Musanze: Abajyanama b’Iterambere ry’Imibereho myiza barashinjwa gutiza umurindi igwingira

  • Imvaho Nshya
  • Ukwakira 30, 2023
  • Hashize amezi 7
Image

Ababyeyi bamwe bo mu Murenge wa Gacaca, Akarere ka Musanze, bavuga ko bababazwa n’Abajyanama b’Iterambere ry’Imibereho Myiza bazwi nka “Parasocial Workers” mu ndimi z’amahanga, babakura ku rutonde rw’abagenerwabikorwa bakabura inkunga bemerewe n’Umukuru w’Igihugu.

Ibyo abo babyeyi bavuga ko bishyira mu kaga imiryango y’abatishoboye bagenerwa inkunga yo kurwanya imirire mibi n’igwingira ry’abana igihe batwite cyangwa bonsa.

Bamwe mu babyeyi baganiriye n’Imvaho Nshya bo mu Kagari ka Karwasa muri uyu Murenge wa Gacaca, bavuga ko iyi nkunga iba igenewe abagore batwite n’abonsa, ariko kuri ubu ngo bari kujya ku makonti ngo barebe niba hari amafaranga ahari bagasanga nta n’urutoboye, bagaruka mu Nzego z’ibanze bagasanga barabaciyemo umurongo utukura.

Manizabayo Cansilda yagize ati: “Twe  hari ibintu byatuyobeye nkatwe bagenerwa inkunga itwunganira mu konsa no kongera abana bacu indyo yuzuye twayiherewe na Kagame. muri mudasobwa turimo ariko twajya kuri banki tukabura amafaranga, ahubwo Abajyanama b’Iterambere ry’imibereho myiza, ku rutonde bafite ugasanga bakunyujijemo umurongo utukura kubera ruswa bashobora kuba barya. Ukibaza impamvu ku rutonde rw’Umurenge uhari ndetse no muri sisitemu urimo ariko kuri banki ukabura kashi, ibi bintu bikwiye gusuzumwa tukarenganurwa.”

Abajyanama b’Iterambere barashinjwa kurya ruswa bagasimbuza abagenerwabikorwa

Uyu mubyeyi akomeza avuga ko ababazwa no kuba ibi bintu bidakorerwa mu ruhame ahubwo ngo bakabibona mu nyandiko gusa.

Yagize ati: “Ni gute wasobanura ukuntu Gitifu w’Umurenge afite urutonde rw’abagenerwa inkunga ariko wagera ku Mujyanama w’Iterambere ry’Imibereho myiza ugasanga uri hanze ntaho ubarizwa muri rusange, ikindi ugasanga umuntu utaremerejwe mu Nteko ni we urimo gufata inkunga na yo atagenewe. Rwose ruswa mbona ari yo yica byose cyangwa niba baraducukije babitubwire.”

Umunyamabanga Nshingwabikorwa w’Umurenge wa Gacaca Nsengimana Aimable, we atangaza ko iki kibazo atari akizi gusa ngo agiye kubikurikiranira hafi.

Yagize ati: “Iki kibazo cyo kuba inkunga itagera ku bo yagenewe ntabwo nari nkizi, gusa aho mbimenyeye ngiye kubikurikirana, iyi nkunga yagenewe umuntu wese udafite ubushobozi mu mibereho myiza kandi igahabwa uwujuje ibyangombwa. Niba hari abakurwa ku rutonde bari bahasanzwe ntibasobanurirwe impamvu byaba ari ikibazo gikomeye cyane, none uwo ushyira ku rutonde abo ashatse n’igihe yishakiye abikorera iki?

Ibi bintu ngiye kubikurikirana kandi uwo dusanga koko ari kubikora kubera ruswa cyane ko nta yandi mabwiriza twari twahaba ngo twongeremo cyangwa se dukuremo abandi azabihanirwa, ahubwo abaturage bajye baduha amakuru mbere.”  

Kuri iyi nkunga umubyeyi agenewe amafaranga ibihumbi 10 buri kwezi aho ayahererwa icyarimwe uko ari ibihumbi 30 mu gihembwe, ikaba igenewe abagore batwite n’abonsa batishoboye mu rwego rwo kurwanya imirire mibi n’igwingira ry’abana bari munsi y’imyaka itandatu.

Gahunda ya Leta ni uko yiyemeje kurwanya igwingira ry’umwana kuva kuri 33% nk’uko bigaragara ubu, mu mwaka wa 2024 rikazagera kuri 19%.

NGABOYABAHIZI PROTAIS

  • Imvaho Nshya
  • Ukwakira 30, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE