amashanyarazi akomoka ku mirasire cyangwa se izindi ngufu z’amashanyarazi.

  • NGABOYABAHIZI PROTAIS
  • Werurwe 19, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE