Musanze: Gashaki: Abasazuriwe amashyamba na Leta bizeye amasaziro meza

  • NGABOYABAHIZI PROTAIS
  • Ugushyingo 25, 2023
  • Hashize amezi 6
Image

Abaturage bo mu Karere ka Musanze, Umurenge wa Gashaki, Akagari ka Mbwe, bavuga ko bishimiye gahunda ya Leta yo gusazura amashyamba, kuko izabafasha kugira amasaziro meza.

Ishyamba ririmo gusazurwa Leta ibigizemo uruhare ni iryo ku musozi wa Mbwe, ufite ibilomtero 5, abaturage bashimishijwe nuko igikorwa cyabimburiwe n’umuganda wo kuri uyu wa 25 Ugushyingo 2023, bavuga ko amashyamba yabo yari agizwe n’ibiti byo myaka ya za 50 (1950), kandi kuri bo ngo byari kubasaba ikiguzi cyinshi.

Nsekanabo Gaudefroid yagize ati: “Maze imyaka igera kuri 48 mvutse nasanze aha hantu ari ibishyitsi gusa, njyewe rero aho bampaye nk’intekeshwa ibishyitsi byageze aho hakazamuka igiti ntikirenge umutaru, nakuragamo ibyo gushingiriza gusa  najya kubaka bikansaba kubanza kugura, kuvugurura iri shyamba nabonaga bizantwara amafaranga atari munsi y’ibihumbi 500, reba kuranduramo ibi bishyitsi, kongera kuharima, kugura ingemwe, urumva ari ibintu byari binyoroheye koko ndashima ko Leta ije kutwunganira”.

Yongeraho ko n’ibiti byari bimaze gufatwa n’indwara kubera ubusaza, bityo ngo bikaba byari ngombwa ko bafashwa gusazura ishyamba.

Yagize ati: “Amashyamba yacu uretse no kuba ashaje byari bitangiye kugaragara ko kubera kumara igihe kirekire bayasarura ubundi bakayatema atarera byatumye haba uburwayi burimo kugwingira ku buryo wabonaga igisigaye ari ugukuraho imyeyo gusa, n’inda zari zatangiye gufata amashyamba yacu, urumva na we ishyamba rimaze imyaka isaga 60 aba ari ikibazo; iki gikorwa turakishimiye turashimye cyane”.

Mukamwezi Dancile we asanga ari iby’igiciro gikomeye kuri bo bageze mu za bukuru ngo kuko ariya mashyamba yabo ubwo avuguruwe, bizatuma basaza neza babona inkwi ndetse bakuremo n’amafaranga ariko kandi agashima uburyo abayobozi bo mu nzego zo hejuru baza kwifatanya na bo babaterera ibiti.

Yagize ati: “Njye ndabanza gushimira Perezida Kagame wumva ibibazo by’umuturage mu mpande zose, aya mashyamba ku bwacu ntitwabasha kuyavugurura, kuko ni yo twabikoraga twateraga ingemwe muri ibi bishyitsi bikazonka ntizikure, ikindi nanone wavugururaga ishyamba ryawe uwo mwadikanyije atabikoze na bwo ishyamba ryawe ntirikure twabikoraga mu kajagari, ubu rero urabona ko umusozi wose ugiye gusazurirwa icyarimwe, kandi baduhaye ingemwe nziza zidapfa gufatwa n’uburwayi baduhaye mayideni bamwe bakunze kwita nyamweru, ubu nizeye ko nzasaza neza ntagiye gutoragura ishingwe kuko nzaba mfite ishyamba rimeze neza”.

Ubwo hatangizwaga iki gikorwa cyo gufasha abo muri Mbwe gusazura amashyamba, Minisitiri w’Umutekano mu gihugu Aphled Gasana, ari kumwe n’Abadepite, Abasenateri kimwe n’abayobozi b’Intara y’Amajyaruguru yabasabye gukomeza kwita ku mashyamba kandi abizeza ko Leta izakomeza kubaha ibikenewe kugira ngo amashyamba yabo akomeze amererwe neza.

Yagize ati: “Amashyamba ni kimwe mu bidukikije, ariko nanone mumenye ko ari ubukungu, uyu munsi twateye ibi biti hano, ariko muzirikane ko hari ahandi hakeneye gutera amashyamba mu rwego rwo kubungabunga ibidukikije ndetse no kwiteza imbere, Leta rero izakomeza kwita ku mashyamba, haterwa ayandi aho atari ndetse hanavugururwa ashaje”.

Kuri uyu musozi wa Mbwe hatewemo ibiti bigera ku bihumbi 3, ariko iki gikorwa kizakomeza abaturage bahabwa ingembwe z’ibiti by’inturusi bihangana n’uburwayi, aho abaturage banavuga ko bizabafasha gukomeza guhangana n’isuri.

Abaturage basazuriwe amashyamba kandi bakaba bagira inama bagenzi babo bagiseta ibirenge ngo ntibasazura amashyamba yabo ko barimo kwihombya ahubwo icyiza ari uko babikora Leta ibibafashijemo.

  • NGABOYABAHIZI PROTAIS
  • Ugushyingo 25, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE