Musanze: Abahoze mu icuraburindi bagahabwa amatara ku muhanda barashimira Perezida Kagame

  • Imvaho Nshya
  • Ugushyingo 12, 2023
  • Hashize amezi 4
Image

Icyizere basigiwe na Perezida wa Repubulika y’u Rwanda Paul Kagame ubwo yabasuraga yaje kwiyamamaza mu mwaka wa 2017 ntikizasibangana mu mitima yabo kuko imvugo ye yabaye ingiro, kuri ubu bakaba bafite umuhanda wa kaburimbo, bacana amashanyarazi mu ngo bafite n’amatara arara amurika ku muhanda.

Abakoresha n’abaturiye umuhanda Kalisimbi-Nyamagumba bishimira ko ayo matara yo ku muhanda wa kaburimbo yakumiriye ibisambo byari byarakamejeje muri uyu muhanda kubera umwijima wahahoraga.

Ni umuhanda ufite ibilometero 6 kuri ubu uriho amatara, kuva sa kumi n’ebyeri amatara aba yaka ku buryo abaturage bavuga ko bavuye mu icuraburindi bigatuma bizera umutekano wabo kuko haba habona.

Sebutsikari Alphonse w’imyaka 64, avuga ko mbere biberaga mu kizima, ari amashyamba gusa ku buryo hari n’ubwo ibisambo byabasangaga mu nzu, ariko ngo aho Kagame abahereye kaburimbo agashyiraho n’amatara bizeye umutekano 100%.

Yagize ati: “Turashima imiyoborere myiza ya Paul Kagame imvugo ni yo ngiro. Igihe yaje kwiyamamaza iwacu muri Musanze, yatwijeje amashanyarazi twumvaga bidashoboka kuko twumvaga nta kintu cyadukiza umwijima wabaga aha. Baratwamburaga, bakatuniga bakatwambura utwacu none kugeza ubu umutekano ni wose kuko tugenda ijoro hagaragara, ndetse n’abacuruza mituyu bava ku kazi mu gihe cya satanu z’ijoro”.

Kuba amatara yo ku muhanda Kalisimbi–Nyamagumba  yarahageze ngo byatumye n’ubucuruzi bwabo bwongera amasaha ku buryo kuri ubu ngo n’umwana bamutuma kuri butike.

Uwitwa Uwizeyimana Rosette yagize ati: “Kuri ubu amatara yageze hano tuba twizeye umutekano kubera ko tutamenya amanywa nijoro ubu turakora kugeza sa tanu kandi abakiliya baba baza. N’umwana kuri ubu nijoro baramwohereza akaza guhaha kuko tuba twizeye umutekano nta muntu wakwambura mugenzi we bamureba kubera amatara.”

Siborurema Moise na we yavuze ko ayo matara yo ku muhanda ari kimwe mu byatumye n’abaturage bo Mudugudu wa Susa bizera umutekano wabo.

Yagize ati: “Kuri ubu ibisambo ntabwo bikidutegera mu nzira uko byishakiye kuko hari ubwo byikingaga ku nzira mu bihuru bya hano hafi. Ariko ubu amatara aracana akagera muri metero 50 uvuye ku muhanda urumva rero ko umugizi wa nabi uba wamubonye mbese ubu hano habaye nk’i Burayi njya numva. Igihugu cyacu ni cyiza rwose ibi ni ibintu dushima kandi byahinduye ubuzima bwacu aho umuntu ajya gushesha isombe mu masambiri z’ijoro”.

Umunyamabanga Nshingwabikorwa w’Umurenge wa Muhoza Manzi Jean Pierre, na we ashimangira ko ayo matara yo ku muhanda yazanye umutekano kandi agira uruhare rukomeye mu iterambere ry’abaturage.

Yagize ati: “Ni byo koko kariya gace kari icuraburindi mu buryo bwagaragariraga amaso, aha rero nanjye rwose nk’uko abaturage babivuga ndashimira Perezida wa Repubulika Paul Kagame waduhaye uriya muhanda Kalisimbi-Nyamagumba. Uretse no kuba waroroheje ubuhahirane n’imigenderanire byadufashije no kurinda umutekano. Nkaba nanone nsaba abaturage gukomeza gusigasira ibyo Perezida wacu agenda atugezaho”.

Uyu muhanda wa Kalisimbi-Nyamagumba unyura mu Kagari ka Ruhengeri mu Midugudu ya Muhe-Susa na Bushozi kugera kuri kaburimbo Vunga – Musanze.

NGABOYABAHIZI PROTAIS

  • Imvaho Nshya
  • Ugushyingo 12, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE