Musanze: Abahinzi bakoresha ifumbire y’amatotoro itarabora neza barataka igihombo

  • NGABOYABAHIZI PROTAIS
  • Ukuboza 20, 2023
  • Hashize amezi 3
Image

Bamwe mu bahinzi b’ibirayi bavuga ko ifumbire y’amatotoro y’inkoko bakoresheje itaboze neza irimo kubateza ibihombo bikomeye cyane kubera ko imyaka bayihingishije igenda yuma buhoro buhoro.

 Ifumbire y’inkoko ahanini iba igizwe n’ayo matotoro avanzwe n’ibarizo basasira inkoko. Kubera ko iyo bimaze kwivanga cyane ko biba byahinduye isura byabaye umukara,  abahinzi bibwira ko igeze igihe cyo gukoreshwa maze bakayishyira mu mirima.

Ababikoze badategereje ko ibanza kubora neza, bavuga ko bari mu bihombo bikomeye.

Karegeya Apolinaire, umuhinzi akaba n’umutubuzi w’imbuto y’ibirayi mu Karere ka Musanze, avuga ko iriya fumbire ari mbi nk’uko bagiye babibona igihe bayikoresheje neza.

Yagize ati: “Iki kibazo kimaze iminsi aho dukoresha ifumbire y’inkoko iba idahiye neza, twasanze byica ubutaka cyane ko isaso y’inkoko ari ibarizo ry’inturusi kandi bizwi ko byangiza ubutaka byagaragaye ko inturusi iba ifite ubusharire bw’ubutaka, aborozi baradutuburira tukibwira ko ari ifumbure nyamara dutwaye uburozi cyane ko inturusu itabora vuba, ibi bintu byaduteye igihombo nk’abahinzi b’ibirayi”.

Uyu muhinzi akomeza avuga ko byaba byiza niba umworozi agiye gusasira inkoko ze yajya akoresha ibarizo ry’ibiti ndumburabutaka cyangwa se ibindi byatsi bibora, harimo ibishogoshogo by’ibishyimbo.

Umuyobozi Mukuru w’Urugaga Imbaraga rw’abahinzi n’aborozi mu Rwanda Jean Paul Munyakazi, na we ashimangira ko ifumbire y’imborera idahiye neza yangiza ubutaka, ariko noneho ngo gushyira ifumbire y’inkoko itarabora neza mu murima ari ukwikururira akaga.

Yagize ati: “Iriya fumbire y’inkoko igizwe n’ibarizo n’amatotoro itarabora izana gaze mu mwobo watewemo ikirayi ikacyangiza, iyi fumbire y’amatotoro ni nziza ariko noneho igomba gukoreshwa nibura imaze amezi atatu ni bwo iba yashangutse na ho buriya kuyikoresha itarabora ni uburozi bubi cyane ko inturusu na zo zangiza ubutaka.

Twizerimana Alexis Umukozi w’Ikigo cy’Igihugu gishinzwe guteza imbere Ubuhinzi n’Ubworozi (RAB) ushinzwe kubungabunga, gufata neza ubutaka, no gukoresha ifumbire ikomatanyije, na we yashimangiye ko iyo fumbire itaboze neza iteza ibibazo.

Avuga ko ifumbire y’imborera ari nziza ariko iyo itarabora neza iteza akaga gakomeye cyane.  

Yagize ati: “Ubundi ifumbire ry’inkoko byagaragaye ko ikize ku ntungagihingwa, byagaragaye ko hari abakura iyi fumbire mu kiraro imazemo icyumweru, ariko kubera ko yajandamye bakumva ko bagiye gufumbira oya ni ukwiyangiriza cyane kuko buriya 70% kugeza kuri 80% aba ari isaso gusa, amatotoro ari nka 20% ubwo urumva iyo ari fumbire?”

Uyu mukozi akomeza avuga ko ifumbire nziza iba imeze nk’igitaka yahiye neza ngo kuko ni yo itanga umusaruro, agasaba abahinzi kujya bareka ikabora neza bakabona kuyitera mu mirima yabo.

Yagize ati: “Hari umuhinzi ufata ibigorigori, ibikenyeri se akabihingiraho azi ngo birabora nyamara iyo agiye guhinga ku nshuro ya kabiri asanga bitarabora ahubwo byarajeho uruhumbu. Ibi rero bigaragara ko bitapfa kubora vuba mu gihe rero birwana no kubora na   byo bizana gazi yangiza igihingwa ni bwo usanga nk’umurima wose ibihingwa byabaye umuhondo , no mu birayi rero uzasanga bigenda bihisha bitarera akenshi aba ari ingaruka z’imfumbire nk’iyo”.

Twizerimana yemeza ko gukoresha ifumbire nk’iriya ari  kimwe mu bitera igihombo umuhinzi kuko aba yizeye ko ateye ifumbire azasarura nyamara nyuma y’aho agasanga yarikururiye n’udukoko twangiza imyaka.

Yagize ati: “Hari udusimba bita inanda, nkongwa, kagungu n’utundi utwo twose dukomoka ku ifumbire iba itarabora neza. Ifumbire idahiye ituma umwuka utazamuka neza mu butaka bityo ikirayi cyangwa se ikindi gihingwa kikahazaharira. Nkaba nasaba abahinzi kujya bakoresha ifumbire yaboze neza kuko buriya kirazira kuba ugiye guteza imyaka yawe ifumbire ukaba ukibona ibiyigize, nk’ibyatsi  n’ibindi igomba kuba iboze neza.”

Abahinzi bagirwa inama yo gukoresha ifumbire mvaruganda ivanze n’imborera ariko noneho iyi fumbire ikaba ihiye neza.

Umuyobozi w’Urugaga imbaraga mu Rwanda Jean Paul Munyakazi, asaba abahinzi kwitondera gukoresha ifumbire itarabora
  • NGABOYABAHIZI PROTAIS
  • Ukuboza 20, 2023
  • Hashize amezi 3
TANGA IGITEKEREZO
ka says:
Ukuboza 21, 2023 at 10:03 am

ifumbire yose itarabora yanguza imyaka.

Andika igitekerezo

AMATEGEKO AGENGA IYANDIKA RY'IGITEKEREZO CYAWE