Musanze: Abakozi ba Unguka Bank Plc bahuguwe ku buhinzi

  • Imvaho Nshya
  • Gicurasi 18, 2022
  • Hashize imyaka 2
Image

Abakozi ba Unguka Bank Plc bagera kuri 22 basoje amahugurwa y’iminsi itatu yatangiye taliki ya 16 Gicurasi 2022 yabereye mu Karere ka Musanze, ajyanye n’ubuhinzi.

Mu Rwanda ubuhinzi ni bwo bwa kabiri bwinjiriza igihugu amadevise menshi aturuka mu musaruro utandukanye woherezwa mu mahanga kandi butanga imirimo mu gihe ari bwo butunze hejuru ya 70% by’Abanyarwanda.

Mu mafaranga y’inguzanyo Unguka Bank Plc yatanze kugeza mu mwaka ushize, 8% ari mu buhinzi, ikaba ifite intego yo kuyongera.

Ni muri urwo rwego abakozi bayo bari guhugurwa kugira ngo barusheho gusobanukirwa ibijyanye n’ubuhinzi babihuze n’ubumenyi bafite mu bijyanye no gutanga no gucunga inguzanyo, ubundi barusheho kwegera abahinzi no kubaguriza aho bikenewe.

Muri iyi minsi itatu aya mahugurwa yibanze ku bihingwa bibiri ari byo ibirayi n’ikawa ariko banki ifite gahunda yo gukomeza no ku bindi bihingwa.

Abakozi ba Unguka Bank Plc bitabiriye ayo mahugurwa basuye abatubuzi b’imbuto z’ibirayi barimo SPF_Ikigega (Busogo) na Bwana Apollinaire wo mu Murenge wa Kinigi mu Karere ka Musanze, banasuye Koperative Abakunda Kawa bari mu Murenge wa Rushashi, Akarere ka Gakenke.

Umuyobozi ushinzwe Ubucuruzi muri Unguka Bank, Mme Vestine Nyiranyamibwa, yasobanuye ko aba bakozi bari mu mahugurwa kugira ngo bajye babasha kwiga neza inguzanyo bahuza ubumenyi bw’ibihingwa n’ubumenyi mu gutanga inguzanyo.

Ikigo FAC Ltd gihagarariwe na Majyambere Florent, cyatanze aya  amahugurwa, ndetse n’abahinzi basuwe bashimiye abahuguwe banashimira Unguka Bank Plc ko yafashe icyemezo cyiza kizabafasha gutanga neza inguzanyo mu buhinzi.

Unguka Bank isanzwe ikorana n’abahinzi  mu Turere twa Rubavu, Nyabihu, Musanze, Gakenke na Rusizi ndetse na Nyamasheke, ikaba ihamagarira n’abandi bahinzi kuyigana, bagafatanya kugira ngo bashyire mu bikorwa imishinga yabo.

Unguka Bank ifite amashami 14 mu gihugu hose, harimo 6 ari mu Mujyi wa Kigali 4 ari mu Mijyi ya Rusizi, Muhanga, Musanze na Rubavu mu gihe andi  mashami 4 ari mu cyaro harimo ishami rya Gakenke, Kinigi, Kora na Mahoko.

Abakozi basobanuriwe uko hakoreshwa ikoranabuhanga mugutubura imbuto z’ibirayi
Abahuguwe (abakozi ba Unguka Bank) bakirijwe kawa y’umwimerere (organic coffee)
  • Imvaho Nshya
  • Gicurasi 18, 2022
  • Hashize imyaka 2
TANGA IGITEKEREZO
Tumaini Karekezi Blondel says:
Gicurasi 19, 2022 at 7:57 am

Iyo umukozi wa Banki afite ubumenyi bujyanye n’ubuhinzi abasha kuganira n’umuhinzi bakumvika neza. Anabasha kumenya neza umubare w’amafaranga n’igihe bikwiriye ku inguzanyo ihabwa umuhinzi. Unguka Bank mukomereze aho.

Andika igitekerezo

AMATEGEKO AGENGA IYANDIKA RY'IGITEKEREZO CYAWE