Musanze: Barambiwe kunyagirirwa mu isoko rihuza Uturere tubiri

  • NTAWITONDA JEAN CLAUDE
  • Werurwe 10, 2024
  • Hashize ukwezi 1
Image

Abagana n’abakoresha isoko rya Gataraga riherereye mu murenge wa Gataraga, Akarere ka Musanze babangamirwa n’imvura ibanyagirira ibicuruzwa mu isoko babona nka mpuzamahanga kuko rihuza abaturage bo mu Turere dutatu.

Isoko rya Gataraga rihurirwamo n’abaturage baturutse mu Karere ka Rubavu bazanamo inkweto, abo muri Nyabihu no muri Musanze bazanamo ibicuruzwa bitandukanye.

Bavuga ko ikibazo kitagarukira mu bihe by’imvura gusa kuko n’izuba ribamerera nabi cyane mu gihe cy’impeshyi,  bakaba basaba ko ryakubakwa bakabona aho bakorera bisanzuye ndetse bizeye umutekano waho.

Iri soko usanga ryiganjemo ibicuruzwa binyuranye harimo ubuconsho, ibyambarwa n’imyaka, yemwe n’abanyabukorikori,  bose bakaba bavuga ko babangamirwa no kuba ritubakiwe.

Maniriho Sylvere yagize ati: “Nkanjye urabona ko nshuruza inkweto, amasabune, amakaye n’ibindi kandi ntandika hasi. Iyo imvura iguye ibicuruzwa byanjye imvura inyura hasi ikabyangiza bigatoha, birumvikana ko n’iyo hejuru iba yanyagiye igahura n’iyo hasi bikajandama. Hari bimwe rero imvura iba yatoheje cyane kuko dusiga dutwikiye tukajya kwiyugamira biba byapfuye tukajugunya.”

Yemeza ko kuba iri soko ritubakiye ari kimwe mu bituma na bamwe mu barikoreramo bagenda biguruntege mu kwitabirira gahunda ya Tin Number (nomero iranga umukoresha) nk’uko Perezida w’iri soko Ntwari Joseph abivuga.

Yagize ati: “Iri soko ryacu rirema buri munsi ariko riremura mu masa sita kubera imvura ariko nabwo nyine biterwa n’uko ikirere cyaramutse, mu bihe by’izuba byo bigera nka saa kumi, ariko izuba na ryo riratwangiriza. Ubuyobozi burabizi ko iri soko ari ikibazo kandi dutanga n’imisoro.”

Akomeza avuga ko nk’umuyobozi bimugora gukora ubukangurambaga ku bacuruzi bwo gutunga nomero iranga usora, cyane ko na bo bamubaza igihe bazabona isoko rimeze neza.

Yakomeje agira ati: “Kuba iri soko ritubakiwe bituma n’ibisambo byiba uko bibonye kuko nk’ubu iyo umuntu ahubuje ikintu arengera mur ibi bibaya”.

Ubuyobozi bw’Akarere ka Musanze buvuga ko iki kibazo bukizi, kandi burimo kugishakira ingengo y’imari ku buryo kizakemuka mu minsi iri imbere.

Umuyobozi wungirije w’Akarere ka Musanze ushinzwe iterambere ry’ubukungu Uwanyirigira Clarisse, ygize ati: “Ikibazo cy’isoko rya Gataraga turakizi kandi turimo kugishakira umuti urambye. Kuri ubu hari rwiyemezamirimo ugiye kubakamo ibagiro rya kijyambere, nyuma y’aho Akarere na ko karimo guteganya ko kazabona ingengo y’imari kakubaka ririya soko mu minsi mike, navuga ko abaturage bashonje bahishiwe.”

Iri soko rihurirwamo n’abavuye mu Turere dutatu, ryakira abasaga 1500 ku munsi, rikaba riri ku butaka bwa hegitari zisaga eshanu.

Abanyabukorikori bo muri Gataraga cyane abadozi n’abandi bavuga ko banyagirwa
  • NTAWITONDA JEAN CLAUDE
  • Werurwe 10, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE