Muri Jenoside ihame ryo kubahiriza agaciro ka muntu ntiryitaweho-NCHR 

  • NTAWITONDA JEAN CLAUDE
  • Mata 13, 2022
  • Hashize imyaka 2
Image

Komisiyo y’Igihugu y’Uburenganzira bwa Muntu (NCHR) ivuga ko mu gihe cya Jenoside yakorewe Abatutsi mu 1994, ihame ry’ingenzi ryo kubahiriza agaciro ka Muntu ritubahirijwe, kuko inzirakarengane z’Abatutsi barenga miliyoni bavukijwe ubuzima bwabo.

Byagarutsweho ku wa 12 Mata 2022, ubwo Ubuyobozi n’abakozi ba Komisiyo y’Igihugu y’Uburenganzira bwa Muntu n’izindi nzego zitandukanye bifatanyaga mu gikorwa cyo kwibuka ku nshuro ya 28 Jenoside yakorewe Abatutsi, cyabereye i Kigali ku cyicaro cy’iyi komisiyo.

Perezida wa NCHR   Mukasine Marie Claire yagize ati: “Igihe Jenoside yakorerwaga Abatutsi mu mwaka wa 1994, ihame ry’ingenzi ryo kubahiriza agaciro ka Muntu riteganywa n’Itegeko Nshinga rya Repubulika y’u Rwanda tugenderaho hamwe n’Amasezerano Mpuzamahanga u Rwanda rwemeje burundu, kandi rishimangira ko ubuzima bw’umuntu ari ntavogerwa, ko nta muntu n’umwe ukwiye kuvutsa undi ubuzima bwe ntiryitaweho kuko inzirakarengane z’Abatutsi zavukijwe ubuzima bwazo”.

Yakomeje avuga ko kwibuka  by’umwihariko nka Komisiyo y’Igihugu y’Uburenganzira bwa Muntu ifite inshingano zo guteza imbere no kurengera uburenganzira bwa Muntu ari umwanya wo kwisuzuma no kurebera hamwe uko buri wese mu mirimo ashinzwe agira uruhare mu kurengera iyubahirizwa ry’agaciro ka Muntu, gukumira no kurwanya icyo ari cyo cyose gihutaza uburenganzira bwa Muntu cyane cyane Jenoside n’ingengabitekerezo yayo.

Ati: “Ni umwanya wo kurushaho kumenya neza amateka mabi twanyuzemo yatumye Jenoside ishoboka; tumenye aho twavuye, aho tugeze n’aho tugana; kwiyubakamo imbaraga zituma twamaganira kure ibintu byose byakurura inzangano mu Banyarwanda, gukangurira buri Muturarwanda kwirinda amacakubiri, guharanira ubumwe bw’Abanyarwanda, kubahiriza uburenganzira bwa mugenzi we no guharanira kubaka u Rwanda rutazongera kurangwamo Jenoside n’ibindi byose bijyanye na yo”.

Perezida wa NCHR Mukasine Marie Claire yavuze kandi ko ari ngombwa gukomeza kuzirikana no  gushimira ingabo zari iza RPA zagize ubutwari n’ubwitange mu guhagarika Jenoside yakorewe Abatutsi, mu gihe amahanga yose yari yatereranye inzirakarengane kugeza aho abarenga miliyoni bavukijwe ubuzima bwabo. 

Yakomeje avuga ko ibyo Igihugu kimaze kugeraho ubu mu kwiyubaka ari byinshi ariko hakiri urugendo, bikaba bisaba ko buri Munyarwanda, yaba umukuru cyangwa umuto bose  baharanira iteka gukumira no kurwanya Jenoside. 

Abitabiriye igikorwa cyo kwibuka, bahawe ikiganiro kivuga ku mateka mabi Igihugu cyanyuzemo yagejeje kuri Jenoside yakorewe Abatutsi mu 1994 n’uburyo nyuma ya Jenoside Abanyarwanda bataheranwe na politiki mbi ahubwo baharaniye kongera kubaka ubumwe bahoranye.

Muri ayo mateka, Visi Perezida wa NCHR Sinyigaya Silas yavuze uburyo abakoloni bimitse irondabwoko, bagacamo ibice Abanyarwanda, aho mu 1933 bazanye  agatabo kitwa Ibuku kari kanditsemo  ibyo bitaga amoko atandukanye, harimo ijambo ubwoko ryavugaga neza ubwoko gakondo (Abega, Abasinga, Ababanda), ariko  hakabamo n’ijambo bananiwe guhindura mu Kinyarwanda (race) barirekera mu Gifaransa akaba ari ryo bandikagaho amagambo; Umuhutu, Umututsi, Umutwa. 

Ibi ngo byasenye ihame rikomeye Abanyarwanda ntibongera kwibona nk’abavandimwe. 

Yanagarutse ku by’ingenzi bigaragaza uko ingengabitekerezo ya Jenoside yasenye umuryango w’Abanyarwanda kugeza kuri Jenoside yakorewe Abatutsi mu 1994.

Yavuze ko Jenoside imaze guhagarikwa n’ingabo zari iza FPR Inkotanyi hari byinshi byakozwe mu rwego rwo kubaka ubumwe bw’Abanyarwanda, harimo gukura amoko mu ndangamuntu no mu zindi nyandiko, kuvugurura ubutabera, gusaba no gutanga imbabazi ku bakoze ibyaha n’abahemukiwe muri Jenoside yakorewe Abatutsi, kwegereza abaturage ubuyobozi n’ubushobozi n’ibindi.

Visi Perezida wa NCHR Sinyigaya yagaragaje ko  nubwo hari intambwe nini yatewe hakiri inzitizi; z’amakuru y’ibinyoma anyuzwa mu nyandiko n’ibiganiro bitambutswa ku mbuga nkoranyambaga, kwitwaza ihame ry’uburenganzira bwo gutangaza ibyo abantu batekereza ariko hihishemo gupfobya no guhakana Jenoside yakorewe Abatutsi no  gukwiza ikinyoma ko habaye Jenoside ebyiri.

Avuga ko kugira ngo izi nzitizi ziveho bisaba kwamagana imyumvire ya bamwe igoreka amateka.

Umuyobozi Mukuru w’Ikigega cyihariye cy’Ingoboka (SGF) Dr Nzabonikuza Joseph yavuze ko kurwana iyi ntambara y’amagambo agoreka amateka no kuyitsinda ari ugutanga ibitekerezo binyomoza ibyo binyoma no kugaragaza ukuri.

Buri wese aho ari arasabwa guharanira ubumwe bw’Abanyarwanda

Umunyamabanga Nshingwabikorwa w’Inama y’Igihugu y’Abantu bafite Ubumuga Ndayisaba Emmanuel yavuze ku bijyanye no kubaka ubumwe bw’Abanyarwanda, avuga ko abajijutse bareberera abantu benshi batandukanye bakwiye kububiba.

Yatanze ubuhamya bwe mu kubaka ubu bumwe avuga ko muri 2019, yafashe umwanzuro ajya guha abantu imbabazi bageze kuri 80 b’aho akomoka mu Ntara y’Amajyepfo.

Ati: “Numvise ko ari ngombwa kugira ngo nduhuke ariko na bo baruhuke bahindure n’imyumvire, ikintu nakuyemo gikomeye ni uko namaze kubigisha mbabwira ko icyaha gikomeye cyane ari ukwica umuntu. Ubundi iyo hari icyo wishinja mu mutima ujya kureba mugenzi wawe wahemukiye ukamusaba imbabazi ariko iyo wamwishe ntumubona ngo uzimusabe”.

Ibi byatumye abo yahaye imbabazi babohoka, umusaruro wabonetse nyuma n’uko abagera kuri 900 basabanye imbabazi bakanazihana mu bumwe n’ubwiyunge.

Ndayisaba ati: “Abaturage bigishijwe neza n’ibikomere tubona bagifite byashira tukababanisha bakaba umwe kandi Igihugu kigatera imbere kurushaho”.

Yasabye abayobozi n’abakozi bitabiriye igikorwa cyo kwibuka, ko buri wese aho ari, aho akorera, aho atuye afite umukoro wo kugira uruhare mu kunga Abanyarwanda kugira ngo abana b’ejo bazaragwe Igihugu cyiza.

Visi Perezida wa NCHR Sinyigaya Silas atanga ikiganiro

  • NTAWITONDA JEAN CLAUDE
  • Mata 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE