Musanze: Abofisiye bahagarariye ibihugu 11 bizihije Umunsi w’Umuco

  • NTAWITONDA JEAN CLAUDE
  • Mutarama 12, 2024
  • Hashize amezi 5
Image

Abasirikare bakuru 49 biga mu Ishuri Rikuru rya Gisirikare ry’Ingabo z’u Rwanda riherereye i Nyakinama mu Karere ka Musanze baturutse  mu bihugu 11, bamuritse umuco wo mu bihugu baturukamo.

Abo basirikare bizihizaga Umunsi wahariwe Umuco wizihijwe ku nshuro ya 11 bagaragaje ubuhanga n’umwihariko bikubiye mu muco w’ibihugu byabo babigaragariza mu gutegura ibyo kurya n’imirire, imyambarire imbyino n’ibindi.

Abofisiye 49 bitabiriye kwizihiza uwo munsi ni abarimo kwiga mu cyiciro cya 12 cy’amahugurwa agenerwa abayobozi bakuru mu ngabo nka bumwe mu buryo bwo kwimakaza ubutwererane n’ubufatanye mu bya gisirikare.

Guhurira mu munsi nk’uyu bifasha abanyeshuri kurushaho kumenyana, gushyigikirana, gukorera hamwe ndetse no kugirana imibanire myiza hagati yabo hatitawe ku mico itandukanye baturukamo.  

Umuyobozi w’Ishuri Rikuru rya Gisirikare rya Nyakinama Brig Gen Nyamvumba Andrew, wahagarariye Umugaba Mukuru w’Ingabo z’u Rwanda Gen Mubarakh Muganga, yavuze ko uyu munsi washyizweho n’iryo shuri kubera agaciro gahabwa umuco wa buri gihugu.

Yagize ati: “Umunsi wahariwe Umuco wateganyijwe n’iri shuri rikuru kubera agaciro gahabwa umuco wose wa buri gihugu. Na none kandi bijyanye n’igisobanuro cy’umuco no gusangira ibitekerezo n’ubumenyi.”

Yavuze ko intego nyamukuru y’Ishuri Rikuru ayoboye ari iyo gutanga ubumenyi no kubaka ubushobozi bw’Ingabo z’ibihugu harimo no kongera ubumenyi burebana n’umuco.

Ati: “Reka twemeranywe ko bitoroshye gukorana cyangwa kuguma mu itsinda rimwe mu gihe nta bumenyi buhari ku mico itandukanye y’abagize iryo tsinda.”

Col Pascal Munyankindi, umwe muri abo bofisiye barimo kongererwa ubumenyi,  yavuze ko kwizihiza Umunsi wahariwe Umuco birenze kugaragaza itandukaniro ry’imico y’abitabiriye.

Ati: “Kwizihiza uruhurirane rw’imico si ukugaragaza ibidutandukanya; bijyanye no kuzirikana imbaraga ziri muri iryo tandukaniro. Buri mugenzo, buri nkuru n’imyemerere, bigira uruhare mu bunararibonye karemano bwa muntu.”

Yakomeje avuga ko ubushake bwabo bwo kwigira buri umwe ku wundi, kwakira ibibatandukanya nk’amahirwe yo kongera imbaraga, ari byo bituma barushaho gukomera, kumenyera ubuzima bwose cyane cyane bakabasha no kuzuza inshingano kinyamwuga nk’abayobozi b’abandi basirikare.

Ibihugu bihagarariwe muri uyu mwaka w’amashuri ni Botswana, Ethiopia, Kenya, Malawi, Nigeria, Senegal, Sudani, Tanzania, Uganda, Zambia n’u Rwanda rwakiriye abo banyeshuri.

  • NTAWITONDA JEAN CLAUDE
  • Mutarama 12, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE