Musanze: Abari ba rushimusi bahindutse ababungabunga ibidukikije

  • NTAWITONDA JEAN CLAUDE
  • Werurwe 16, 2022
  • Hashize imyaka 2
Image

Mbere y’umwaka wa 1994, abaturiye Pariki y’Igihugu y’Ibirunga barayivogeraga bakajyamo gutega inyamaswa, bakazishimuta, bagatema ibiti bagatutira, ibyo byatumaga habaho kubangamira ibidukikije muri rusange, by’umwihariko inyamaswa zigashimutwa.

Uko iminsi yagiye iza Leta y’Ubumwe bw’Abanyarwanda ibonye ko abaturage bakomeza gusatira Pariki ari nako ba rushimusi bakomeza gutega inyamaswa, yashyizeho gahunda yo kubasobanurira ko bashobora kugira imibereho myiza babikesha kubungabunga ibidukikije, umusaruro ukomoka mu bukerarugendo ukabagirira akamaro.

Bamwe muri ba rushimusi kimwe n’abakomoka mu miryango yashimutaga inyamaswa muri Pariki y’Ibirunga bagaragaza uburyo bajyaga muri iyo Pariki gutegamo imitego kimwe n’abajyagamo gututiramo ibiti, ibyo bikaba byaragiraga ingaruka ku rusobe rw’ibinyabuzima.

Barora avuga ko yishe inyamaswa nyinshi akiri rushimusi

Barora Leonidas utuye mu Mudugudu wa Nyakigina, Akagari ka Nyabigoma, Umurenge wa Kinigi mu Karere ka Musanze yivugira ko yahoze ari rushimusi uzi ishyamba rya Pariki y’Ibirunga kuko yarihizemo igihe kirekire, ahamya ko yinjiye mu bikorwa byo gushimuta inyamaswa kandi ko atahushaga inyamaswa iyo yabaga atamitse umwambi.

Yagize ati: “Kuva kuri Muhabura kugeza kuri Kalisimbi hose ndahazi kuko nirirwaga ndivogera nshakamo inyamaswa mu gihe namaze, mu ishyamba ntabwo nzi umubare w’inyamaswa nishe kuko ni nyinshi cyane.”

Barora Leonidas ufite imyaka 69 avuga ko yajyaga muri Pariki y’Igihugu y’Ibirunga gutegamo imitego no kurasa inyamaswa kugira ngo abone inyama zo kurya.

Yagize ati: “Nta nyamaswa yo muri Parike y’Igihugu y’Ibirunga ntariyeho uretse ingagi yo nyitinyira kuba imeze nk’abantu.”

Yavuze ko yamaze imyaka irenga 35 ari umuhigi akaza kubireka mu mwaka wa 1998 nyuma yo gufashwa n’ubuyobozi bwa Pariki, bukamusobanurira ko ashobora kubaho akabona inyama kandi yaretse ubushimusi.

Ntiruginama Anastase wo mu Murenge wa Gataraga we avuga ko yahize muri Pariki y’Ibirunga kuva akiri umwana ajyana na se kugeza mu mwaka wa 2000, ariko ko nta mafaranga yakuyemo, uretse kurya inyama z’inyamaswa yabaga yishe.

Barora Leonidas wari umukogoto mu guhiga inyamaswa muri Pariki y’Ibirunga

Umwe mu babyeyi we yavuze ko atateze inyamaswa, atakoze ubushimusi, ahubwo ko we yajyaga gutashya inkwi muri Pariki y’Igihugu y’Ibirunga.

Ati: “Njye sinategaga inyamaswa, ahubwo najyaga njya mu ishyamba ry’Ibirunga gutashyamo inkwi zo guteka. Nabyo naje gusobanukirwa neza ko bibangamira urusobe rw’ibinyabuzima, ndeka gusubiramo.”

Gusobanukirwa ibyiza byo kubungabunga Pariki byabagezeho

Umuyobozi wa Pariki y’Igihugu y’Ibirunga Uwingeri Prosper yemeje ko ibikorwa bya ba rushimusi byacitse ko ndetse uwo bafashe cyangwa baketse habaho kubigisha ku bufatanye n’inzego hamwe n’amakoperative y’abahoze ari ba rushimusi ndetse bakinjizwa mu nyungu z’ubukerarugendo.

Ati: “Ubushobozi bwose bubonetse yaba ubw’Urwego rw’Igihugu rw’Iterambere RDB cyangwa umutungo waturutse muri pariki 10% yayo akoreshwa mu gukemura ibibazo rusange muri byo hakaba harimo no guteza imbere za koperative z’abahoze ari ba rushimusi”.

Yongeyeho kandi ko hashyizweho itegeko mu 2018 ryo kurinda ibidukikije, rigena ibihano n’amande ku wangije ibidukikije ava ku mafaranga y’u Rwanda 300,000 kugeza kuri miliyoni 10.

Kuba ba rushimusi barahinduye umuvuno bakayoboka inzira yo kurengera ibidukikije barikengeye kuko wasangaga harimo guhangana kw’abaturage n’abarinzi ba Pariki y’Igihugu y’Ibirunga. Nyuma yo gushyiraho iryo tegeko ubu nta muturage ukitwara uko ashatse, iyo hari ibibazo biganirwaho bigashakirwa ibisubizo ku buryo uko bakorana n’abarinzi bwarahindutse cyane.

Uwingeri yagize ati: “Ibibazo bisigaye ni ibisanzwe, iyo inyamaswa zasohotse turabyumva kandi tukabishakira ibisubizo, wibwiye ko nta bibazo bihari ahubwo cyaba ari cyo kibazo.”

Ubukerarugendo bwarasubukuwe mu gihe cya COVID-19

Mu gihe cy’icyorezo cya COVID-19, ubukerarugendo bwarasubukuwe hakomeza kubahirizwa amabwiriza yabaga yashyizweho yo kwirinda ikwirakwira ryacyo.

Umuyobozi wa Pariki y’Igihugu y’Ibirunga Uwingeri yavuze ko mukerarugendo usura yishyura amadolari y’Amerika 1500 ku banyamahanga, ku munyafurika ni 500.

Yongeyeho kandi ko abana bavuka ubungubu ari abana batazaba ba rushimusi kandi bashobora kuba baravutse kuri ba rushimusi, buri mwaka haba hari abaza mu ngendoshuri zitari munsi ya 30.

Kuba abanyamahanga biyumvamo gusura ingagi, binyura mu bukangurambaga mu mashuri, abarezi, n’abandi; ariko ikintu cya mbere abaturage bagiranye amasezerano n’Ubuyobozi bizeza ko batazahwema kubungabunga Pariki y’Igihugu y’Ibirunga, kuko umusaruro uva mu bukerarugendo ubagezaho ibikorwa by’ingenzi birimo amashuri, amavuriro, amazi meza n’ibindi.

Ingagi zo mu misozi ziboneka muri Pariki y’Igihugu y’Ibirunga zariyongereye kubera kwitabwaho, kandi zinjiriza Igihugu amadovize zikanateza imbere abaturage

Abaturiye Pariki bagenerwa 10% by’amafaranga yinjijwe n’ubukerarugendo

Ibikorwa abaturage bahabwa biturutse ku mafaranga yavuye mu bukerarugendo, byatumye bibona mu ruhande rwo kubungabunga Parike, abajyaga kwica amafumberi, abajyagamo guhakura babicikaho.

Uwingeri yatangaje ko muri Pariki bakoresheje kubumbira hamwe abajyaga bashimuta, bagahabwa akazi, borozwa amatungo… ndetse mu mafaranga yinjiye mu bukerarugendo, 10% agakoreshwa mu bikorwa bifasha abaturage mu buzima bwabo bwa buri munsi, ibyo bituma batongera kwangiza ibidukikije.

Ati: “Mu 2019 twatanze inka 749, hari abahawe intama,… kugira ngo babifate nk’aho byagera kuri buri wese. Twatanze amatungo, hari abo twahaye akazi ko gutwaza ba mukerarugendo.”

Yongeyeho ko inyungu zituruka kuri abo bahawe akazi zigera no ku bandi. Ati: “Dufite amakoperative tubaha akazi, izo nyungu zikazagera no ku bandi batayarimo. Bishyurirwa ubwishingizi, harimo imihigo yo kubungabunga Pariki y’Igihugu y’Ibirunga.”

Ingagi zariyongereye kubera kubungabunga Parike y’Ibirunga

Mu 2003 habaruwe ingagi zisaga ho gato 380 mu gace k’Ibirunga, 2016 zariyongereye ziba 604, hari imiryango itarenze 8 none ubu ni imiryango 22. Twishimira kwiyongera n’impinduka ireba ku baturage ku iterambere, mbere hari hoteli imwe gusa ya Muhabura, ubu hari menshi, umuhanda waratunganyijwe uriho amatara.

Mbere ya COVID-19 twari tugeze kuri ba mukerarugendo barenga 35 000 binjije milirayi zirenga 26 ku mwaka. Ingagi zariyongereye n’umutungo uturuka muri Pariki wariyongereye.

Kuki ari ngombwa kubungabunga ingagi?

Uwingeri yasobanuye ko ingagi zibungabungwa kugira ngo zibeho kuko nazo zifasha kubaho.

Umuyobozi wa Pariki Uwingeri Prosper

Ati: “Ingagi turazibungabunga kugira ngo zidufashe natwe kubaho. Tugaragariza Isi ko tuzitayeho, tuziha agaciro.”

Kwita Izina bimaze iki?

Kwita abana b’ingagi izina biri mu guhanga udushya kandi bigaragaza ko zibungabunzwe, atari mu Rwanda gusa, ahubwo bimenyekana ku Isi yose. Umwaka wa 2020 hiswe izina abana b’ingagi 24.

Ati: “Tuba tugaragariza Isi ko kubungabunga ingagi ari inshingano ya buri wese ari ku rwego rw’u Rwanda n’Isi, kuko kubungabunga ingagi, ziri mu rusobe rw’ibinyabuzima kandi rutagira aho rugarukira.”

Yongeyeho ko uko zigenda ziyongera ari nako ziba zikeneye aho kuba zisanzuye, akaba ari yo mpamvu harimo kwagurwa ubuso bwa Pariki, bikaba ari no kuzirinda indwara, kuba zaza mu baturage za nyungu zikavamo.

Ku bijyanye n’ubuso bwa Pariki, hagati y’imyaka 60-70 iyi Pariki yahombye 54%, noneho ingagi zari 450 muri 60 ziramanuka muri 70 hasigara izisaga 200 …  kubera ko abaturage bayisatiraga bahingamo ibireti, baragiramo inka.

Kwita Izina ni umuhango ugaragaza ko u Rwanda rubungabunga ingagi

Abashimutaga inyamaswa bahinduye imyumvire bibumbira mu makoperative

Barora Léonidas avuga ko nyuma yo gusobanukirwa neza ibyiza byo kubungabunga ibidukikije ubu yaretse guhiga inyamaswa.

Ati “Leta yaje kutubumbira mu makoperative, ubu turahembwa ku kwezi kimwe n’abandi bakozi bose bahemberwa ukwezi.”

Barora atangaza ko kuri ubu atatinyuka gusubira muri Pariki y’Igihugu y’Ibirunga agiye guhiga, ahubwo ko ubu ari we ugomba kuyibungabunga cyane ko basobanukiwe ibyiza byo kubungabunga ibidukikije.

Ati“Ngereranyije na mbere tukiri abahigi, ubu twagarutse ibumuntu kuko tukiri abahigi twari tumeze nk’inyamaswa natwe, kuko nta mwanya twabonaga wo kwitera utuzi cyangwa ngo dufure umwambaro, ndetse nta nubwo twaruhukaga kuko twazindukiraga mu ishyamba tukavayo buhumanye, ugasanga hari ubwo uvuyeyo nta n’inyamaswa ufashe.”

“Ntitwari abahigi ahubwo ba data ni bo bari ba rushimusi”

Bamwe bigaragara ko bakiri bato ku bijyanye no kuba bari ba rushimusi, basobanuye ko bo batahize inyamaswa muri Pariki y’Igihugu y’Ibirunga, ahubwo bakomoka ku bisekuru byahoze bikora ubushimusi.

Mukandayisenga Dorocelle yavuze ko we atakoze ubushimusi ariko ko ababyeyi, babo ari bo bari ba rushimusi.

Ati: “Ba data ni bo bari ba rushimusi bajyanaga na ba mama. Twe turi abana babo, baje bashakisha babaza abana ba runaka ngo bari he? Bati umwana wa runaka wahoze ari umuhigi, ari rushimusi tukaza, mazemo imyaka 10. Nkorera amafaranga naguze ikibanza ndimo kubaka inzu kandi n’umwana wanjye arimo kwiga.”

Abibumbiye muri koperative bahanga ibikoresho bitandukanye bibinjiriza amafaranga kuko babigurisha abashyitsi babagana

Nyirabakunzi Jeanne d’Arc w’imyaka 21, avuga ko kuba muri koperative   byatumye agira ubumenyi ku kubungabunga Pariki n’inyamaswa zirimo.

Ati: “Data na sogokuru ni bo bari ba rushimusi, nageze aha mpungukira ubumenyi butuma dushishikariza n’abandi baturage kwirinda kujya mu bushimusi.”

Ikigo cy’Amahugurwa cy’abahoze ari ba rushimusi, igisubizo ku kubungabunga ibidukikije

Bamwe mu baturage bo mu Murenge wa Kinigi mu Karere ka Musanze, ahakorera ikigo cy’Amahugurwa cy’abahoze ari ba rushimusi Gorilla Guardians Village,  ndetse n’abakomoka muri iyo miryango bavuga ko kuva mu bushimusi bakishyira hamwe bibafasha kubungabunga ibidukikije ndetse bakiteza imbere.

Abakozi bakora muri icyo kigo ni bamwe mu bakomoka mu miryango yahoze ishimuta inyamaswa muri Pariki y’Igihugu y’Ibirunga, bavuga ko kuri ubu batakibikora ahubwo babungabunga iyo Pariki.

Murekatete Floride utuye mu Murenge wa Musanze, Akagali ka Garuka mu Mudugudu wa Gacinyiro, yagize ati: “Mu myaka 9 niteje imbere. Ndi umugore ndubatse mfite abana babiri ndabarihira ntabwo umwana wanjye bamwirukana ngo nabuze ayo mwishyurira ku ishuri.  Muri ya mafaranga ava mu bukerarugendo (revenue sharing) naguze inka iramfasha mbona ifumbire ntarushye.”

Umuyobozi w’Ikigo cy’amahugurwa cy’abahoze ari ba rushimusi Gorilla Guardians Village, Hagumimana Jean Bosco yasobanuye ko ba rushimusi bajyaga binjira mu ishyamba, muri Pariki bategamo inyamaswa zirimo ifumberi ndetse bakangiza n’urusobe rw’ibinyabuzima. Yavuze ko kuri ubu ari abo bari ba rushimusi ndetse n’abakomoka muri iyo miryango ahubwo ari bo basigaye babungabunga Pariki.

Yagize ati: “Abari ba rushimusi kuri ubu ni bo uyu munsi babungabunga ibidukikije ntibakijya muri Pariki y’Ibirunga, hano mu kigo bakora ibihangano by’ubukorikori byinshi bitandukanye birimo inkoni, ibiseke, abakora ubuhinzi, abari mu bworozi, n’ibindi bakabigurisha bakabona amafaranga bakikenura bakanagura akaboga, hari n’aberekana umuco nyarwanda.

Ntabwo bakijya mu ishyamba ahubwo ayo mafaranga babona barayafata bakajya kugura inyama ku isoko ntibakijya mu ishyamba, bakishyurira abana babo amashuri. Ubu mu ishyamba inyamaswa ziratuje. Uyu Barora yishe imbogo nyinshi, ifumberi nyinshi ariko ubu ntakijyayo.”

Umuyobozi wa Pariki y’Igihugu y’Ibirunga Uwingeri atangaza ko mu Mirenge 12 ikikije Pariki y’Igihugu y’Ibirunga harimo koperative zirenga 40, zifite abanyamuryango basaga 5000, bagira uruhare mu bikorwa byo kuyibungabunga.

Pariki y’Igihugu y’Ibirunga icumbikiye ingagi n’urundi rusobe rw’ibinyabuzima
Ibyumba by’amashuri byubatswe bigabanya ingendo ndende abana bakoraga ndetse bikagabanya n’ubucucike
Hari inzu abavuye gusura Ibirunga baruhukiramo
Gorilla Guardians Village ni ikigo cyubatse hafi y’Ibirunga
Gorilla Guardians Village cyangwa Iby’iwacu Cultural Village ni ikigo abahoze ari ba rushimusi bigishirizamo ba mukerarugendo amateka y’u Rwanda
  • NTAWITONDA JEAN CLAUDE
  • Werurwe 16, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE