Musanze: Abacuruza inyama bahombywa n’abazunguzayi bazicuruza magendu

  • NGABOYABAHIZI PROTAIS
  • Mutarama 12, 2024
  • Hashize amezi 4
Image

Bamwe mu bacuruzi b’inyama bo mujyi wa Musanze, bavuga ko babangamiwe n’abazunguzayi b’inyama bazikura hirya no himo mu Turere dukikije uyu mujyi bakaza kuzicuruza mu buryo bwa magendu, bigatuma izabo zihera muri za firigo bikabateza igihombo.

 Abatiza umurindi abo bazunguzayi ni bamwe  mu bakunzi b’akaboga bo mu mujyi wa Musanze bagifite imyumvire y’uko inyama zaraye muri filigo zitaryoha. 

Nkurunziza Elton avuga ko abo yafata nk’abazunguzayi b’inyama bamaze kubatera igihombo kinini

Yagize ati: “Kuri ubu hari inyama ziva muri Vunga Akarere ka Nyabihu bamwe bazizana mu ndobo abandi baza bazipfunyitse mu bihoho bagenda bazigurisha mu masibo mu Tugari tumwe two mu mujyi wa Musanze, aba bazunguzayi rwose batuma inyama zacu zibura abaguzi kandi twe tuba twazishyize muri firigo mu rwego rwo kubahiriza gahunda ya Leta yo kurinda ubuzima bw’abantu”.

Nkurunziza akomeza avuga ko ngo hari bamwe mu banyamujyi bagifite imyumvire yo hasi ivuga ko inyama yo muri firigo itaryoha ibi rero ngo ni byo biha ingufu bariya bazunguzayi b’inyama

Yagize ati: “Hari abatemera kurya inyama zo muri firigo, ibi bituma rero abazunguzayi bakura inyama Vunga bahitamo no kuzibagira mu bihuru bakazizana mu mujyi wa Musanze, izi ntabwo ziba zinapimwe kuko bamwe bazibaga mu rukerera, ibi kandi abayobozi barabizi, abazunguzayi barakora nyamara twebwe dusora usanga ubuyobozi butabiha agaciro ,  nibudufashe  iki kibazo cy’abazunguzayi b’inyama gicike ubundi natwe dusore neza”.

Mukamugema Marinne ni umwe mu bagore bacuruza inyama mu mujyi wa Musanze nawe avuga ko abitwa abazunguzayi b’inyama badindiza abacuruza inyama bakorera ahazwi.

Yagize ati: “Abazunguzayi b’inyama ni ikibazo gikomeye cyane, kuko inzira zose barazisibye, ahantu hose hari abakiliya bazaga kutugurira inyama, mu maresitora, tekerza ko no muri za hoteli hari abagura n’abazunguzayi inyama ubwose tuzungukira hehe?

Hari abacuruza inyama zitigeze zigera muri firigo ni zo zishira mbere, uretse ko n’abayobozi bamwe ahari usanga baba bafitemo inyungu, none ko ubabwira iki kibazo bakirebera hirya”!

Umukozi w’ikigo kigenzura isuku n’ubuziranenge bw’ibicuruzwa n’ibikoresho biri ku isoko ry’u Rwanda “RICA” Simbarikure Gaspard avuga ko kuri ubu barimo kugenzura bareba koko niba ibigo binini nk’amahoteli, ibigo by’amashuri se bababaza aho bakura izo nyama kugira ngo bamenye ukuri ku bivugwa kuri abo bacuruzi bita abazunguzayi b’inyama, kandi ibi bintu ngo bazabigeraho ku bufatanye  n’ubuyobozi bigishe abarya inyama ko bakwiye kujya barya inyama zuzuje ubuziranenge.

Yagize ati: “Niba koko ariko bimeze iki cyaba ari ikibazo gikomeye kandi cyo kwitabwaho, ariko kandi ntabwo ari muri Musanze kivugwa gusa kuko no mu tundi turere bihavugwa aho hari bamwe bagicuruza inyama zitabagiwe ahabigenewe ku mabagiro azwi, turakomeza rero gukora ubukangurambaga kugira ngo abantu bajye barya inyama zabagiwe ahantu hazwi kandi zagenzuwe na ba Veterineri kandi hari icyangobwa kigaragaza ko zapimwe”.

RICA yatangaje icyemezo cyo kuba inyama zigomba kuribwa nyuma yo gushyirwa muri firigo ku wa 14 Werurwe 2023. Iki cyemezo kivuga ko amabagiro azajya atanga inyama z’inka, ihene, intama n’ingurube bimaze amasaha 24 muri firigo, gifashe mu rwego rwo guhashya indwara y’ubuganga yibasiye amatungo no kugira ngo abaturage bakomeze guhabwa inyama zujuje ubuziranenge.

  • NGABOYABAHIZI PROTAIS
  • Mutarama 12, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE