Musanze: Abaturage baratabaza kuko abacukura ibumba babasiga mu manegeka

  • Imvaho Nshya
  • Ugushyingo 9, 2023
  • Hashize amezi 4
Image

Bamwe mu baturage bo mu Mirenge inyuranye y’Akarere ka Musanze, bavuga ko babangamirwa na ba rwiyemezamirimo bacukura ibumba ryo kubumba amatafari bakanayatwika, maze aho bacukuye bagasiga hanamye bari mu manegeka, ntibahatere ibiti cyangwa se ngo basibe ibinogo, bikaba bibangamiye abahaturiye kandi byangiza ibidukikije.

Ugirumurengera Thadee utuye mu Murenge wa Muhoza, Akagari ka Kigombe, ahacukurwa ishwagara ikoreshwa nko kurwanya ubusharire mu butaka, avuga ko kuba hari bamwe mu bashoramari bakurikirana imari gusa ntibite ku bidukikije ndetse n’imibereho y’abantu, ari kimwe mu bibangamira ubuzima bwabo.

Yagize ati: “Hano ni hamwe mu hacukurwa ishwagara ijya gukoreshwa mu buhinzi, ariko uyu rwiyemezamirimo hano acukura iyo shwagara atitaye ko inzu zacu hano zishobora kuriduka. Ikindi ni uko adatekereza ko ibi bisimu bishobora kudutwara ubuzima, nifuzaga ko aba bose bacukura haba ishwagara, itaka ribumba amatafari cyangwa se amategura bakumva ko icya mbere ari ubuzima bwa muntu, bakanita ku bidukikije, bagatera hano ibiti ubundi bagasiba ibinogo, kandi ubuyobozi bukabigiramo uruhare rukomeye”.

Umwe mu baturage bo mu Murenge wa Musanze, Akagari ka Cyabagarura, ahacukurwa umucanga Mukankusi Elizabeth avuga ko hakwiye ko ahacukurwa umucanga cyangwa se amabuye y’agaciro hajya haba ahantu hitaruye abaturage.

Yagize ati: “Nk’ubu aha hantu duturiye ni hamwe mu hacukurwa umucanga mu bihe by’izuba; usanga ivumbi ridusanga mu nzu, hakaba nubwo rwiyemezamirimo acukura agakurikira ubutaka yita ko yaguze ariko ntazirikane ko hari inzu ari gusatira bikagera ubwo zjya mu manegeka. Nifuza ko abaturage mu gihe ahantu aha nk’aha habaye ibirombe bikwiye ko n’umuturage hajya harebwa uburenganzira bwe ndetse n’ibidukikije bigahabwa agaciro, kuko hari abacukura ariko ntibibuke gutera ibiti, no gusiba ibinogo”.

Kuri iki kibazo ubuyobozi bw’Akarere ka Musanze, buvuga ko bikwiye ko ba rwiyemezamirimo bakora ibikorwa byabo, ariko nanone bikaba bikwiye ko bazirikana no ku buzima bw’umuturage, nk’uko Musoni Protais Umukozi w’Akarere ka Musanze Ushinzwe Amashyamba n’Umutungo Kamere  yabitangarije Imvaho Nshya.

Yagize ati: “ Ubundi abafite ibirombe bose  bakwiye kumva ko  icya mbere ari ubuzima bw’umuntu, kuko kumva ko umuntu yashoye amafaranga mu bucukuzi agashora ubuzima bw’abantu mu kaga ni ikintu cyo kwitondera, tukaba dusaba abo bose bakora ubucukuzi, kumva ko bakwiye kujya basiba ibinogo ndetse bagatera ibiti n’ibindi bimera bifata ubutaka aho hose baba bamaze gucukura”.

Ku byerekeye gukorera ubucukuzi ahitaruye abaturage basaba na byo yabigarutseho.

Ati: “Ngira ngo ni yo gahunda ya Leta, ko abagiye gukora ubucukuzi bumvikana n’abo bahasanze bakabagurira, kandi utubahiriza amategeko mu bucukuzi wese akazakurikiranwa ubu rero hagiye kumanuka itsinda twongere turebe abo bose batubahiriza amabwiriza”.

Mu Karere ka Musanze hakorerwa ubucukuzi bw’ibumba ribumbwamo rikanatwikwamo amatafari n’amategura  umucanga, amabuye yo kubaka ndetse n’itaka ryo guhoma inzu, abakora uyu mwuga bose bakaba basabwa kubungabunga ibidukikije  cyane ko habarurwa  amakompanyi agera kuri 70, ari ko inzira ikaba ikiri ndende kugira ngo amabwiriza yo kubungabunga ibidukikije yubahirizwe.

NGABOYABAHIZI PROTAIS

  • Imvaho Nshya
  • Ugushyingo 9, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE